Filmu românescu durusitu cu nișeñi Veneţia
„Anlu nău ți nu s-feațiˮ, filmul di debut tu lungmetraj a regizorlui Bogdan Mureşanu, fu premiat Veneția
Tașcu Lala, 10.09.2024, 06:45
Filmul românescu „Anlu nău ți nu s-feațiˮ, regizat, anyrâpstiru ş-adratu di Bogdan Mureşanu, fu ahârdzitu cu premii/nișeñi la ediția di estanu a Festivallui Internaţional di Veneţia, ți s-bitisi sâmbătâ dicsearâ. Easti zborlu di Premiul FIPRESCI – ahârdzitu di juriul a Federaţillei Internaţionalâ a Critițlor di Filmu şi premiul Bisato d’Oro 2024 ti Nai ma bunlu scenariu, dat di critițlli independenţâ.
Filmul iasi tu migdani pritu regia ti anami, viziunea politicâ atentâ, pirmithlu sofisticatu ş-ți acațâ oclliulu, ziga artisticâ a tonurlor ş-a casting-lui ti miraki, tuti aesti lâ loarâ hari a membriloru a juriului FIPRESCI. Dupâ spusa a loru, lungmetrajul mutreaști ahândosu tabaietea a omlui, ți easti alâxitu di frica ta s-nu aibâ zñie di la reghimlu politic, fricâ ți u avurâ ma multi bârni ți bânarâ sumu unu reghimu sertu.
Tu arada a loru, critițlli independenţâ, ațelli ți deadirâ premiul Bisato d’Oro, minduescu că scenariul al Bogdan Mureşanu scoati tu padi cu multâ dukeari unâ hopâ di thimelliu ti istoria ali Românie, ți bagâ deadunu tu unâ turlie ti anami, „mira a nicântoru personaji ahoryea ș-vârtoasi, ama nâ da, tutnâoarâ, unu pirmithu emoţionantu ş-unu studiu unic a geanlui, unâ dealihea comedie umanâˮ. Anda fu aspusu filmul la festivalu, oamiñilli deadirâ pălñili ma multi minuti arada, nu s-dânâsea, tu unâ salâ amplinâ cu 1.400 di spectatori.
Filmul di debut tu lungmetraj a regizorlui Bogdan Mureşanu easti unâ tragicomedie a curi acţiuni s-dizvârteaști mași tu unâ dzuuâ, ninti di Ximutarea contra a comunismolui ditu meslu andreu 1989 ş-ari tu distribuţie, prit alțâ, pi Emilia Dobrin, Mihai Călin ş-Nicoleta Hâncu. Tu filmu s-veadi ș-ți s-avea faptâ cu-ndauâ dzâli ma ninti tu câsâbălu Timişoara.
„Adrămu filmi emu cu mirakea ascumtâ ta s-lu ariseascâ publiclu, emu ta s-lâ lomu hari ș-ațiloru ți anyrâpsescu di cinema. Unu ahtari premiu di simasie easti ti mini ma multu di unâ luyurseari bunâ a filmului. Easti unu semnu a dialoglui anaparti di sinuri. Nu-ari țiva ma ndzeanâ di aestaˮ, cundille regizorlu Bogdan Mureşanu.
Tutnâoarâ, Boroka Biro, directoarillei di imaghini a filmului „Anlu nău ți nu s-feațiˮ, fu ahârdzitâ cu unâ nișani ahoryea ti imaghini, Premio Autrici under 40 „Valentina Pediciniˮ. Nișanea pricunoaști doara a directoarillei di imaghini, ți ari sumu 40 di añi ș-ți adră unu lucru ti miraki tu regie, sțenariu, montaju, imaghini, tu unu filmu spusu la categoriili Orizzonti, Orizzonti Extra, Giornate degli Autori şi Settimana Internazionale della Critica. Boroka Biro easti prota directoari di imaghini ți llia aestu premiu, la patra ediţie, sum egida „Venezia a Napoli. Il Cinema Estesoˮ. „Anlu nău ți nu s-feațiˮ easti doilu lungmetraj di ficţiuni iu ea lucră ca directoru di imaghini.
Autor: Leyla Cheamil
Apriduțerea: Mirela Biolan
