Misuri tră stimularea-a vaccinarillei
Ştefan Stoica, 31.08.2021, 19:57
Pţănu pisti 5 miliuñi di româñi, dimi maş unu cirecu ditu populaţie, s-vaccinară complet contra Sars-Cov-2 di la ahurhita-a campaniillei naţională di imunizari, tru andreu anlu ţi tricu. Easti pţănu, pricunoscu guvernanţălli, a curi campanii ţi au scupolu s’promoveadză hăirlătica-a vaccinarillei suntu alargu ta s’agiungă la scupadzlli pripuşi. Easti pţănu, spunu găilipsiţ yeaţărlli şi specialiştilli, anda ş’aducu aminti, tu ahurhita di dalgă patru, di problemili pi cari treia dalgă a pandemiillei li adusi tru sistemlu medicalu. Infectărli di cafi dzuuă suntu pi unu cursu ascendentu, iara autorităţli au nădie că pritu năili misuri, protili cari da recompensi materiale, s’crească vrearea a românilor tră vaccinari. Executivlu vulusi, luni, ordonanţa ţi pruveadi ună alocaţie di hrană tru valoari di ună sută di lei (pţănu pisti 20 euro) tră persoanili cari s’imunizeadză complet di aoa ş’ninti. Ma multu va s’hibă ndreaptă şi ună loterie, cu premii tru păradz, tră tuti persoanili cari s-imunizară până tora.
Ministurlu a Sănătatillei, Ioana Mihăilă: “Di anda Ordonanţa di Urgenţă easti publicată tru Monitorlu Oficial persoanele cari s’vaccineadză cu schemă completă va s’aibă hăiri pritu bonuri di masă. Va s’poată s’llia aesti bonuri di masă di la ţentrul la cari s-vaccinară, atumţea cându eale va s’hibă disponibili. Ca ună misură suplimentară di recompensare a tutuloru persoanilor cari fură vaccinati contra-a COVID-19 s-pripusi tutunăoară organizarea-a loteriillei di vaccinari, loterie cari da premii tru păradz ti persoanili vaccinati cu schemă completă di vaccinari”.
Premierlu Florin Cîţu cundille, diznău, tru favoarea-a vaccinarillei. El spuni că personalu cari lucreadză tru sistemlu bugetar lipseaşti s’aleagă anamisa di imunizare, cari easti fără pălteari, şi testarea periodică obligatorie pi hargea a omlui işiş. Florin Cîţu: “Io minduescu că easti importantu, maxusu avânda tu videală şi numirlu di persoani infectati tru atea ditu soni perioadă, s’minduimu salami vaccinarea, easti goala cearei. U spuşu, tră personalu cari lucreadză tră stat şi tră agenţiili di stat, MApN, MAI, Nviţământu, Sănătati, u spuşu minduita a mea, că lipseaşti s’hibă ică vaccinati, ică testati cafi stămănă. Tora, cadealihea, ministerili respectivi lipseaşti s’yină cu pripuniri, s’videmu cari suntu ceareili”. Di altă parti, corpul di controlu a prim-ministrului va s’verifică catandisea ligată di aţeali ndauă suti di certificati false di vaccinari ţi işiră tru migdani haristusită a unei investigaţie jurnalistică. Fură pitricuti la Poliţie cama di 370 di sesizări tu ligătură cu autenticitatea a născăntoru certificate di vaccinari suspecti.
Autoru: Stefan Stoica
Aemânipsearea: Taşcu Lala
