Isăki pi scâdeari fapti di Banca Mondialâ

Banca Mondialâ și Fondul Monetar Internațional luyursescu unâ ayâliseari a criștearillei icunumicâ tu Românie tu anlu 2025.

Tașcu Lala, 29.04.2025, 07:07

Banca Mondialâ luyurseaști unâ ayâliseari a criștearillei tu icunumiili ți suntu tora pi cali di dezvoltari ditu reghiunea Ivropa ș-Asia Țentralâ la 2,5% tu iamea di kiro 2025-2026, di itia a câftarillei di nafoarâ cama slabâ, dupâ cumu dzâți ațelu ditu soni raportu. Tu 2024, criștearea tu tutâ naiaua s-dânâsi la 3,6%, andrupâtâ di hărgili privati și di crișterli vârtoasi a tiñiiloru di cathi mesu, ama ș-di criștearea a creditlor di hărgi, tuti aestea s-facu tu loclu a câftarillei di nafoarâ ma slabâ, di cara criștearea icunumicâ scâdzu tu UE. Crișterli a pâhadzloru la mâcari ș-la serviții dusirâ la unâ inflație cama mari, ți s-alină pânâ di 5%, tu meslu șcurtu 2025, di la 3,6%, la giumitatea a anlui și tricu. Criștearea di tora ali inflație li feați bănțâli țentrali s-alinâ ratili di politicâ monetarâ ică s-ayâliseascâ unâ crișteari suplimentarâ.

Tu ți mutreaști România, easti luyursitâ că va s-facâ unâ ayâliseari a criștearillei icunumicâ estanu, ți va s-agiungâ la 1,3%, di la 2,1% cât avea dzâsâ ma ninti BM. Easti daua nai ma slaba crișteari icunumicâ ditu tutâ reghiunea ali Ivropâ și Asia Țentralâ, mași Republica Moldova, cu un plus di 0,9% ditu PIB, easti ma-nghiosu di Românie.

Tu reghiuni, va s-aibâ crișteari icunumicâ ma mari Arusia (plus 1,4% ditu PIB), Vâryâria (plus 1,6%) și tamamu Ucraina, ațea ți easti dirinatâ di polimlu cu Moscova, cu un plus di crișteari icunumicâ di 2% ditu PIB. Campioñilli a criștearillei icunumicâ va s-hibâ ripublițli sovietiți ma ninti. Tu 2026, BM luyurseaști că România va s-aibâ treia nai ma slaba crișteari icunumicâ, di mași 1,9% ditu PIB, mași icunumiili ancllisi ditu Arusie și Belarus, dauâ vâsilii totalitari, ți suntu disimnati cu unâ crișteari ma ñicâ, di 1,2%. Ama, va s-hibâ antricutâ di Vâryârie (plus 2,1%) și Moldova (plus 2,4%), anda ti Ucraina s-așteaptâ unâ crișteari icunumicâ mari di 5,2%. Instituţia cundilleadzâ că, tu Românie, defițitlu bugetaru criscu la 8,6% ditu Produslu Internu Brutu di anu, di la 6,5% tu 2023, di sibepea a criștearillei a tiñiiloru di cathi mesu ditu sectorlu public.

Pi di altâ parti, și FMI adră luyurseri cama lăi ti criștearea ali icunumie româneascâ estanu, di la 3,3% câtu minduia tu sumedru 2024, pânâ di 1,6%, acâțândalui tu isapi catandisea di tora ditu lumi. Inflaţia va s-aibâ unâ alinari di mesi a pâhadzloru di 4,6% tu 2025 ş-di 3,1% tu 2026, dupâ unâ crișteari di 5,6% di anu. Tutnâoarâ, FMI luyurseaști că PIB-ul ali României easti la 1,6% tu 2025 ș-tâși anlu alantu va s-agiungâ la 2,8%. Instituţia finanțiarâ pruveadi unâ ayâliseari a defițitlui di contu curentu ali Românie, pânâ la 7,6% din PIB tu 2025 şi 7,4% ditu PIB tu 2026. Tu ți mutreaști rata a şomajlui, FMI luyurseaști că aesta va s-armânâ isa la un livel di 5,4% tu 2025 și va sâ scadâ niheamâ la 5,2% tu 2026.

Autor: Mihai Pelin
Apriduțearea: Mirela Biolan