Apofasi ligati după traghedia dit clublu Colectiv
Situaţia a pliguiţlor dupu foclu cari s-feati, stămâna ti tricu, tru clublu bucureştean, tru cari s-chirura bana cama di 30 di oamin’i, easti s-ma largu greaua. Cama di 130 di oamin’i sunt internat tru ma multe spitale, iara yiatarl’i suntu cabaia rezervaţ tru ti mureasti evoluţia a lor. Numirlu a decesilor poati s-creasca cabaia — fac timbihi yiatarl’i – tru condiţiile tru cari compoziţia chimică silighita dit parmatiili cari arsira tru clubu easti lahtaroasa, a deapoa leziunile suntu atipiti: arsuri pi suprafeţi mari a truplui, necroze pulmonari şi zn’iipsearea multu greaua a căl’iurlor respiratorii. Managerlu a Spitalui Grigore Alexandrescu, prof.dr.Dan Ionescu, exighisi că arsura easti una langoari medico-chirurgicală, iara hopa yinitoari, atea chirurgicală, ahurhita tru ndaua spitale, easti multu di simasie ti evoluţia a pacienţalor tru greaua catastisi.
Mihai Pelin, 04.11.2015, 11:21
Situaţia a pliguiţlor dupu foclu cari s-feati, stămâna ti tricu, tru clublu bucureştean, tru cari s-chirura bana cama di 30 di oamin’i, easti s-ma largu greaua. Cama di 130 di oamin’i sunt internat tru ma multe spitale, iara yiatarl’i suntu cabaia rezervaţ tru ti mureasti evoluţia a lor. Numirlu a decesilor poati s-creasca cabaia — fac timbihi yiatarl’i – tru condiţiile tru cari compoziţia chimică silighita dit parmatiili cari arsira tru clubu easti lahtaroasa, a deapoa leziunile suntu atipiti: arsuri pi suprafeţi mari a truplui, necroze pulmonari şi zn’iipsearea multu greaua a căl’iurlor respiratorii. Managerlu a Spitalui Grigore Alexandrescu, prof.dr.Dan Ionescu, exighisi că arsura easti una langoari medico-chirurgicală, iara hopa yinitoari, atea chirurgicală, ahurhita tru ndaua spitale, easti multu di simasie ti evoluţia a pacienţalor tru greaua catastisi.
Ia ti na spuni Dan Ionescu: “Lipseasti s-hiba particularizat andicra di cathi caz. Di furn’ia ca maca avem ateale arsuri di căl’iuri respiratorii superioari, nica si arsura chimică, nica si inhalaţia atea multu specială – mixtura pi cari nu u stim- videm zori s-avem ngatan şi s-alidzem atel’I landzidz tru oara nai cama uidisita cându îl’i ufiliseaşte aestă excizie. Easti multu importantu ti adrarea una excizie tra atea ca tru aesta minuta pot s-hiba echilibraţ, ama cara nu va s-hiba scoasi cumaţ di arsură el’i dupu ndaua dzali pot s-cada diznau pi greaua langoari.”
Tra s-nu s-faca ahtari fanicadz tru yinitor, guvernul aproba una ordonaţă di urgenţă cari dă ndreptul a Inspectoratlui tra Situaţii di Urgenţă să ncl’idă localurli şi cluburli cari nu tin’isescu legislaţia mutrindalui protecţia contra a incendiilor. Secretarlu di stat tru ministerlu ali sănătati, Raed Arafat, cundil’eadza că planlu di controale easti definitivat şi va s-hiba bagat tru lucru după publicarea a actului normativ tru Monitorlu Oficial.
Ia ti spuni Raed Arafat : “Ma s-nu aiba autorizaţie di securitate la incendiu, ama ş-aminta tute actele di autoritate ananghisiti, amendzale pot s-agiunga la 50.000 – 100.000 di lei. S-da un chiro di intrari tru legalitate, fără ncl’idearea a amplasamentului. Doilu caz: nu ari autorizaţie di securitate la incendiu, ama ş-aminta tuti avizili ananghisiti, ama ari călcări greali cari suntu scoasi tru migdani anada s-fati controlu. Ma s-ţa si spusi: “Lipseasti s-ai doauă locari tra işearea di urgenţă” şi tini ncl’isesi una şi alăsasi una ica adrasi masi una, aesta easti una dit călcărli greali. Treia situaţie: nu ari documentul di autorizaţie di securitate la incendiu, nu ari niti un altu actu amintat, atumtea s-da amenda şi ncl’idearea.”
Adutem aminti, di altă parti, că patron’il’i a clublui iu s-feati fanicolu fura ncl’isi preventiv tra 29 di dzali cu cabatea ti vatamari şi vătămari corporală dit culpă.
Armanipsearea: Tascu Lala
