Comisarlu ivropean ti giustiţie, Bucureşti
Statlu di ndrept ditu Românie easti, diznău, sum lupa ali Comisie Ivropeanâ.
Tașcu Lala, 03.03.2026, 08:02
Comisarlu ivropean ti dimucraţie şi giustiţie, Michael McGrath, s-adună cu șefanlu ali chivernisi di Bucureşti, Ilie Bolojan, tu arada ali unâ misiuni tehnicâ mutrindalui anvârtușarea ali dimucraţie ş-a cratlui di ndreptu tu Românie. Pi aghenda a responsabilului comunitar furâ ș-moabeț ş-cu reprezentanţâ ali cumândâseari a sistemlui judiciar şi a parchetilor, cu magistraţ, cu organizaţii ali suțiitati țivilâ, cata cum ș-cu minişțârlli di Externi şi Giustiţie, Oana Ţoiu şi Radu Marinescu. Tuti aesti andamusi fac parti ditu proțeslu di andridzeari a Raportului di cathi anu ali Comisie Ivropeanâ tu ți mutreaști cratlu di ndreptu tu vâsiliili membri ali Uniuni.
Protlu-ministru Bolojan dzâsi că, dupâ ți fu alâsat nanâparti aşi-spuslu Mecanismu di Lucru Deadun şi Mutreari/Verificari, pritu cari Bruxelles-lu mutrea lucurlu ali giustiţie româneascâ, „atribuţiili a factorlui politic tu ți mutreaști cariera a magistraţlor furâ scâdzuti para multu, iara borgili mutrindalui bugetili şi promovărli furâ tricuti la structurli di cumândâseari a sistemlui judiciar”.
„Aesti alâxeri avurâ scupolu s-facâ ma vârtoasâ independenţa ali justiţie şi bâgarea diznău tu zigâ ali instituţie” – dzâsi nica premierlu. Nu putea s-nu zburascâ ti „reforma a pensiilor di servițiu şi duțearea ma largu cu hâiri a sistemlui, anda s-fac presiuni bugetari şi s-da jaloanili ditu PNRR, di cara s-vedu niscânti dyafurei/diferenţi mări anamsia di pensiili ditu giustiţie şi oamiñlli di arada”.
Tema aesta easti prota tu moabețli publiți ditu Românie, dupâ ți Curtea Constituţionalâ amână, di ținți ori, unâ apofasi mutrindalui proiectul di nom scosu ti migdani di chivernisi, ți dzâți că va sâ scadâ cuantumlu a pensiilor di cari s-hârsescu giudicâtorilli şi procurorilli, ta s-nu mata treacâ di aruga ți u llia anda lucreadzâ, şi va s-creascâ și ilikia di inșari tu pensie, ți tora easti 48-50 di añi. Ama România easti tu piriclliu s-kearâ 230 di miliuni di evradz ditu fonduri comunitari, di itia că nomlu a pensiilor a magistraţlor ti cari s-avea akicâsitâ cu Comisia Ivropeanâ ca jalon tu Planlu Naţional di Redresari şi Rezilienţâ (PNRR).
Comisarlu ivropean McGrath zburâ ti lucurlu deadunu dipriunâ a autorităţlor di Bucureşti tu arada a proțeslui mutrindalui statlu di ndreptu şi cundille simasia a dialogului constructiv anamisa di Comisia Ivropeanâ şi Chivernisea ali Românie. Comisia Ivuropeanâ, dzâsi el, easti di câbili s-andrupascâ România ma multu tu ți mutreaști asiguripsearea a investigarillei ş-a mutrearillei penalâ hâirlâticâ a infracţiunilor ditu sistemlu judiciar, garantarea a independenţâllei a procurorlor tu thesi analtâ şi limbidzarea a lucrâlor tu ți mutreaști reghimlu a prescripţiei. România şi Comisia Ivropeanâ va s-ducâ ma largu dialoglu ti anvârtușarea a sistemlui judiciar ta s-hibâ hâirlâticu, independentu ş-pistipsitu – tâxeaști un comunicat ufițial.
Autor: Bogdan Matei
Aprduțearea: Mirela Biolan
