Demisia a vițepremierlui Dragoş Anastasiu
Vițepremierlu Dragoş Anastasiu s-deadi âmpadi di pi scamnu ditu Chivernisea româneascâ, di cara inșirâ tu migdani niscânti lucri psefti ti firmili a lui.
Tașcu Lala, 29.07.2025, 22:58
Dupâ unu mesu ș-ândauâ dzâli di anda vini la puteari, chivernisea di coaliţie di Bucureşti, cumândâsitâ di liderlu liberal Ilie Bolojan, tradzi tora prota cripari: Dragoş Anastasiu, unlu ditu ațelli ținți vițepremieri, singurul fârâ background politicu, ți yini ditu mediul di emburlâki, dzâsi dumânicâ că s-da âmpadi di pi scamnu. Apofasea a lui s-fați di cara inși tu migdani, tu presâ, că unâ ditu firmili a lui fu mintitâ, ma ninti, tu unu dosaru di arușfeti. Aestu lucru s-avea bitisitâ tu 2023 cu condamnarea definitivâ ti luari di pâradz (ti mișteari) și trafic di influențâ ali unâ inspectoari a Fiscului.
Dupâ spusa alu Anastasiu, el şi soțlu a lui furâ di câbuli, la presiunea ali lucrâtoari di la Aghenţia Naţionalâ di Administrari Fiscalâ, sâ simneadzâ unu contractu fictiv, ți nu eara dealihea, pritu cari pâltea cathi measu câtrâ unâ suțietati numâsitâ di ea. Anastasiu dzâsi că firmili a lui di transportu furâ buni, fârâ lucri contra a nomlui la tuti controloalili a statlui, ama că aest lucru nu lu afiri di presiuni ditu partea a Fiscului. Aestu easti, taha, contextul tu cari fu di câbuli s-pâlteascâ ta sâ-și ascapâ emburlâkea ş-pi lucrâtorilli a lui, cundille Anastasiu. El nu dzâsi că adră ghini ți adră, ama dzâsi că firma a lui nu adră evaziuni fiscalâ.
Tutnâoarâ, dzâsi că statlu easti câbâtli di itia că nu easti unu partener ndreptu, bunu ti mediul di emburlâki. Anastasiu luyurseaști că easti ţinta a niscântor atacuri ankisiti di vrearea a chivernisillei ta s-alâxeascâ companiili di stat şi dzâți că apufusi s-da âmpadi di pi scamnu, ta s-nu aspargâ imaginea a chivernisillei şi mărlli scupadz a llei.
Dragoş Anastasiu: “Tu aestu climatu, mini vedu limbid că nu mata potu s-agiutu, că ițido lucru ți va-lu dzâcu i că ițido lucru ți va s-adaru, va s-arucâ ma largu urutâ efterii pi mini ti niscânti lucri ți nu suntu dipu dealihea. Aesta easti sibepea ti cari, zburândalui cu premierlu, âlli dzâșu că va s-adaru ma multu arău di iu s-adaru bunu ş-că vini oara s-fugu. Vgarea a mea ditu Chivernisea ali României nu va s-dzâcâ că reformeli nu lipseaști s-facâ ma largu”.
Dragoş Anastasiu âlli dzâsi a premierlui Ilie Bolojan s-cumândâseascâ elu ișiși pareia di lucru interministerialâ adratâ ti reformarea/alâxearea companiilor di stat, iara oamiñilli di afaceri ți vor s-agiutâ statlu tu aestu proțes s-nu u kearâ mirakea.
Dupâ demisia a coleganlui a lui di ma ninti ditu chivernisi, ministrul a finanțiloru, Alexandru Nazare, dzâsi că ANAF easti unâ instituţie disfuncţionalâ, iara abuzurli a llei nu suntu lucri năi. Nazare dzâsi că nu s-vidzu pânâ tora unâ miraki dealihea ti alâxearea a ANAF-lui, ta s-creascâ gradlu di colectari şi ta s-facâ digitalizarea a instituţillei.
Fu ananghi di demisia a vițepremierlui Dragoş Anastasiu ș-nu putea sâ s-facâ alliumtrea, iara reforma a companiilor di stat va s-ducâ ma largu, dzâsi Dominic Fritz, prezidentul USR, partie ditu coaliţia guvernamentalâ.
Purtâtorliu di zboru ali AUR (opoziţia naţionalistâ, suveranistâ), Dan Tânasâ, dzâți că cuvenda alu Anastasiu easti unâ turlie ti puvrii ti spuneari a câbatillei ş-unâ dukimâseari pseftâ di alâxeari a miștearillei tu unâ curbani şi ali arușfeti tu martiraj.
Autor: Florența Zaharescu
Apriduțearea: Tașcu Lala
