Aţeali ditu soni păzărăpseri tră Schengen
Prezentu la summitul Uniunea Europeană — Balcanii di Vest di Tirana, prezidentulu Klaus Iohannis declară că păzărăpserile mutrinda aderarea a Româniillei la Schengen nu s-bitisiră nica, iara muabeţli va s’ţănă până tru oara ditu soni tra s’agiungă la un rezultat favorabil ti văsilie. Șeflu a statlui spusi dinintea a participanţilor la summit că România easti ndreaptă s’ndrupască gaereţli ali Uniuni Europene di combatere a migraţiillei paranomu pi ruta Balcanilor di Vest, acă Bucureștiul nu easti pi aestă rută şi niţi nu easti unu izvuru yilipsitoru di fluxuri di migranţă năuntrulu ali UE. El confirmă că miniştrii di justiţie şi afaceri interne ali Uniunii Europene au pi agenda şedinţăllei di gioi aderarea Românie, ali Vărgrie şi ali Croaţie la spațiul di libiră urdinari. Până atumţea, deadi asigurări prezidentulu, să zburaşti şi s’negociadză ma largu.
Daniela Budu, 07.12.2022, 16:19
Prezentu la summitul Uniunea Europeană — Balcanii di Vest di Tirana, prezidentulu Klaus Iohannis declară că păzărăpserile mutrinda aderarea a Româniillei la Schengen nu s-bitisiră nica, iara muabeţli va s’ţănă până tru oara ditu soni tra s’agiungă la un rezultat favorabil ti văsilie. Șeflu a statlui spusi dinintea a participanţilor la summit că România easti ndreaptă s’ndrupască gaereţli ali Uniuni Europene di combatere a migraţiillei paranomu pi ruta Balcanilor di Vest, acă Bucureștiul nu easti pi aestă rută şi niţi nu easti unu izvuru yilipsitoru di fluxuri di migranţă năuntrulu ali UE. El confirmă că miniştrii di justiţie şi afaceri interne ali Uniunii Europene au pi agenda şedinţăllei di gioi aderarea Românie, ali Vărgrie şi ali Croaţie la spațiul di libiră urdinari. Până atumţea, deadi asigurări prezidentulu, să zburaşti şi s’negociadză ma largu.
Klaus Iohannis: “Aestă chestiune va s’hibă pi measa-a consiliului tru format JAI, di miniştri di interne şi di justiţie. Aclo sigura că va să zburască tru extenso aestă chestiune. Până atumţea easti ananghi nica di păzărăpseri. Nica să zburaşti pi textul atillei apofasi şi noi himu ndrepţă s’himu apufusiţ până tru oara ditu soni şi s’duţemu apofasea aclo iu vremu noi.”
Aă oficiali români s-dusiră Viena tra să spună că Bucureștiul easti andeeptu ti aderari la Schengen, cancelarul ali Austrie, Karl Nehammer, declară, ma largu, că nu ari ună aprobare din partea a văsiliillei a lui ti tră admitere şi că easti ananghi di cama multu kiro. El invocă problema a migraţiillei și spuni că suntu 75.000 di imigranţă paranomu tru văsilia a lui şi că lipseaşti s’hibă aflati prota apandisi la aesti ntribari di securitate.
Problemele a migraţiillei nu pot s’hibă arcati pi zverca ali Românie, dimanda ministrul di interne, Lucian Bodi, reafirmânda că Bucureștiul tiñiseaşti tuti condiţiile tehnice tră aderarea la zona Schengen şi exighisi că nu pritu văsilia a noastră treaţi dalga migratori. “Nivrearea ti aderari va s’hibă ună cearei ahanda nidreaptă tră România”, easti cu minduita şi ministrul a proiectelor europene, Marcel Boloş.
Aduţemu aminti că guvernul olandez, cari s’ncuntră, tutuăoară ti aderari, deadi viniri undă veardi ti intrarea ali Românie tru Schengen. Tru apofasea a llei angrică și pripunerea recentă a Comisiei Europene mutrinda bitisearea a Mecanismului di Cooperare şi Verificare, pritu cari suntu monitorizate reformele tru domeniul ali justiţie tru România nica ditu 2007, unăoară cu aderarea la Uniune. Dupa ună idyea minduită, și Parlamentul Suediei votă tră aderarea ali Românie la spațiul di libiră urdinari. Iara luni, Comisia Europeană cundille, diznău, că România, Bulgaria şi Croaţia tiñîsescu acutotalui tuti căftărli” tra s’hibă membri Schengen cu tuti ndrepturli şi s’aşteaptă ca aţeali 27 di state membre s’da undă veardi, gioi, ti aprukearea aluştoru tru spațiul di libiră urdinari.
Autoru: Daniela Budu
Armânipsearea: Taşcu Lala
