Protlu mãnuclliu di apofasi fiscali

Premierlu Ilie Bolojan pãrãstisi protlu mãnuclliu di misuri fiscali pi cari executivlu va ta s’li apufuseascã.

Tașcu Lala, 03.07.2025, 20:01

Maş ascumta acãţati tu isapi tru kirolu a tutãloru turliiloru di alidzeri ditu 2024 și di anlu aestu, deapoa niheama cama cu boaţi dimãndati unã ş-unã dupu bitisearea a scrutinlui prezidențialu ditu meslu mai, misurli di sirţãlle a curi româñilli va s’lipseascã s’lã ţãnã keptulu nica di la 1 di agustu furã, neise, scoasi tu videalã, ñiercuri, tru conferință di presă, di premierlu liberalu Ilie Bolojan.

Furñia aluştoru apofasi cabaia nipopulari – unã xiki cabaia mari și piriclliulu ca, di itia aliştei, România s’hibã retrogradată di aghențiili di rating tru categoria ʹjunkʹ, dimecu nu ari cali dişcllisã ti investiții. Dimecu, trã economii la bugetu, va s’aibã dauă coti di TVA, criscuti dauli, di 11 şi di 21%. Taxă di 11% va s’hibã trã yitrii şi alimenti, serviţii publiţi di apă şi canalizari, apă trã adãpari, cărţã, leamni di focu şi energhie termică. HoReCa va s’armânã şi ea tut la 11%, nai ma pţãnu până tru sumedru. Ti alanti produsi, TVA va s’hibã di 21%.

Va s’creascã accizili cu 10% la alcool, combustibilu şi ţigări, cu spunearea maxutarcu că trã motorina/ nafta ufilisitã tru vãsilie di companiile di transport-persoane va s’aibã unã schemă financiară di compensari a creastirillei.

Tiñiili di cafi mesu şi pensiili ditu sistemlu publicu armânu plafonati nica şi tru anlu ţi yini. Seniorlli ţi au pensii cama di 3.000 di lei (s’clleamã aproapea 600 di euro) va s’aibã contributlu cu 10% la asigurărli di sănătati, la cari s’adavgã – spusi premierlu Ilie Bolojan – eliminarea a nãscãntoru excepții, aţea turlie cã numirlu a contribuabililor ditu sistemu s’crească di la 6 miliuñi ş-cama, câtu easti tora, la cama di 8 miliuñi.

Norma-a cadriloru didactiţi ditu nviţãmintulu preuniversitaru şi universitaru va s’creascã, aţea turlie cã statlu s’facă economii ditu pãradzlli ahãrdziţ ti atelli cari eara păltiț cu oara.

Va s’hibã alãxitã, tutunãoarã, turlia tru cari va s’hibã dati bursili şcolare.

Cama deapoa, di la 1 di yinaru anlu ţi yini, s-ari tu videalã criştearea a impozitlui pi dividendi di la 10 la 16% icã taxarea suplimentară a profiturloru a bănţãloru, cari au unu di nai ma buni randamenti a capitalurloru ditu aestă parte ali Europã.

Va s’hibã suprataxate și tuti amintatiţli ditu agiocurli cu tihea. Și aesta nu easti tutã! Premierlu Ilie Bolojan dimãndã că, până tu bitisita aluştui mesu nica va s’hibã apufusiti şi alti misuri ligati, neise, di ñicurarea a hãrgiloru şi reorganizări tru instituţiili și companiili di stat.

Tru aestu kiro, guvernulu di coaliție PNL-PSD-UDMR-USR spuni vrearea cã protili misuri fiscali dimãndati s’hibã apufusiti ntrãoarã, pritu giueapea ţi va u da tru Parlamentu.

Sindicatili li cutugursescu sertu și fac timbihi că eali va s’ducã la inflație și va sã scadã putearea di ancupărari. Iarapoi a Avocatlui a Popului ãlli si cãftã s’facã cãftari la Curtea Constituţională tru ligătură cu unã ordonanţă di urgenţă cari pruveadi tăllearea a nãscãntoru sporuri tru administraţia publică și, dimi, ñicurarea a tiñiiloru di cafi mesu.

Pi ningã tuti aestea, tru aproapea tută vãsilia s-dusi ninti dalga a protestilor ditu ma multi dumenii a sectorlui public. Şi sindicatili ditu educaţie dimãndarã cã va s’iasã pi geadei cu mutarea capu stămâna ţi yini, kiro tru cari studenţãlli u feaţirã nica di stãmãna ţi tricu. Ari cãbilea s’nkiseascã şi grevili.

Autoru: Roxana Vasile

Armãnipsearea: Taşcu Lala