Comisia Europeană urminipseaşti intrarea ali Românie tru Schengen
Roxana Vasile, 17.11.2022, 14:08
Aspirantă di pisti un deceniu la statutlu de văsilie membră Schengen, statut niaprukeatu di itia a reticenţăllei spusă di niscănti state ali Uniuni Europeană, România năpoi intră tru cărţi tră acceptarea, tu şcurtu kiro, tru spaţiul di libiră urdinari.
Miercuri, Comisia Europeană căftă a Consiliului s’llia fără amănari apofasi ţi suntu ananghi tra s’da izini ti adeararea mplină ali Românie, Vărgărie şi Croaţie la Spaţiul Schengen. Executivlu comunitar cundilleadză că România ari un management vărtosu şi di analtă calitate a sinurloru şi easti ci cilăstăseari tru coopeararea internaţională tru materie de poliţie de sinuru. Ma multu, lugurseaşti Executivlu comunitar, easti activă pi dauă fronturi di amprotusa: combaterea a migraţiillei paranomu şi a traficului de hiinţe umane. Tru atea ţi mutreaşti tiñisearea a ndrepturlor fundamentali, România ari structuri hăirlătiţi tră s’garanteadză acceslu la protecţie internaţională, cu tiñisearea a principiului niturnarillei, lugurseaşti Comisia Europeană.
“Easti oara să spunem ghini vinitu a aţiloru trei văsilii. Aşteptarea a fost prea lungă.”, declara comisarul european tră afaceri interne, Ylva Johansson. Uidisitu cu aesta, aţeali trei state tiñîsescu tuti condiţile aderarillei.
Ylva Johansson: “Spaţiul Schengen easti una ditu marile realizări ali Uniunii Europene. Ligăturli stabilite apufusiti dusiră la dezvoltarea piaţăllei interne şi a economiei. Schengen li feaţi cu hăiri şi standardele de bană a oamenilor. 22 de state membre şi alte patru di nafoara a blocului comunitar fac parte ditu Schengen. Easti kirolu ca nică trei văsilii s’hibă aprukeati. Vărgăria, România şi Croaţia demonstrară că tiñisescu tuti condiţiile, au instrumente, au structurile şi procedurile ţi suntu ananghi tră kivernisearea a sinurloru externe, inclusiv a posibilelor fuvirseri la adresa securitatillei.”
Easti nica ună evaluare favorabilă ţi s’adavgă la dosarul României, un document cari yilipseaşti gradul de pregătire la cari văsilia a noastră easti tora, apăndăsi premierul Nicolae Ciucă pi reţelele sociali.
Comunicatul a Comisiei fu salutat şi de ministrul de Interne, Lucian Bode:
“România easti tut ma aproapi de aderarea la spaţiul Schengen. Comisia Europeană reconfirmă că România ma largu tiñiseaşti tuti condiţiile anănghisiti tră adeararea la spaţiul Schengen şi implementează uidisitu aquis-ul Schengen. Concluziile a raportului suntu pozitive şi yilipsescu că suntu tiñîsiti tuti condiţiile tehniţi ca România s’agiungă cătu ma ayoñea membră a spaţiului Schengen.”
Ună apofasi mutrinda adeararea României, Bulgariei şi Croaţiei la Schengen va s’hibă loată tru 8 di andreu, cându va s’hibă ananghi di un vot unanim a miniştrilor europeni de Interne şi ai Justiţiei. Olanda, opozantă veaclle a aprukearillei ali României di itia a slăbinţiloru ditu sistemul judiciar, u apridună minduita cu kirolu, ama nica ari ndaua rezerve, pi cari analiştii li lugursescu di itia a catandisillei politică di Haga.
Autoru: Roxana Vasile
Armânipsearea: Taşcu Lala
