Vizita prezidentului a Israelului tru Românie
Israelu şi România nu suntu maş parteneri, suntu şi buñi soţ, spusi, București, liderlu di Tel-Aviv, Isaac Herzog
Tașcu Lala, 30.06.2026, 20:18
Israel şi România nu suntu maş parteneri, suntu şi buñi soţ. Aesta easti spunearea ţi u feaţi, luni, prezidentulu a Israelului, Isaac Herzog, tru unã conferinţã ţãnutã deadunu cu prezidentulu Nicuşor Dan, București. Liderlu di Tel-Aviv spusi că vizita lui di stat easti „un semnu ti ligâtura multu bunã anamisa di aţeali dauã populi, cari au arãdãţiñili tu secoli di istorie uvriească tru Românieˮ. Isaac Herzog nica spusi că Israelu şi România s-andãmusescu adzã ca „dauâ democraţii vãrtoasi, vibranti, ligati unã-alantã cu valori ambãrţitati ahãnda, neisi 70 di ani di ligâturi diplomatiţiˮ. El adusi aminti că, ninti ta s’yinã Bucureşti, tiñisi cu aduţearea aminti, tu cãsãbãlu Iaşi pogromlu cari s’feaţi tru aţelu cãsãbã tu cirişaru 1941.
„Adusimu aminti vãtãmãrli şi nãdãimu că matimili va s’hibã nviţati şi ţãnuti minti şi va s’llia tuti meatrili tra s’nu s’agãrşeascã, vãrnãoarã Holocaustuluˮ, spusi prezidentulu a Israelului, cari adâvgã că fãnicolu a antisemitismului urdinã diznãu tru lumi. Aestu zburã ti provocărli cu cari s-ampuliseaşti vãsilia a lui, ama feaţi şi unã cllimari ti dialogu ti niscãnţãlli europeañi cari caftã cã Israelu s’hibã sancţionatu. Tru bitisita a zborlui ţi-lu ţãnu, prezidentulu a Israelui ãlu cãlisi prezidentulu Nicuşor Dan ti unã vizită di stat tru vãsilia a lui.
Tu arada a lui, liderlu di București spusi că ligãtura anamisa di ațeali dauã vãsilii easti vãrtoasã pi livelu politic, icunomicu, ama şi pi livelu uminescu. Lucãrlu ţi nã leagã, vãrtosu, spusi prezidentulu Dan, easti comunitatea israelieñilor cari suntu orighinari ditu România şi cari cilãstãsirã ti construcţia şi, deapoa, ti dizvultarea Statlui Israel. El adusi aminti lucãrlu deadunu tru ma multi dumenii: icunumie, securitati şi industria di apârari, agricultură icã tehnologhia ali informaţie, şi cundille cã ari unã mari vreari ti dizvultarea aluştoru ligãturi trã dauli vãsilii.
Tru idyiulu kiro, Nicușor Dan spusi cã ndrupaşti creaştirea a gaereţloru diplomatiţi tru Orientulu di Mesi, cundillindalui simasia ti unã cearei pi lungu kiro ti stabilitatea reghională. El nica spusi cã lipseaşti s’cilãstãseascã contra a discursurloru cari anţapã cu scupolu ti fuvirseari. „Lipseaşti s’cilãstãsimu vãrtosu şi, tru idyiulu kiro, cu mintimineaţã contra aluştoru turlii di purtatiţi, aţea turlie ta s’aprãftãsimu unã curmari ti sila ţi u llia nãscãnţã cu prişcãville, ti radicalizare, unã comuniuni anamisa di oamiñi cari au opinii, relighii, pistea a cathi unluiˮ, cundille Nicușor Dan.
Tu arada a vizitãllei a lui tu Românie, caplu a statlui Israel, Isaac Herzog, ţãnu unu zboru tru plenlu andãmusitu a Parlamentului și s-andãmusi cu prezidentulu a Senatlui, Mircea Abrudean, cu cari avu muabeti ti anvãrtuşearea a parteneriatlui româno-israelian. Isaac Herzog avu unã andamasi și cu prezidentulu a Camerãllei a Deputațlor, Sorin Grindeanu, cari cundille că Israelu ma largu easti un soţu strateghicu ti Românie, ama şi protlu parteneru ditu Orientulu di Mesi.
Autoru: Leyla Cheamil
Armãnipsearea: Taşcu Lala
