Ti nishani ankisita ali Românie la EURO 2024
Tu protlu meciu ţi lu-agiucă la Campionatlu European di fotbal ditu Ghirmănie, România azvimsi Ucraina cu 3-0.
Tașcu Lala, 18.06.2024, 17:26
Niţi aţelli cu nai ma mari nădie, s’clleamă suporterlli ali Naţională di fotbal ali Românie nu pistipsea, ninti di agioclu cu Ucraina, la EURO 2024, că pareia-a lor poati s-amintă ună victorie ahâtu yilipsită. Vără turlie bătea vimtulu nădăiosu că tricolorlli va s’aibă unu agiocu bunu, cari s’agărşească, ditu aduţearea-aminti, agiocurli slabi şi dotu cu rezultati buni tu añilli ditu soni, ama maş ahătu…. Naţionala al Edward Iordănescu yinea după ună campanie di calificari tru cari nu yilipsi, ama niţi nu kiru vără agiocu, aşi că avea ţiva nădii, duri ta s’aducă cama di 40 di ñilli di români tru tribunili a stadionlui Allianz Arena di München. Şi, ti ciudie: echipa nu armasi ma nghiosu şi adusi nădie tu lao!
După ună ankisită tru cari Ucraina avu tu mănă agioclu, ama nu spusi unu piriclliu salami la poarta română, vini, tru minuta 29, dişcllidearea-a scorlui, pritu ună agudeari-topa di nafoara-a careului aminată di Nicolae Stanciu ndreptu tu kiuşelu a poartăllei ucraineană. Tricolorlli să spusiră sarpiţ, cu atacurli, dăldză-dăldză. Stanciu amină deapoa topa tu sturlu a poartăllei, cu ună agudeari-topa di tu kiuşelu a carelui mari, iarapoi România bitisi prota repriză cu livendeaţă şi mplină di pistusini.
Idyealui ahurhi şi partea a daua-a agioclui. Fotbaliştilli româñi ţăsură pi kilimea veardi di agiocu, eara proţlli dinintea-a topăllei, a deapoa tehnea a cafiunlui agiucătoru scoasi tu videală adgheafurlu, cu Denis Drăguş şi Denis Man yilipsitori tu aestu capitulu cu tehnea. Scorlu agiumsi 2-0 tru minuta 53, haristusită agudearillei-topa ditu ampăturarea al Răzvan Marin cari lu arăsi portarlu ucrainean Andri Lunin.
Patru minuti ma amănatu s’feaţi 3-0, după ună ampăturari individuală al Man şi scoasă-n’capu di Drăguş.
S’feaţiră, deapoa ma multi alăxeri di agiucători, la dauli parei. Agioclu ali Românie kiru niheamă ditu bărbătami, iarapoi Ucraina agiumsi cama cu piriclliu, cu mintea s’amină barimu golu di nămuzi. Nu s’feaţi, aşi că agioclu s’bitisi cu scorlu 3-0, vulusinda nai ma limbidă şi apufusită victorie românească la un turneu finalu. UEFA lu aleapsi ti nai bunlu agiucătoru a mecilui, capidanlu a pareiilei di fotbolu ali Românie, Nicolae Stanciu.
Nicolae Stanciu: „minduescu că, după amintarea-a fitiţiloru a meali, aestă dzuuă easti nai ma mşeată ti mini. Minduescu că atea ţi bănaiu adză nu-ari s’facă nica nă oară, nu-ari spuneari”.
Atacantul Denis Drăguş fu armata mistico al Iordănescu. Agioclu a lui individual adusi adgheafurlu, di u minti multi ori apărarea ucraineană.
Denis Drăguş: „Liopseaşti s’aveţ pistusini tu noi. Nădăimu că adusimu ti româñi aţea harauuă ţi lă si cădea s-u-aibă, ţi u-aştipta şi… easti ti nipistipseari !”
Tru alantu agiocu ditu Grupa E, Slovacia azvimsi Belgia cu 1-0, rezultatu cari fu nai ma marea supriză până tora tu Campionatlu European. Aşi că, ninti di etapa a daua, România easti pi protlu locu tru grupă. Viniri, la Düsseldorf, Slovacia va s’alumtă cu Ucraina, a deapoa sâmbătă, la Köln, tricolorllii va u andămusească tu agiocu Belghia.
Autoru: Florin Orban
Armănipsearea: Taşcu Lala
