Ma mulţă askirladz americani tru România
Statele Unite dimăndară, ñiercuri, disvărtearea aproapea 3.000 di askirladz americani tru văsilii di pi arădărikea estică a Alianţăllei Nord-Atlantică. Aproapea 1.000 di askirladz va s’agiungă tru perioada yinitoari ditu Germania tru România, iara aproapea 2.000 va s’yină ditu Statele Unite tru Polonia şi Germania.
Daniela Budu, 03.02.2022, 19:43
Statele Unite dimăndară, ñiercuri, disvărtearea aproapea 3.000 di askirladz americani tru văsilii di pi arădărikea estică a Alianţăllei Nord-Atlantică. Aproapea 1.000 di askirladz va s’agiungă tru perioada yinitoari ditu Germania tru România, iara aproapea 2.000 va s’yină ditu Statele Unite tru Polonia şi Germania.
Purtătorlu di zboru a Pentagonului, John Kirby, spusi că easti zborlu ti misiuni temporare tră anvărtuşearea apărarillei aliaţlor europeni, tru contextul a mintireaşiloru cu Rusia, cari arădăpsi forţi importante la sinurlu cu Ucraina. Referinda-si la askirladzlli pitricuţ tru România, John Kirby spusi că easti zborlu ti un batalion di atac şi o unitate di infanterie, organizate tră s’hibă dizvărtiti pi şcurtu kiro. Efectivili va s’adavgă a aţiloru aproapea 900 di askirladz americani staționați permanentu tru România și structurilor pitricuti periodic tră exerciții militare comune.
Uidisitu cu oficialu, iţi minari a forţilor americane nsimneadză consultări cu statele nicukiri, aşi cum s-feaţi cu România, Polonia şi Germania. Tutunăoară, John Kirby salute hăbărli fapti di văsilii catacum Spania, Danemarca, Marea Britanie şi Olanda, cu privire la posibilitatea ta s’pitreacă forțe suplimentare tră anvărtuşearea flancului estic al NATO.
Bucureşti, prezidentulu Klaus Iohannis, premierul Nicolae Ciucă şi ministrul apărarillei, Vasile Dăncu, salutară iniţiativa SUA şi spusiră că aesta va s’aibă un rol important di discurajare ti iţi evoluţii negative di securitate tru regiune şi di anvărtuşeari a capacităţilor defensive ali Armată.
Dimi, tora ma ninti, șeflu a statlui și spusi andrupămintulu tră criştearea prezenţăllei militare a NATO şi, respectiv, a SUA tru România şi tru zona ali Amarea Lae.
Sinurli României sunt sinurli Uniunillei Europene şi a noastre – declară și ministrul francez di externe, Jean-Yves Le Drian, aflat ñiercuri Bucureşti. Şeflu a diplomaţiillei franceze spusi că, ditu videala ali Franţă, sinurli sunt di dimecu a tutulor statelor membre, di iu şi apofasea ti cilăstăseari a Parislui tru actualul contextu di securitate, slăghitu cabaia di acţiunile ali Rusie tru regiune.
Puteţi s’băgaţ besă tu noi, aşi cum şi noi băgămu besă pi România – exighisi oficialu di Paris.
Tu arada a llei, Rusia califică ca hiinda distructivă apofasea a Pentagonlui ta s’pitreacă askirladz suplimentari tru Europa di Est. Viceministrul rus di externe, Aleksandr Gruşko, zbură ti ună misură niantimilleată, cari creaşte mintireaşili militare şi ñicureadză posibilitatea a unei apofasi politiţi. Moscova căftă, tora ma ninti, excludirea a iţi tindeari a NATO cătă est şi ritradearea trupelor Alianţăllei ditu văsiliile Europăllei di Est cari aderară la Alianță ahurhinda ditu 1997. Statele Unite nu aprukeară căftărli, evocânda alliumtrea posibile misuri di crişteari a pistipsearillei, catacum inspectarea di către Rusia a scuturlor antirachetă amplasate tru Polonia şi România.
Autor: Daniela Budu
Armânipsearia: Taşcu Lala
