Exikea bugetarâ și pâradzlli ivropeañi
România lipseaști s-llia cușia misuri di scâdeari a hărgiloru, di cara ari unu piriclliu di curmari a fondurloru ivropeani – dzâcu autoritâțli di București.
Tașcu Lala, 07.10.2025, 18:25
Premierlu Ilie Bolojan luyurseaști că exikea bugetarâ ali Românie nu va sâ scadâ estanu sum 8%, dimi va s-armânâ ma largu multu mari, cu tuti misurli di sârțâlli ți furâ apufisiti ahurhiindalu cu meslu cirișaru ș-pânâ tora. Anlu ți yini, exikea bugetarâ lipseaști s-agiungâ anvârliga di 6 proțenti. Pânâ atumțea, România lipseaști s-llia ayoñia misuri di scâdeari a hărgiloru, di cara ari unu piriclliu, pi ninga alti piriclliuri, ta s-hibâ curmati fondurli ivropeani. Pi di altâ parti, ufițialli ivropeñi deadirâ ș-unu vade pânâ cându autoritățli di București lipseaști s-aspunâ că aestu indicator, zbor ți lu au tuț-n gurâ, u lo tora hima-nghiosu: 15 di sumedru.
Şeflu a executivlui exikisi, tu unu interviu la TV, că România lipseaști s-aibâ unâ disțiplinâ fiscalâ, s-nu mata arucâ pâradz pi vimtu și s-adarâ condiţii ti dezvoltarea ş-andrupara ali icunumie. Tuti aesti lucri va s-hibâ zburâti luni, Bruxelles, di Ilie Bolojan cu Valdis Dombrovskis, comisarlu ivrupeanu ali icunumie. A lui va-lli si da asiguripseri că România easti unu soț di pistusini ş-di besâ ți va ș-tiñiseascâ borgili ți ș-li lo, dzâsi premierlu:
ʺLipseaști s-andridzemu lucârli ți ţân di exikea bugetarâ ş-di misurli ți România li lo, ta s-himu unâ vâsilie pi cari alanțâ potu s-aibâ pisti și s-nu mata himu tu catastisea di curmari a fondurlor ivropeani. Aestu lucru easti unu elementu di simasie ş-ti elu zburâ ș-pareia di la ministerlu di Finanţi cu pareia di Finanţi ali Comisie Ivropeanâ. Nâ andridzemu s-adrămu alâxeri di buget stâmâna ți yini şi lipseaști s-andridzemu lucârli, ta s-putemu s-asiguripsimu pâltearea și s-adrămu ma largu investiţiili.ʺ
Tut Bruxelles, premierlu va sâ zburascâ ș-cu Andrius Kubilius, comisarlu ti Apârari, di programlu ivropeanu SAFE, pritu cari România va s-aproaki unu creditu di 16 miliardi di ivradz, pâradz cari va u agiutâ s-u șânâ tu zigâ exikea bugetarâ, sâ-și creascâ industria di apârari şi s-bitiseascâ investiţiili tu infrastructura militarâ şi țivilâ di urdinari. Moabeti di simasie va s-facâ tutu luni anamisa di premierlu Ilie Bolojan ș-comisarlu ivropeanu ti Ndrepturi suțiali şi axii, co-naționala Roxana Mînzatu, iu va sâ zburascâ di poziţia ali Românie la cuvendzâli ti yinitorlu buget ditu ma mulțâ añi ali Uniuni Ivropeanâ.
Ilie Bolojan: ʺSumili ți li ari România şi turlia cum s-andreg eali ș-cumu suntu dati, ți armâni ti politica agricolâ, ți armâni ti coeziuni – s-li akicâsimu câtu cama ghini și s-putemu s-avemu unâ pâzârâpseari câtu cama bunâ ş-ti vâsilia a noastâ… aestea suntu elementi di simasie ş-lipseaști s-u avemu mintea la eali.ʺ
Bitisita aluștui mesu ş-ahurhita a meslui ți yini suntu mutlu acâțati, cu multi lucri ti alâxeari, cu exiki, cu Comisii – dzâsi Ilie Bolojan.
Autor: Roxana Vasile
Apriduțearea: Mirela Biolan
