Reacţiili ditu România ti catandisea di Venezuela
Avemu nãdia cã Venezuela va s’hibã tru unã formulă di tranziţie tra s’agiungã tu un reghimu cu aprukeari democratică, spusi premierlu român.
Tașcu Lala, 04.01.2026, 02:37
Premierlu Ilie Bolojan spusi, sâmbătă, că România mutreaşti “cu ãngãtanu” catastisea ditu Venezuela, minduita a Bucureştiului ti aestu lucru di amprotusa va s’hibã tu simfunie cu minduita ali Uniuni Europeanã, şi ari nãdie cã va s’hibã aflatã unã formulă di tranziţie cătã un reghimu democratic tru aestă vãsilie a curi cumãnduseari nu fu pricãnãscutã di comunitatea internaţională şi niţi di România, dupu alidzerli di anlu ţi tricu ţi furã lugursiti cã furã furati.
România nu ari ambasadă tru Caracas, pţãñilli cetãţeani români ţi lli-avemu aclo suntu tru kivernisearea a reprezentanţãllei di la Uniunea Europeanã, adăvgã premierlu. El cundille că tu aestã oarã nu ari ti cetăţeañilli români cari s-aibă kindinu tu catandisea atacãllei faptã di SUA tru Venezuela.
Apofasea ta s’lu aducã pi Nicolas Maduro dinintea ali justiţie poati s’dãnãseascã sila ţi u avea loatã lãngoarea a traficlui di droguri, poati s’toarnã a venezueleañilor nãdia ti unu yinitoru bun tru prucukie, ama easti şi unã apofasi ţi nã aduţi la measa a muabeţloru diplomatiţi ta s’hibã spusi diznãu şi viglleati regulili internaţionale, spusi, sâmbătă, ministurlu ti Lucri Xeani, Oana Ţoiu.
Caplu ali diplomaţie românã cundille cã ari faptã muabeti cu partenerlli ditu Uniunea Europeană ti catandisea ditu Venezuela. Avemu ligãturi streasi cu partenerllii ditu Uniunea Europeană ti catandisea ditu Venezuela şi zburãmu adzã ti unã simfunie trã unã declaraţie comună tru arada a Consiliului Securitate ONU, adăvgã ministurlu.
Mutrimu cu ngãtanu catandisea ditu Venezuela, vãsilie iu bãneadzã unã ñicã ama di simasie, comunitati cu arădăţiñi româneşti. Lucãrlu di amprotusa easti sigurlãkea a cetăţeañilor româñi ditu aestă vãsilie. Misiuñili diplomatiţi şi consulari ali Românie ditu spaţlu ali Americã Latinã suntu hãzãri ta s’da asistenţă ma s’hibã ananghi deadunu cu misiunea permanentă ali UE, ngrãpsi Oana Ţoiu. Aesta cundille că fu nkisitu unu planu di hãbãriseari uni-alantu şi asistenţă consulară anamisa di vãsiliili membri UE.
Cãftãmu s’nu llia silã şi s’hibã cu responsabilitati autorităţli şi ndrupãmu sã s’facã cilãstãsearri ti turnarea la democraţie, un dezidiratu constantu spusu di cetăţeañilli venezueleni, adăvgã ministurlu trã Afaceri Externe. Oana Ţoiu adusi aminti că Uniunea Europeană apufusi, şi cu participarea ali Românie, tra s’bagã sancţiuni ma multi ori ti regimlu nidemocratic di Caracas, nica şi dupu dizvãrtearea ahãnda cu furlãki a alidzerloru prezidenţiale ditu alunaru 2024 şi că UE, nica şi România, nu-lu-pricãnãscurã Nicolas Maduro tu harea di prezidentu dupu nomu ti Venezuela.
Autoru: Eugen Cojocariu
Armãnipsearea: Taşcu Lala
