Imunitati colectivă tru UE?
Mihai Pelin, 22.03.2021, 16:33
Vacţinarea anti-covid s-duţi ma largu tru Europa. Comisia Europeană vulusi, până tu aestă oară, contracti până di 2,6 miliardi di dozi și păzărăpseaşti ancupărarea alti ahtări suplimentari. Darea-loarea di vacţinuri ti văsiliili ditu UE criscu constantu tu kirolu ditu soni, a deapoa vacţinarea acaţă ună cali iruşi. Aestă turlie, dimecu, giumitati ditu populaţia adultă ali Mari Britanie apruke, pănă tora, ună protă doză a vacţinlui contra a COVID-19. Di altă parti, Comisia nkisi activităţ cari s-ndrupască dizvultarea și producția rapidă și tru measă a născăntoru vacţinuri hăirlătiţi contra a năilor varianti di coronavirus. Nica ş-ma multu, UE caftă să s-asiguripsească că aesti agiungu tru tuţ chiuşeadzlli a lumillei.
Tu aestu contextu, comisarlu european tră păzarea internă, Thierry Breton, declară că ari căbili că tru Europa să s-agiungă la imunitatea colectivă tu 14 di alunaru şi scoasi tu migdani criştearea preconizată a livrărloru di vacţinuri. ”Aestă easti aţea ditu soni linie ndreaptă, căţe ştimu că, tra s-azvindzemu aestă pandemie, ari maş ună goală cearei: s-ti vaccinedz. Vacţinurli yinu, va s-agiungă”, spusi ufiţialu europeanu. Comisarlu tră piaţa internă cundille că, anamisa di meşlli marţu şi cirişaru, va s-hibă dati anamisa di 300 şi 350 miliuñi di dozi di vacţinu. El cundille criştearea-a livrărlor tru Europa, cu 60 di miliuñi di dozi ţi eara dati tu meslu marţu, 100 di miliuñi tru apriiuru şi 120 miliuñi tu meslu mai. Uidisitu cu spusa al năsu, vacţinurli suntu fabricati, tora, tru 55 di făvriţ ditu Europa.
Tutunăoară, Thierry Breton să spusi cu nădie tu ţi mutreaşti tiñisearea-a programlui european di vacţinare tră protlu trimestru. Acă, tu aestu kiro, suntu problemi cu niscănti livrări, nu va s-aibă amănări tu ţi mutreaşti vacţinarea, deadi năsu asiguripseri. Comisarlu european tră piaţa internă nica dimăndă şi aţea că autorităţli di Bruxelles au tu planu băgarea tu lucru a unlui ţertificatu sanitaru, tră licşurarea a urdinarillei tru UE tu kirolu a sezonlui estivalu.
Documentul easti tu planu ta s-hibă hăzări la 1 di cirişaru și va s-hibă tru formatu electronic ică tipusitu. El va s-hibă adratu tu limba a cathi unăllei văsilie şi apridusu tru limba engleză. Cu ună ahtari dovadă, ună persoană vacţinată anti-COVID-19 tru unu cratu membru va s-hibă pricunuscută şi tru ună altă văsilie a UE ca imunizată. Acă Comisia Europeană bagă zori că documentul va ta s-hibă un ţertificat di vacţinari şi nu un paşaportu di vacţinari, scupolu a lui easti, ama, ti licşurari urdinărli anamisa di văsiliili ali UE şi cu căbili ti nafoara-a bloclui comunitar.
Tertificatlu va să spună desi ună persoană fu testată negativ la COVID-19, s-vindică tora ma ninti di aestă lăngoari ică dizvultă anticorpi, ică fu vacţinată contra-a năului coronavirus. Cu tuti aestea, toradioară nu easti limbidu desi şi cându poati s-hibă ufilisită paşaporta di vacţinari tră populaţia ghenerală. Tra s-poată s-hibă băgată tu practico, pripunirea ali Comisie lipseaşti s-hibă aprobată di statili ditu UE, ama şi di Parlamentul European.
Autor: Mihai Pelin
Armânipsearea: Taşcu Lala
