Protesti ti alâxearea ali giustiţie
Protestili andicra di catastisea dit giustiţia dit Românie s-tindi tu vâsilie.
Tașcu Lala, 27.12.2025, 23:36
Ñilli di oamiñi inșirâ pi geadei, dzâlili di ma nâpoi, București, ama ș-tu alțâ câsâbadz dit vâsilie – Arad, Cluj, Timișoara, Sibiu, Iași, Alba Iulia și Craiova – ti andruparea ali unâ giustiţie independentâ, di cara inși tu padi documentarlu adrat di publicația Recorder, tu ți mutreaști problemili dit giustiţie.
Protestatarilli caftâ demisia a prezidentâllei ali Analta Curti di Casaţie şi Giustiţie, Lia Savonea, şi a ministrului di Nuntru, Cătălin Predoiu, ministrul di ma ninti ali Giustiţiei. Uidisit cu spusa a niscântor magistraț, tu mandatlu a lui s-adrarâ tu 2022 nomurli ți deadirâ izini ta s-hibâ adratâ unâ structurâ piramidalâ dit giustiţie ți nu mata da giuiapi a vârnui.
Protestatarilli caftâ, tutnâoarâ, demisia a ministrului di tora ali Giustiţie, Radu Marinescu, ş-a procurorlui şef DNA, Marius Voineag. Caftâ alâxeri tu structura a sistemlui giudițiar și caftâ unâ nauâ mutreari a competenților a Consiliului Superior ali Magistraturâ, cata cum și scutearea pi cali leghislativâ a „porțâlor” ți da izini ti amânarea a proțesilor penali pânâ la prescripție.
Protestili suntu, dzâc manifestanțâlli, şi un semn di solidaritati cu giudicâtorilli şi procurorilli cari avurâ curai s-câtigurseascâ catastisea dit sistem. Ancheta giurnalisticâ Recorder „Giustiţia acâțatâ”, tipusitâ marțâ, scoati tu migdani abuzuri tu sistemlu giudițiar românescu.
Tipusearea ali anchetâ dusi la unâ ampârțari tu sistemlu di Giustiție, și s-vidzu unâ reacție preșcavâ dit partea ali prezidentâ ali Curti di Apel București, instituție ți easti sum cumândâsearea CSM, și, di partea alantâ, solidaritatea ti abuzurli scoasi tu padi tu documentar, aspusâ di un numir tut ma mari di magistraț dit vâsilie, ân cap cu Laura Codruța Kövesi, procurorlu șef a Parchetlui Ivropean.
Ma mulțâ procurori şi giudicâtori, niscânțâ cu identitatea ascumtâ, scoasirâ tu migdani turlia cum cumândusearea ali Curti di Apel Bucureşti alâxeaști giudicâtorilli dit completuri ta s-aibâ apofasi buni ti niscânțâ oamiñi ți suntu cu stepsu ti arușfeti. Secţia ti giudicâtori a Consiliului Superior ali Maghistraturâ deadi tu șteari că âlli câftă ali Inspecţie Giudițiarâ s-adarâ pusputeri tu ligâturâ cu aspecteli aspusi tu materiallu Recorder. Xitâxeri s-adarâ ş-di câtrâ secţia di procurori a CSM.
Pi di altâ parti, numirlu a oamiñilor ți simnarâ unâ petiţie scoasâ tu padi di comunitatea Declic şi Funky Citizens – ancllinatâ a şeflui a statlui şi a premierlui, prit cari s-caftâ alâxearea di ananghi a nomurlor ali giustiţie – adună chiola vârâ 170 di ñilli di simnâturi.
Premierlu Ilie Bolojan deadi tu șteari adrarea ali unâ parei di lucru guvernamentalâ cari va s-mutreascâ cu angâtan leghislaţia şi va s-pripunâ reformi.
Ilie Bolojan: „Easti ananghi s-mutrim cu angâtan leghislaţia, s-videm cât multu aestâ leghislaţie acațâ tu isapi realitatea, ahtari turlie că aspecteli ți țân di prescrierea a niscântor fapti s-hibâ tratati tu unâ turlie bunâ, iara chirolu di andridzeari a proțeslui s-hibâ șcurtatâ. Aspectili ți țân di delegări, di posibilitatea di minteri di nafoarâ ta s-lundzeascâ niscânti proțesi s-hibâ limbid reglementati.”
Prezidentul Nicușor Dan âlli câlisi maghistrațlli ți vor s-plângâ di problemi tu sistemlu di giustiție dit Românie pi unâ moabeti „fârâ s-acațâ tu isapi chirolu” tu 22 di andreu. Cându 200 di maghistraț dzâc că ari unâ cripari di integritati tu sistemlu di giustiție, lucrâli suntu dealihea slabi, dzâsi șeflu a statlui.
Autor: Daniela Budu
Apriduțearea: Mirela Biolan
