Prota parti ali Team România, Paris
Nai ma marea parti ali Team România fudzi Paris, ta s-llia parti la Agiocurli Olimpiți
Tașcu Lala, 23.07.2024, 06:57
82 dit ațelli 107 sportivi ditu echipa olimpicâ ali Românie la XXXIII-a ediţie a Agiocurlor Olimpiți di vearâ agiumsirâ, duminicâ, Paris, cu unâ aeronavâ ți u ari di pțânu chiro numa „Nadia Comâneciˮ ca semnu di tiñie ti gimnasta românâ, a curi âlli si dzâți și „zeița di Montrealˮ. Azbuirarâ tu Frânţie/Galie loturli di canotaj, ânot, gimnasticâ artisticâ, tenis di masâ, polo pi apâ, box, ciclismu, scrimâ, yachting şi tir cu arcul.
Prezidenta ali Aghenţie Naţionalâ ti Sportu, canotoarea di ma ninti Elisabeta Lipâ: “Cara s-mi antribaț cându tricurâ aeșțâ trei añi nu ştiu s-vâ spun, ama mea că vini oara a vdzearillei, oara a anchisearillei ali delegaţie a Românillei la Agiocurli Olimpiți. Emoţiili sunt ca atumțea cându concuram. Sportivlli au tutâ andruparea a noastâ.”
Anda avionlu deadi di loc, Paris, ambasadoarea ali Românie tu Franţie/Galie, Ioana Bivolaru, lâ yinși dininti, iara sportivlli ş-antrenorlli apruchearâ acreditărli, dapoaia s-dusirâ la locurli iu va s-șadâ. Maș ânotâtorlu David Popovici ş-canotorlli șed nafoarâ di Hoara Olimpicâ.
David Popovici: “Easti ahântâ zori s-ti califiț la Agiocurli Olimpiți. Dirmi, tutâ lumea azburaști di performanţi, di medalii ş-achicâsim aestu lucru, ama easti unâ performanţâ ahât mari maș ta s-ti califiț aoa. Ş-vream s-filisescu aestâ arasti ta s-lâ dau hiritimari la tut ațelli ți suntu aoa. Iara, tu ligâturâ cu tuti aştiptărli ți li ari mass-media i oamiñilli di la noi – noi him sportivi ş-avem scupadz, nu nâ lom dupâ aştiptări. Tihi bunâ a nauâ ș-avem umutea că va v-aibâ hari!”.
Tu dzâlili ți yinu, va s-agiungâ Paris şi reprezentanţâlli ali României la canoe, atletismu, halteri, tenis, alumti, ghimnasticâ ritmicâ, judo şi triatlon. Prit sportivlli cu şansi mări la medalii easti şi Bernadette Szocs, agiucâtoari di tenis di masâ tu top 10 mondial: “Dedu s-adar ma bun dip tut ți șteam că nica lipseaști. Dedu tut. Hiu multu hârsitâ ș-pirifanâ ti tut ți adrai ta s-hiu etimâ ti Agiocurli Olimpiți. Tora, mizi așteptu s-ahurhescu s-dau tut și s-pot s-lliau medalia olimpicâ multu aştiptatâ.”
Sportivilli di Paris au borgea s-ducâ ma largu pirmithlu a protâllei medalie ți u lo România la Agiocurli Olimpiți, tu 1924, tut tu capitala ali Franţâ/Galie, dzâsi şi prezidentul a Comitetlui Olimpic şi Sportiv Român, Mihai Covaliu – „Nu pot s-nu minduescu că, aoa ș-100 di añi, tut Paris, dișcllisim aestâ cali cu unâ medalie di bâcâri, iara a nauâ nâ yini tora mșata misiuni ta s-duțem ma largu aestu pirmith ti anami, ta s-adrăm ma avutâ yișterea ali Românie cu ma multi medalii olimpiți și s-nâ hârsim di unâ ediţie a Agiocurlor Olimpiți di nai ma analtul livelˮ.
Agiocurli Olimpiți di Paris va s-ahurheascâ tu dzuua di 26 di alunar, iara preacllea di canotori Ionela şi Marius Cosmiuc, ți suntu ancurunaț, va s-poartâ hlambura ali Românie la țeremonia di dișcllideari. Compeția va s-bitiseascâ tu dzuua di 11 di augustu.
Autor: Leyla Cheamil
Apriduțearea: Mirela Sima-Biolan
