Summit ivropean Bruxelles
Bloclu comunitar acațâ tu isapi unâ nauâ andrupari finanțiarâ ti Ucraina.
Tașcu Lala, 26.10.2025, 04:58
Liderilli a vâsiliiloru membri a bloclui comunitar s-adunarâ, Bruxelles, tu arada a Consiliului Ivropean, iu zburârâ di competitivitatea ali icunumie ivropeanâ, digitalizari, fâțearea unâ ali pâzari di capital, ama și di proiectili kino di apârari, iu angricarâ ma multu pi partea di câtâ apiritâ. Tutnâoarâ, liderilli âlli câftarâ ali Comisie Ivropeanâ s-mutreascâ, pânâ la alantâ andamusi ditu meslu andreu, cearei di finanţari ali Ucrainâ tu aeșțâ doi añi ți va s-yinâ, alâsândalui dișcllisâ posibilitatea di apufisieari a unlui âmprumut thimilliusit pi activili aruseşțâ angllițati.
Activili ali Bancâ Țentralâ ali Arusie tu Uniunea Ivropeanâ furâ angllițati dupâ sancţiunili bâgati di ocțidentali di cara Arusia aputursi Ucraina tu meslu șcurtu 2022. Aestea suntu di vârâ 210 miliardi di evradz. Confiscarea aluștoru activi easti unu bâirușu aroșu ti vâsiliili ali Uniuni Ivropeanâ, ama Comisia pripuni, pi thimellu a lor, s-da pâradz cu âmprumut di 140 di miliardi di evradz ti Kiev.
Uidisitu cu spusa a unlui diplomat, ma multi alti vâsilii freadzirâ costi anda avdzârâ di ahtari pripuniri. Prezidentul frâncu, Emmanuel Macron, dzâsi că aestâ culai ari problemi juridiți, problemi di ampârțari a riscurilor. Tutnâoarâ, elu cundille că aesta armâni nai ma cu umuti cali ta s-agiutâ cu pâradz Ucraina tu añilli ți yinu. „Arusia lipseaști sâ-și aducâ aminti aestu lucru: Ucraina va s-aibâ resursili finanțiari di cari ari ananghi ta s-apărâ contra ali preșcăville aruseascâˮ, dzâsi tu arada a lui prezidentul a Consiliului ali Uniuni Ivropeanâ, Antonio Costa.
Prezidentul ucrainean, Volodimir Zelenski ți fu Bruxelles ti unâ parti a moabețloru, âlli angâsâi liderilli s-adarâ unâ jgllioatâ ți s-apufiseascâ ți va s-adarâ cu activili ali bancâ țentralâ aruseascâ. Elu dzâsi că avu „rezultati buniˮ la aestu summit, că putu s-aibâ „unâ andrupari politicâˮ pi aestâ temâ.
Bruxelles, ivropeañilli zburârâ ș-ti sectorlu petrolier arusescu ș-deadirâ hâbarea, ñiercuri dicsearâ, că va s-facâ unâ nauâ rundâ di sancţiuni contra ali Moscovâ, 9-a ditu meslu șcurtu 2022. Aesta va s-aibâ ș-unâ dânâseari acutotalui a importurlor di gaz natural lichefiat (GNL) arusescu pânâ tu bitisita a anlui ți yini şi misuri suplimentari contra a flotâllei fantomâ di petrolieri ți Moscova u filiseaști ta s-ascapâ di sancţiunili ocțidentali. Tutnâoarâ, Uniunea Ivropeanâ, apufusi s-ângârdeascâ minarea a diplomaţlor aruşi anamisa di vâsiliii a bloclui comunitar ş-pidipsi 45 di năi companii ți u agiutâ Arusia ta s-ascapâ di sancţiuni, bași 12 ditu China, trei ditu India ş-dauâ ditu Thailanda.
Prezidentul Nicuşor Dan ți fu la andamusea a Consiliului Ivropean di Bruxelles, dzâsi că România acţionă arada di vâsiliili ditu Uniunea Ivropeanâ tu ți mutreaști sancţiunili contra ali Arusie. „Și Bucureștiul fu sinfunu cu aestâ pachetâ di sancţiuni şi minduescu că ș-tu kirolu ți va s-yinâ, va s-adarâ idyea. Totna anda zburășțâ di sancţiuni, zburășțâ ș-di efecteli colaterali ți aesti sancţiuni li ari pi părţâ ditu industria a ta i ali industrie ditu suțatâ”, cundille prezidentulu Nicușor Dan.
Autor: Leyla Cheamil
Apriduțearea: Mirela Biolan
