Pânâyirlu Gaudeamus, tu bitisitâ
Pânâyirlu di Carti Gaudeamus, andreptu di Radio România, şi-ancllisi porţâli dumânicâ dicsearâ.
Tașcu Lala, 27.12.2025, 12:03
Lucârli psefti ți s-feațirâ pi sțena politicâ inșirâ ma multu tu migdani andicra di mirachea ti culturâ a bucureşteñilor. Aşteptaţ, dumânicâ, sâ-şi aleagâ un nău dimarhu, mulţâ di elli cama multu vrurâ sâ s-ducâ la Pânâyirlu di Carti Gaudeamus, andreptu di Radio România. Easti un evenimentu adeti, chiola, vârtoasâ, ți agiumsi la 32-a ediție tu 36 di añi dupâ post-comunismul românescu. Presa culturalâ dzâți că fu un dealihea regal literar, pripus, estan, di ñiercuri pânâ dumânicâ, di cama di 180 di participanţâ, ți lâ deadirâ a dghivâsitorlor cama di 600 di evenimenti editoriali.
Uidisit cu un comunicat pitricut di organizatori, furâ reprezentati tuti editurli cu anami dit Românie, aghenţii di difuzari di carti româneascâ şi xeanâ, edituri universitari şi instituţii di anviţâmintu superior, distribuitori di muzicâ. Ași cum s-feați la ediţiili di ma ninti, unlu di spaţiili di evenimenti andreapti tu aestu pânâyir, ți u ari numa Ion Creangâ – clasic dit eta 19 a literaturillei ti ficiuriț -, lâ fu ahârdzit nai ma multu a tinirlor vizitatori.
Oaspiț di nota 10: Olimpițlli ali României easti proiectul prit cari Radio România şi partenerilli a llei recompensarâ și âlli scoasirâ tu migdani elevilli cari loarâ rezultati ti mirachi la olimpiadi internaţionali la len-turlen di disțiplini. Cartea “Haraua easti tu actul ți va s-yinâ”, anyrâpsitâ di actorlu Marius Manole şi tipusitâ di Editura Bookzone fu numâsitâ nai ma vruta carti. Tu ți mutreaști toplu a editurlor, pi protili trei locuri furâ, pi aradâ, Humanitas, Corint şi idyea Bookzone.
Premiul ti apriduțeari dit limba românâ tu unâ limbâ xeanâ âlli fu dat al Corneliu Popa, ti apriduțearea tu portughezâ a poemilor al Dinu Flămând, iara ti striduțearea dit unâ limbâ xeanâ tu mucâneaști fu premiatâ Luana Schidu, ți turnă dit anglicheaști volumlu „Xeñilli a Noşțâ. Pirmituseri”, anyrâpsit di Lydia Davis.
Prezidentul di tiñie ali ediţie, giurnalista, scriitoarea şi analista di politicâ di nafoarâ Sabina Fati, dzâsi că la standuri furâ scoasi tu padi volumi di turlie româneascâ a tâtâlor premianţâlor Nobel dit aeșțâ 15 di añi di ma nâpoi, tuti cărţâli premiati la mărli astrițeri literari dit Frânție şi dit Marea Britanie. Ea dzâsi nica că lumea ahurheaști s-dghivâseascâ tut ma multu non-fiction. “Aestâ pâzari di cărţâ istoriți şi politiți easti bunâ ș-cu turlii-turlii di lucri. Nu ştim cât poati ea s-agiungâ la duñeauâ, di cara, ași cum aspun xitâxerli di pânâ tora, mași 5% dit româñi ancupârâ cărţâ ş-nica ma pțâñi li dghivâsescu” – dzâsi Sabina Fati.
Ediţia Bucureşti 2025 a Pânyirlui bitisi, ași cum easti adetea, seria di evenimenti expoziţionali ti carti și educație andreapti di postul public di radiodifuziuni tu Craiova, Cluj-Napoca, Oradea, Buzău, Braşov, Sibiu şi Iaşi, câsâbadz iu s-dizvârti Cârvanea Gaudeamus Radio România, un proiect cultural pâltit di ministerlu a Culturillei.
Autor: Bogdan Matei
Apriduțearea: Mirela Biolan
