Prezidentul ali Românie Nicușor Dan, tu studioulu Radio România Actualităț
Prezidentul ali Românie Nicușor Dan fu câlisitu tu unâ ediție ahoryea ali emisiuni „Problemi la zi” – “Cripări ți nâ dirinâ tora”, ân directu la Radio România Actualităț.
Tașcu Lala, 03.03.2026, 09:17
„Easti tu sinferlu ali Românie s-llea parti, tu thesea di observator, la Consiliul ti Irini. Lom parti la aestâ iniţiativâ, ți-și pripuni tora di oarâ s-bagâ tu zigâ unâ nai, Orientul di Mesi, ți easti di simasie tu icunumia globalâ“, dzâsi prezidentul Nicușor Dan dândalui apandisi la antribărli ali Alexandrâ Andon, realizator RRA.
„Prota-ki-prota, Carta şi calitatea di membru şi aesta easti unâ moabeti ți va s-facâ ma largu di cara aestâ organizaţie ari unâ cartâ ți u simnarâ chiola statili ți agiumsirâ membri şi tu aestâ cartâ ari pruvideri cari suntu tu contradicţie cu borgili internaţionali ți România şi li lo. Bunâoarâ, membrii aliștei organizaţii şi-pripun deadunu s-da sancţiuni. Ama România ari borgi andicra di Uniunea Ivropeanâ tu ți mutreaști sancţiunili ți poati s-âlli li da ali unâ vâsilie i a unlui operator icunumic. Ş-atumțea, siyura că him oamiñi di besâ, nu putem sâ simnăm ș-ași s-câlcăm unâ borgi țâ nâ u lom kiola“, dzâsi șefanlu a statlui la Radio România Actualităț.
„Dupâ ndauâ dzâli di moabeț cu partea americanâ, apufisim ți va s-dzâcâ s-hii observator la aestâ andamusi şi, dimi, pistipsim că easti tu sinferlu ali Românie s-lom parti ca observatori“, dzâsi prezidentul, aducândalui aminti că apofasili a Consiliului ti irini nu suntu contra cu România. Nicuşor Dan dzâsi nica că, la aestâ protâ andamusi, va sâ zburascâ maș di catastisea ditu enclava palestinianâ Cumata Gaza.
Tu ți mutreaști politica di nuntru, prezidentul Nicuşor Dan dzâsi că nu veadi furnii ti cari suțâllia di chivernisi di tora s-nu lucreadzâ ghini. „Ş-mini voi s-nu s-câtâyurseascâ liderilli a partidilor ditu suțâllie, moabețli s-hibâ cama cu hâiri, ș-ți s-pufisi s-armânâ pufisit. Dimi idyili lucri ți âlli cârtescu oamiñilli, mi cârtescu ș-mini. Pi di altâ parti, him ma ghini di cum nâ aștiptam s-him. România ş-țâni direcţia pro-ocțidentalâ, şi scâdzu exikea bugetarâ, nu mata ari gâilipseri ditu partea a investitorlor ş-a aghenţiilor di rating. Ari unu programu SAFE, ți easti consistentu. S-adrarâ niscânti jgllioati trâ ninti tu PNRR, s-adrarâ niscânti jgllioati trâ ninti ș-tu loarea a taxilor. Dimi lipseaști s-videmu ș-unâ ș-alantâ faţâ a lucrâlor“.
Tu arada a interviului, prezidentul Nicușor Dan dzâsi că tu meslu marțu va s-greascâ tu vâsilie la dzăț di ambasadori, ași că alâxerli va s-facâ dealihea cât cama ayoñea: „Va s-avem unâ alâxeari di simasie veara aesta. Ş-di cara vadelu di arada easti di 90 di dzâli di la oara a grearillei pânâ cându alâxerli s-fac, luyursescu că tu meslu marțu va s-avem 40-50 di griri ș-di numâsiri, tutnâaoarâ, ta s-poatâ s-facâ dealihea estanu, di vearâ“.
Autor: Licâ Manolache
Apriduțearea: Mirela Biolan
