Agiutoru internaţionalu tră România
Di ndauă dzăli, numirlu a cazurlor năi di COVID diagnosticati tru România easti tru scădeare, ama sistemlu sanitar armâni sumu ună presiune babageană. Spitalele suntu ma largu mpline, la terapie intensivă numata ari niţi unu apatu libiru, iara yeatărlli ţănu keptu dinintea a dalgăllei multu mari di căftări. Tru aesti condiţii, România ma largu pitricu pacienţă tru catandisi greauă tru alti stati europene cari spusiră vrearea tră yitripseari. Niercuri, nica 6 lăndzidz pi hală greauă dusiră tru Germania, tru treilu şi aţelu ditu soni transferu cătră aestă văsilie. Selecţia a pacienţălor fu realizată di ună echipă adrată ditu yeatră germani cari di vinirea tricută viniră tru România şi analizară catandisea-a lăndzidzloru.
Corina Cristea, 04.11.2021, 20:06
Di ndauă dzăli, numirlu a cazurlor năi di COVID diagnosticati tru România easti tru scădeare, ama sistemlu sanitar armâni sumu ună presiune babageană. Spitalele suntu ma largu mpline, la terapie intensivă numata ari niţi unu apatu libiru, iara yeatărlli ţănu keptu dinintea a dalgăllei multu mari di căftări. Tru aesti condiţii, România ma largu pitricu pacienţă tru catandisi greauă tru alti stati europene cari spusiră vrearea tră yitripseari. Niercuri, nica 6 lăndzidz pi hală greauă dusiră tru Germania, tru treilu şi aţelu ditu soni transferu cătră aestă văsilie. Selecţia a pacienţălor fu realizată di ună echipă adrată ditu yeatră germani cari di vinirea tricută viniră tru România şi analizară catandisea-a lăndzidzloru.
Șeflu a Departamentului tră Situaţii di Urgenţă, Raed Arafat: “Noi avumu 18 di locuri tru Germania, cari, tora, tuti suntu acăţati şi, cadealihea, aesta nă eliberă locuri inclusiv tru născănti secţii di Terapie Intensivă. Yinu nica dauă-trei stămâni di presiune pi sistemlu sanitar şi, ti amărtie, un numiru mari di morţă, tră atea că easti nica un numiru mari di pacienţă tru catandisi multu critică tru spitali. Soţlli germani cându dusiră şi verificară ţi pacienţă va s’llia, nu eara lişoru s’aflămu pacienţă cari s’poată s’hibă di căuli tră transferu. Ari căbili s’nidzemu ma largu cu transferurile şi cătră Polonia şi cătră Cehia.”
Ungaria viţină easti ună altă văsilie, prima pănu tru soni, cari apruke paciență ditu România. Cama di 70 di persoane fură pitricuti până tora tru spitali ditu xinătati, iara, cu tuti gaereţli, aproapea unu cirecu ditu arada-a loru muriră. Nivelu multu analtu a morţăloru asociate infectarillei cu SARS-CoV-2 – di ordinlu a sutilor tru cathi dzuuă – easti, dimi, atea ţi găilipseaşti nai cama multu tru aestă dalgă patru a epidemiillei ditu România. Situaţia greauă feaţi că ma multi văsilii s’yină tru agiutor, ntră cari și Israelulu. Miercuri, România apruke dzati concentratoare di oxigen ditu partea aliştei ceastii văsilii — protili ditu ună tranşă di 40. David Saranga, ambasadorlu a statlui Israel tru România “România easti unu cadealihea soţu a Israelui. Și, ditu aestă itie, statlu Israel apufusi s’agiută ună văsilie soaţă. Ti amărtie, România treaţi pritu ună perioadă greauă di itia a pandemiillei şi ari ananghi di agiutoru. Și tră aesta himu noi aoa. Statlu Israel faţi aestă donaţie di 40 di concentratoari di oxigen cari va s’agiută la tratamentu. Nu easti lişor ta s’aflli concentratoari di oxigen tu dzălile aeastea.”
Agiutor vini ditu partea altiloru văsilii și sumu turlie di yitrii. Ică echipe di cadre medicale cari ansăriră tru agiutorul a colegilor români, ași cum easti cazlu la spitalu modular ditu estul a văsiliillei, aproapea di Iași, iu yeatră, asistente și paramedici ditu Republica Moldova trateadză paciență deadunu cu cadrili medicale ditu România.
Autoru: Corina Cristea
Armânipsearea: Taşcu Lala
