Cumu ahurheaști sculia?
Elevlli româñi s-toarnâ, luni, 9 di yizmâciuni, la cursuri.
Tașcu Lala, 08.09.2024, 13:57
Siguranţa tu sculii ş-misurli di prevenţie ti ñicurarea a cazurlor di prișcâvilli ş-ti dânâseara a consumlui di substanţi contra a nomlui armânu lucri di prota thesi ş-tu anlu ți ahurheaști stâmâna ți yini. Aesta easti declaraţia a ministrului a Educaţillei, Ligia Deca, ți fu faptâ ninti di ahurheara a năului an di sculie , luni, tu dzuua di 9 di yizmâciuñi. Tuţ elevlli va s-ahurheascâ sculia tu formatu fizicu, tamamu ș-ațelli ditu adârâmintili di anviţâmintu relocati, deadi asiguripseri ministrul a educaţillei.
Ligia Deca: „Aoa ș-unu anu, ninti s-hurhimu sculia, aveam anvârliga di 500 di sculii relocati di furnii di mirimeti i modernizari; anlu aestu avem cu 300 ma multu. Pi ninga furnia aesta, tu alti catastisi s-fați relocarea di itia a spaţiului multu ñicu. U amu dzâsâ, ama u dzâcu diznău, bași ș-tu aestâ catastisi, tuţ cilimeañilli s-ducu fizicu la sculie tu spaţii iu poati s-dizvârteascâ proțeslu educaţionalu. Avemu dzâsâ că ti noi nai ma multu angreacâ s-nu mata avemu sculii iu s-anveațâ di 3 ori tu dzuuâ. Nu mași că nu vremu ahtari lucru, ama ahurhindalui cu anlu ți yini 2025-2026 easti ș-contra a nomlui”.
Cu tuti aesti, tu vâsilie ari nica andauâ sculii iu s-anveațâ di 3 ori tu dzuuâ ș-armasirâ nica 70 di adârâminti di sculie cu haleadz ți nu suntu andrepțâ uidisitu cu nomurli. Unâ mari parti di eali va s-hibâ acâțati tu unâ apofasi di chivernisi ti finanţari, ți Ministerlu a Educaţillei va u anchiseascâ estanu. Maca elevlli va s-anveațâ mași unâ oarâ tu dzuuâ, va s-poatâ sâ s-facâ ș-activităț di turlie „sculie dupâ sculie”.
Pi di altâ parti, mași unâ sculie ditu trei lâ da, tora di oarâ, a fcioriloru ta s-mâcâ, unâ oarâ tu dzuuâ, ama ministrul a Educaţillei va ta s-tindâ aestu programu, ta s-poatâ tuț fciorilli s-hârseascâ di mâcari la sculie. Sculiili a curi fciori nu au noti buni la exameni vor andrupari, adâvgă ministrul a educaţillei, Ligia Deca. Ea lâ dzâsi a inspectorlor ghenerali di sculii că lipseaști s-hibâ adratâ ma bunâ moabetea anamisa di sculie și ațelli ți s-hârsescu di ahtari lucru, ta s-agiungâ ași informaţiili la elevi ş-la pârinţâ. Siguranţa tu adârâmintili di anvițari preuniversitarâ armâni ma largu unu lucru di prota thesi.
Ligia Deca: „Tu sculii va s-adarâ campanii, programi ş-acţiuni di preveniri a prișcâvillei tu mediul preuniversitar di sculie, a traficlui di oamiñi, cata cumu ș-a consumlui di droguri ş-di alâvdari a unui stilu di banâ sânâtos. Tutnâoarâ, stâmâna „Sculia altâ turlie” va s-aibâ tu prota thesi tema prevenirea şi scâdearea a prișcâvillei, a consumlui di droguri, alcool ş-tâtumi, pi ninga educaţia rutierâ”.
Cu ândauâ dzâli ninti di dișcllidearea a năului anu di sculie, executivlu vulusi criștearea a schemâllei di personal, ma multu ti posturli didactiți di predari. Ași, numirlu di posturi ditu anviţâmintul preuniversitaru criscu cu 7800.
Autoru: Ștefan Stoica
Apriduțeari: Mirela Biolan
