Discuţii diplomatiţi româno – americani
Eugen Coroianu, 31.03.2021, 14:19
România ma largu va s’hibă un parteneru strateghicu vărtosu shi di pistipseari a Statilor Uniti, ama şi un soţu NATO ascumbusitu, deadi asiguripseri, marță, ministurlu ti lucre xeani, Bogdan Aurescu, tu ună muabeti ţi u avu pritu tilefunu cu omologlu a lui american Antony Blinken. Di Washington, năulu secretaru di statu u alăvdă România că easti un membru NATO rvărtosu şi tră angajamentul andicra di anvărtuşearea a securitatillei tu regiunea ali Amarea Lae. Fu cundilleată, tru arada-a moeabetillei, simasia-a coordonarillei cu partenerlli cari ambărţiteadză idyili valori şi priorităţ strateghiţi, cum şi ananghea ti promovarea-a democraţiillei şi a statlui di dreptu, nica şi pritu anvărtuşeari rezilienţa strateghică pi nivel internaţionalu, să spuni tu unu comunicat MAE di București.
Aţelli doi diplomaț tricură pi arada şi dizvoltărli nu di multu kiro ditu ligătura bilatearală tru domenii strateghiţi, nica spusiră şi sinferlu ti băgarea tu practico iniţiativili mutrinda anvărtuşearea-a securitatillei energhetiţi. Tru contextu, fu acăţată tu moeabeti coopeararea bilatearală ţi easti tu mplină dizvultari tru domeniulu nuclear ţivilu şi gaereţli di diversificari a izvurloru di aprovizionari cu gaz tru Europa, hiinda yilipsită simasia-a izvuriloru strateghiţi di gaz ditu platoulu continental ali Amarea Lae.
Antony Blinken scoasi tu migdani haristusearea ali SUA ti progresili ţi li feaţi România tru aţea ţi mutreaşti statlu di dreptu, reforma ali justiţie şi combaterea ali aruşfeti, di mari simasie şi tu planu reghionalu. El cundille că aesti meatri agiută pănu di mardzină ti thimilliusearea-a unlui medi di emburlăchi şi investiţionalu atractiv tră partenerlli economiţ americani, scuţănda tu videală că dizvoltarea a ligăturăllei economiţi cu România armâne ună prioritate. Di altă parti, ama, raportul pi 2020 a Departamentului di Stat, aleptu di corespondentul Radio România la Washington, faţi timbihi, ntră altili, că tru văsilia a noastră ari ună aruşfeti cabaia arăspândită la nivelu ufiţialu. Raportul nica spuni că sistemlu judiciar lo meatri tră condamnari şi tră sancţionari ufiţiali cari feaţiră ilegalităţ, ama autorităţli nu avură mecanismi hăirlătiţi ti b4gari tu practico pideapsili şi amânară proţedurli ligate di abuzuri ali poliţie şi fapte di aruşfeti, lucru ţi dusi tu multi cazuri la achitări.
Na turnămu la moeabetea telefonică, ta să spunemu că șeflu ali diplomaţie di Bucureşti cundille ti implicarea financiară a SUA tră realizarea a născăntoru proiecti ditu România, cundillindalui că, pi ningă ună prezenţă militară criscută a SUA tru văsilia-a noastră și tru reghiune, easti ananghi şi anvărtuşearea prezenţăllei economiţi şi di investiţii. Tutunăoară, el scoasi tu migdani sinferlu ti intrareantrăoară tu programlu Visa Waiver şi tră ahăndusearea-a cooperarillei tră combaterea a născăntoru fenomeni cu impact negativ, cata cumu traficlu di persoane. Minișţărlli di externi zburără şi tră umplearea dzaţi añi di la băgarea tru lucru a Acordului mutrinda amplasarea a sistemlui di apărari contra a rachetelor balistiţi a Statelor Unite tru România, cum şi ţinţi añi di la opearaţionalizarea facilitatillei anti-rachetă di Diveselu.
Autor: Eugen Coroianu
Armânipsearea: Taşcu Lala
