Summit NATO tu Ankara
Ankara, tu Turchie, s-dizvârtescu lucrărli a Summit-lui NATO, ti cari secretarlu gheneral ali Alianţâ, Mark Rutte, dzâsi că “ari axia s-alâxeascâ lucârli”
Tașcu Lala, 11.08.2026, 23:06
„România cu Canada au deadun unâ suțatâ streasâ, ți tut creaști, thimil’usitâ pi axii chino ș-pi borgea ți ș-u loarâ ta s-li apărâ. Him apufâsiț s-duțem ma largu tuti proiectili di sinfer chino, tu dumeni cl’eai ti sicuritatea și apârarea, eneryia nuclearâ, icunumia ș-lucurlu deadun tu industrie.” Easti hâbarea bâgatâ pi singirlu di suțializari X di câpia a cratlui românescu, Nicuşor Dan, dupu andamusea di luni, di București, cu ministrul canadian a Emburlâchil’ei di Nafoarâ, Anita Anand, a curi-l’i hâristusi ti borgea ți ș-u lo ta s-andrupascâ Partea di Apiritâ a NATO ș-ti lucurlu adrat ti deminarea ali Amari Lai.
Ma ninti, ufițiallu a cratlui canadian azburâ cu ministrul ti șcurtu chiro a Emburlâchil’ei di Nafoarâ, Oana Ţoiu, și di temili di pi aghenda a summitului NATO, ți s-dizvârteaști Ankara, iu angrică ma multu pi lucurlu a dauâlor vâsilii ti criştearea a securitatil’ei globalâ.
România cu Canada au unâ ligâturâ streasâ, iara suțata anamisa di dauâli crati criscu fârâ curmari tu añil’i dit soni, dzâți câpia ali diplomație di București ți aspuni că dauâli vâsilii suntu aliati tu NATO, ama și vâsilii francofoni. Oana Ţoiu adusi aminti că tu Canada ari unâ isnafi româneascâ di simasie şi dzâsi că feațirâ muabeti și di turlia cum criștearea a ligâturilor di emburlâchi va s-putea s-l’ea tu isapi și aestu factor. Emburlâchea anamisa di România și Canada agiumsi tu añil’i di ma nâpoi anvârliga di un miliardu di euro, ș-naietea easti di cristeari și tindeari a ligâturil’ei di dauâli părțâ, deadi hâbari ministrul român.
„Tu ți mutreaști vâsiliili a noasti, lucârli di prota thesi suntu limbidz: apârari şi securitati, energhie nuclearâ. Ş-unâ mari cumatâ dit muabetea a noastâ fu ti retehnologhizarea a unitatil’ei şi planurli ti mutarea a unitâţlor 3 şi 4 di Cernavodâ.”
Oana Țoiu scoasi tu migdani că s-ancl’id 30 di añi di la dișcl’idearea ti prota oarâ ali Unitati Țentralâ Nuclearoelectricâ Cernavodâ, thimil’iusitâ pi tehnologhie canadianâ CANDU, ș-adusi aminti că România, ți ari 20% ditu mixul a l’ei energhetic thimil’iusit pi energhie nuclearâ, ari tu umuti unâ crişteari a ponderil’ei aliștei turlie di energhie la 30-40%, ta s-țânâ pâhadzl’i la un livel ți s-asiguripseascâ astrițearea tu industria româneascâ.
“Suțata a noastâ nuclearâ di vârâ 50 di añi, tu arada a achicâsearil’ei di lucru deadun ti energhie nuclearâ, easti vârtoasâ ti ațea ți România şi Canada pot s-adarâ deadun ş-thimel’iu ti un ș-cama bun lucru deadun tu industriili strateghiți. Reactoarili CANDU di Cernavodâ suntu unâ pradigmâ multu bunâ ti aestu lcuru deadun. Zburâm adzâ ti cum putem s-adrăm nica ș-ma multu pi aestâ suțatâ di 50 di añi tu sectorlu nuclear”, dzâsi și ministrul canadian.
Canada și România suntu soț di besâ, cundil’e Anita Anand, ți adusi aminti că moabetea s-feați ma multu pi anvârtușarea a suțatâl’ei tu alti sectoari strateghiți, cata cum inovaţia ică industriili avansati. Ea deadi tu șteari, tutnâoarâ, ti bitisearea a pâzârâpserilor ti unâ achicâseari mutrindalui securitatea a informaţiilor ş-că documentul va s-hibâ simnat ti șcurtu chiro. Aesta va s-agiutâ la un lucru ma stres a lucurlui deadun tu industrie şi alâxearea di informaţii confidenţiali, IMM-urili ş-industria di apârari putândalui ași s-lucreadzâ deadun.
Autor: Corina Cristea
Apriduțearea: Mirela Biolan
