Ascumbuseri mutrinda securitatea energetică

România ari duri stocuri di gaze naturale tru depozite tră sezonlu arati, spusi ministrul a Energillei, Virgil Popescu

Leyla Cheamil, 06.02.2023, 15:07

Polimlu ruso-ucrainean adusi multicilăstăseri pi livelu european și ditu videala a resurselor energetice, tru scupo hiinda aprovizionării niacumtinată. Conflictul spusi nica nă oară, importanța securitatillei energhetiţi ali Românie, componentă vitală a politicăllei di securitate națională. Securitatea energetică ţăni di ma mulţă factori cum resursili energhetiţi, situația geopolitică, rutili di tranzit. Ministrul a Energiillei di București, Virgil Popescu, spusi, tru aestă noimă, că văsilia nu ari niţi ună problemă tru asigurarea cu gaze naturale tră sezonul arati, di itia că ari duri stocuri tru depozite. Ministrul a Energiillei cundille că România poate s’năstreacă, fără problemi, eventuale kipiti di consum generat di tempearaturi negative. El cundille că văsilia ari, tru aestu kiro, ma multu cu aproapea 780 di milioane di metri cubi di gaze andicrandi cătu avea tru idyiulu kiro a anlui tricutu. Ma multu, ministrul ali Energie deadi asigurări că nu ari furñii di găilipseari di itia a embargoului tră motorina ditu Rusia, cari s’băgă tru lucru tora ma ninti. Virgil Popescu cundille că zbură cu tuţ mărlli importatori di produse petroliere di pi pzari, iara aeşţă ş’diversificară izvurili di aprovizionari, aţea turlie tra s’nu aibă sincope.

Dimecu, România va s’treacă cu hăiri di interdicţia băgată ti motorina arusească, aşi cum u feaţi tru bitisita a anlui tricutu, şi cu aţea mutrinda nafta, cundille Virgil Popescu. Diversificaria izvuriloru di aprovizionari easti ună di cilăstăserli a autoritățlor di la București. Săptămâna tricută, România şi Azerbaidjan prilundziră contractul tră livrarea di gaze naturale azere tru România. Documentul, simnat la Baku, pruveadi căbilea ti livrarea a ăscăntoru cantităţ di până la un miliardu di metri cubi până la 31 di marţu 2024 şi va s’bagă tru lucru la 1 aprilie, anlu aestu. Aflat tru ună vizită tru Azerbaidjan, șeflu a statlui român, Klaus Iohannis, spusi că, tru añilli ditu soni, Bucureștiul feaţi investiţii substanţiale tru dizvoltarea capacitatillei di transport a gazlui, ama şi tru conectivitatea cu văsiliili viţini. Tru arada a lui, premierul Nicolae Ciucă declară, după ună andamasi avută, Cairo, la bitisita a stămânăllei tricută, cu ministrul egiptean a Petrolui şi Resurselor minerale, Tarik El Molla, că România easti sinfirisită s’adavgă ananghea di consum ufilisinda terminalu di gaze naturale lichefiate egiptean, până la oara la cari va s’poată s’hibă valorificati gazili di mari ahăndusimi ditu Amarea Lae. Nicolae Ciucă easti cu minduita că va s’află cearei tră suplimentarea a cantitatillei ţi easti ananghi ti România, cum şi tră s’da agiutoru a Republicăllei Moldova. Cu furñia a vizităllei faptă di premierlu Ciucă la Cairo, fu simnat un acord di colaborari anamisa di Societatea română Transgaz şi compania egipteană di transportu a gazlui.

Autoru: Leyla Cheamil

Armânipsearia: Taşcu Lala