Alâxeari di turlii bugetarâ pozitivâ
Guvernul di Bucureşti apruchie prota alâxeari bugetarâ di estan şi, aşi, ampârţâ amintatiţli suplimentari adunati tu prota giumitati a anlui. Uidisit cu autorităţli, s-adunarâ cama di 4 miliardi di lei (0,9 miliardi euro), iara protlu benefiţiar al pâradzlor easti Ministerlu a Lucurlui.
Mihai Pelin, 29.07.2015, 11:48
Guvernul di Bucureşti apruchie prota alâxeari bugetarâ di estan şi, aşi, ampârţâ amintatiţli suplimentari adunati tu prota giumitati a anlui. Uidisit cu autorităţli, s-adunarâ cama di 4 miliardi di lei (0,9 miliardi euro), iara protlu benefiţiar al pâradzlor easti Ministerlu a Lucurlui.
Tu minduita a premierlui soţial-democrat, Victor Ponta, alâxearea easti unâ bunâ, pozitivâ, iara îndrepturli ti timeliu, constituţionali, suntu asiguripsiti ş-ti anlu 2016. Victor Ponta: Avem asiguripsiti tuti îndrepturli constituţionali di timeliu: amintatiţi, pensii, alocaţii, agiutoari ti şomagiu, Scuteri di pi lucru – di trei an’i ş-giumitati n-anvâţăm că easti normal, cum lipseaşti, ama s-nu agâşim chirolu cându nu eara normal şi nu earau pâradz ti pensii şi amintatiţi, pânâ pi 31 di Andreu 2012; sigura, şi dapoaia, ama zburâm ti anlu 2016 – nu ari iţi vârâ problemâ ti îndrepturli di tiemliu.
Surpriza a protâl’ei alâxeari di turlii bugetarâ di estan easti tâl’iearea a nâscântor pâradz di mari simasii di la Ministerlu a Transporturilor, cari cumândiseaşti investiţiili mări di infrastructurâ, iara pi partea di agiutor soţial, reprezentatâ di Ministerlu a Lucurlui, va s-da cama mulţâ pâradz,, ti pâltearea a alocaţiilor ti ficiuriţ, a pensiilor şi indemnizaţilor. Baia pâradz luatâ şi Finanţili, Internili, Afirearea, Educaţia, Mediul, Agricultura şi Serviţiili ayoriea (SRI şi SIE).
Cum eara di aştiptat, opoziţia giudică guvernul ti turlia cum ampârţâ pâradzl’ii tu proiectul di alâxeari. Liberalii aduc câbati a executivlui că deadi pâradz pi criterii politiţi a administraţiilor locali cumândisiti di soţial-democraţ. Prot-viţeprezidentul Eugen Nicolăescu minduiaşti că premierlu câtâpâţeaşti s-asiguripseascâ aşi andruparea politicâ a PSD. Eugen Nicolăescu: Easti prota oarâ dupu 90 ş-încoaţi cându unâ alâxeari bugetarâ easti zburâtâ la sediulu a unui partid, la PSD, şi dapoaia Guvernul adarâ aţea ţi caftâ partidlu. La unâ protâ mutreari, videm unâ ampârţari di pâradz maxus câtâ Administraţia Publicâ Localâ, lucru pi cari mini-l apriduc ca hiindalui frica al Victor Ponta di marli partid dit cari nâs adarâ parti. Şi cara va s-mai da-ndoi pâradz la baron’ii locali, ari şi el unâ cama mari arâhati ca premier.
Proiectul di ordonanţâ ti alâxearea bugetarâ mutreaşti şi pâradzl’ii ţi lipsescu ti criştearea a amintatiţlor a analţâlor demnitari, meatrâ ţi va s-intrâ tu practico ahurhindalui cu 1 di Avgustu.
Consililu Fiscal apruchie alâxearea ş-minduiaşti că încadrarea tu ţinta di deficit pi estan, tu catandisea a ţânearâl’ei a parametrilor di tora ai politicâl’ei fiscal-bugetarâ, va s-poati s-hibâ adratâ. Ti anlu aestu, Guvernul caftâ ş-unâ crişteari icunumicâ di 3,3%, andicra di 2,5% cât s-aştipta la scutearea a bugetlui di stat pi anlu 2015.
