Mesajlu di Anlu Nău a Prezidentului ali României
Prezidentul ali Românie, Nicuşor Dan, dzâsi tu mesajlu di Anlu Nău, că tu 2026 easti di simasie cratlu român s-hibâ cama cu hâiri, ma corectu ş-cama aproapea di țetăţeañi, di cara 2025 fu un an cu duchimâseri, cu niisihii ș-cu întrebări ți lipseaști s-nâ li bâgăm, ama ș-un an a “arâvdarillei ş-a maturitatillei țivicâ”.
Tașcu Lala, 01.01.2026, 12:30
Prezidentul ali Românie, Nicuşor Dan, dzâsi tu mesajlu di Anlu Nău, că tu 2026 easti di simasie cratlu român s-hibâ cama cu hâiri, ma corectu ş-cama aproapea di țetăţeañi, di cara 2025 fu un an cu duchimâseri, cu niisihii ș-cu întrebări ți lipseaști s-nâ li bâgăm, ama ș-un an a “arâvdarillei ş-a maturitatillei țivicâ”.
“Tora, cându trițem tu năulu an, s-nâ dânâsim ti niheam di oarâ și s-mutrim cu limbidzari ş-cu onestitati em pi calea ți u tricum, em câtâ borgea a yinitorlui ți nâ aşteaptâ. Anlu 2025 fu un an a duchimâserilor, a niisihillei ș-a antribărilor di arada. Mulţâ româñi duchirâ presiunea a criștearillei a pâhălui a banâllei, frixea ligatâ di stabilitatea a locurlor di lucru ş-a lucrulor nisiyuri tu unâ lumi tut ma nisiyurâ. Aesti lucri suntu dealihea ș-nu putem s-nu li acâțăm tu isapi. Ama 2025 fu, tu idyiul chiro, un an a arâvdarillei ş-a maturitatillei țivicâ. Un an tu cari România ș-țânu axiili a llei dimocratiți şi borgili ivropeani ş-ivroatlantiți. Un an tu cari suțietatea a noastâ scoasi tu migdani că știe sâ scumbuseascâ și s-lucreadzâ, s-hibâ solidarâ şi sâ-și llea borgea atumțea cându easti ananghi”, dzâsi şeflu a cratlui, tu mesajlu di Anlu Nău.
Uidisit cu spusa a lui, 2026 nâ da arastea ta s-avem diznău pisti, s-andridzem ți nu fu ghini și s-adrăm deadun unâ Românie ma bunâ ș-cama vârtoasâ.
“Mutrindalui câtâ 2026, easti di simasie cratlu român s-hibâ cama cu hâiri, ma corectu ş-cama aproapea di țetăţeañi. Reforma, responsabilitatea ş-axia nu pot s-armânâ maș unâ minduitâ, ama lipseaști s-hibâ unâ borgi a cratlui ti ițido român. România ari un potenţial multu mari. Ta sâ scutem tu migdani aestu lucru lipseaști s-avem unâ minduitâ chino, unâ icunumie modernâ şi competitivâ, unâ administraţie hâirlâticâ, un sistem educaţional uidisit cu yinitorlu, un crat di ndreptu ți investeaşti tu sigurlâchea a lui ș-iu marea arușfeti nu poati s-facâ. Cu șcurti zboarâ: unâ vâsilie ți-și tiñiseaști țeţeñilli. Anlu Nău nâ da arastea s-avem diznău pisti, s-andridzem lucârli ți nu s-dusirâ ghini și s-adrăm deadun unâ Românie cama cu ndreptu ș-ma vârtoasâ. Calea nu va s-hibâ lișoarâ, ama hiu siyur că easti unâ cali ți putem s-u adrăm cu hâiri. Vâ or la tuț sânâtati, isihie ş-puteari ta s-mutriț cu umuti câtâ yinitor. Ti mulțâ añi a tâtâlor româñilor, iuțido s-hiț!”, dzâsi nica prezidentul ali Românie, Nicuşor Dan, tu mesajlu di Anlu Nău.
Autor: Eugen Cojocariu
Apriduțearea: Mirela Sima
