XANA-ARMATUSEAREA, unã ananghi
București s’ţãnu Forumlu NATO trã Industria di Apãrari.
Tașcu Lala, 09.11.2025, 19:33
Secretarlu gheneralu ali Alianţã Nordu-Atlanticã, olandezlu Mark Rutte, şi prezidentulu românu Nicuşor Dan loarã parti la Forumlu NATO trã Industria di Apãrari, cari s’ţãnu tora ayoñea Bucureşti. Aţelli doi demnitari pitricurã mesaji salami ligatu cu ananghea ta s’creascã axia di apãrari a Alianţãllei, tru hãvaia politicã di tora, ama şi trã tindearea producţiillei tru dumenea militarã.
Nicuşor Dan lugurseaşti căţe xana-armãtusearea easti unã ananghi tru hãvaia di tora tru cari irinea şi securitatea numata suntu asiguripsiti. Caplu statlui cundille că industria românească di apãrari ari unã vãrtoasã adeti, acã nu fu acãţatã tu isapi tu añilli ditu soni, şi poati s’agiutã ti creastirea producţiillei industrialã di apãrari tru Europa. Un lucru clleaie ti asiguripsearea a unãllei discurajeari ţi s’hibã cu pistusini şi a unãllei apărari hãirlãticã easti tra s’lucrăm deadunu, s’adrãmu tu lucru deadunu echipamentili di cari forţãli armate aliate au ananghi, s’lucrãmu deadunu anamisa di stati, anamisa di guvernu şi mediulu privatu, trã unã industrie di apãrari cari agiutã inovaţia şi ufiliseaşti tehnologhiili emerghenti, cundille caplu a statlui.
Tu arada a lui, secretarlu gheneralu NATO lã dimãndã a reprezentanţãloru ditu industria di apãrari că akicãseaşti piriclliurli pi cari elli li cãnoscu şi cundille contractili pi lungu vade vulsiti di guverni. Tru minduita a lui, ari voli politică, ama şi finanţari di partea autorităţlor tra s’lndrupascã producţia, lucru ţi va s’aducã nu maş unã securitati ma mari, ama şi creaştiri económică şi ma multi locãri di lucru. Ari oportunităţ cabaia multi di emburlãki trã voi şi amintatiţi alithealui ti tutã lumea, adãvgã el. Dialoglu dişcllisu anamisa di NATO şi industrie easti di thimelliu tru contextul tru cari polimlu niprovocatu ali Moscovã contra ali Ucrainã easti un exemplu di fuvirseari. Piriclliulu cu Rusia nu va s’bitiseascã dinã cali cu polimlu. Va s’armânã ma largu furteaţã di mintireaji şi nu easti maş ea goalã, iarapoi alianţa lipseaşti s’hibã etimã ti unã ampuliseari pi lungu kiro, adãvgã Mark Rutte.
Tru contextul a vizitãllei faptã di secretarlu gheneralu NATO tu București, consilierlu prezidențialu Radu Burnete feaţi timbihi ali clasa politică și suţiitatillei: România lipseaşti s’hibã etimu ndreaptã s’alumtã și să-și modernizeadzã askerea și industria di apãrari. El lugurseaşti că unã capacitate militară vãrtoasã va’lli creascã a vãsiliillei libirtatea di cilãstãseari. Radu Burnete cundille că ‘unã industrie salami di apãrari ari şi multi hãirlãtiţi economiţi’. Consilierlu prezidenţialu aproaki că Rheinmetall apufusi s’adarã unã investiţie mari tru România. Aestã turlie, va s’hibã adratã nai modernă favrică di pulbiri trã bãruti ditu lume, după ţi Guvernul vulusi unã akicãseari cu babageanlu ghirmanu, unu di nai mãrlli producători di echipamente di apãrari ditu Europa. Investiţia di giumitati di miliardu di euro va s’hibã bãgatã tru lucru tru giudeţlu Braşov, iar România va s’agiungã un agiucãtoru di simasie tru industria di apãrari ditu sud-estul ali Europã.
Autoru: Mihai Pelin
Armãnipsearea: Taşcu Lala
