Moabețli mutrinda năili misuri fiscal – bugetari
Premierlu Ilie Bolojan zburâ cu reprezentanţâlli ali administraţie publicâ localâ ș-cu ațelli ditu suțatili di maghistraţ ti năili misuri fiscal-bugetari.
Tașcu Lala, 25.08.2025, 13:13
București dusirâ ninti moabețli ti misurli fiscali bâgati tu daua pachetâ ti scâdearea a exichillei di buget, ti cari Chivernisea ș-lo borgea tu Parlamentu pânâ tu inșita a meslui.
Premierlu Ilie Bolojan zburâ, aeri, cu reprezentanţâlli a suțatiloru di magistraţi ti reforma a pensiilor ditu aestu sistemu, ți fudzirâ, ama, anvirinaț dupâ andamusi ș-dzâcu că aesta nu avu hâiri. Ei suntu niifhâristâsiț că chivernisea s-toarnâ ti pensiili a giudicâtorilor ş-a procurorilor, dupâ ți, tu 2023, s-andâmusirâ cu ațelli ditu Comisia Europeanâ ti urnechea tu ți mutreaști isapea a pensiei ş-ti ilichia ti scuteari tu pensie, aşi că nu ari unâ dichi ți s-bagâ diznău tu moabeti aestâ problemâ.
Bogdan Pârlog, reprezentantul a Suțatâelli a Iniţiativâllei ti Giustiţie dzâsi: “Easti pânâ tu soni unâ diversiuni, unâ scuteari oclli ta sâ spunâ a minduitâllei publicâ că adarâ țiva. Tu averu, hărgili suțiali ti aspârdzearea a zigâllei din sistemlu giudițiaru ş-ațeali ți va s-aducâ aestâ zñie va s-hibâ pâltiti tutu di populu şi va s-hibâ multu ma mări.”
Ama premierlu Ilie Bolojan lâ pitricu proiectul di nomu ți va sâ scadâ pensiili a maghistraţlor și llia tu isapi niscânti lucri di averurli bugetari şi di ananghea sâ scadâ hărgili ti lucrarea a statlui. Scutearea tu pensie ti maghistraţ easti unâ misurâ ți va s-da calitati a servițiului public ti multu chiro ti sistemlu di giustiție, adâvgă el.
Tut luni, premierlu zburâ ș-cu reprezentanţâlli a Suțatâllei a Munițipiilor ditu Românie, niifhâristusiț di pruvuderli a Ordonanţâllei di Ananghi ți spuni curmarea a finanţărlor ditu Programlu „Anghel Saligny” şi PNRR ti proiectili ți au unu gradu ñicu di andridzeari i nica nu anchisirâ.
Ditu ațeali 30 di dâftări, mași unâ singurâ nu fu andreaptâ, dzâsi, dupâ moabeț, prezidentul a Suțatâllei a Munițipiilor ditu Românie, Lia Olguţa Vasilescu (PSD). Ea exiyisi că darea a pâradzloru ti primării va sâ spunâ raportul di numirlu a popului, ți va s-dzâcâ ți fu faptu dupâ isapi, gaireti ți s-feați tu chirolu a lângoarillei di covid, lucru ți nu easti cu dichi, dupâ cumu dzâcu unităţli administrativ-teritoriali, ți avurâ aesti aguderi.
Lia Olguţa Vasilescu: “Tuti proiectili, cari, tora, suntu tu stadiul di 30% va s-hibâ finanţati pritu PNRR. Ti alanti proiecti lipseaști ca aestâ ordonanţâ di ananghi s-aibâ unu memorandum cu asiguripsearea că, va s-apufiseascâ că eali pot s-hibâ bitisiti pânâ tu giumitatea a anlui ți yini, va s-aproachi pâradzlli di ananghi.”
Investiţiili ditu PNRR va s-ducâ ninti tu unâ turlie planificatâ, lâ pitricu zboru Ilie Bolojan a primarlor ți furâ la andamusi, spunândalui că proiectili ti cari nu va s-hibâ asiguripsitâ finanţarea pritu PNRR şi cari nu va s-hibâ bitisiti pânâ tu 31 di agustu 2026 va s-hibâ loati diznău ta s-hibâ andrupâti pritu alti programi finanțiari, a că va s-hibâ eali europeani, a pritu fonduri naţionali.
Autor: Mihai Pelin
Apriduțearea: Mirela Biolan
