Criza politică di Bucureşti
Ştefan Stoica, 07.09.2021, 19:36
Agiumsi s’hibă di arada tru politica românească: suţatili di ţentru-dreapta lucreadză cu zori ică ici. Nu tricu niţi barimu unu anu di anda eara ndreaptă majoritatea PNL – USR PLUS – UDMR şi fitrusi prima criză politică majoră, a curi magnitudini pari s’hibă duri ta s-u asparga construcţia guvernamentală. Miniştrilli USR PLUS demisionară ditu executiv, după ţi, ma ninti, avea dipusă ună moţiune di cenzură contra a guvernului. Coprezidentulu USR PLUS, Dan Barna, până marţă viţepremier tru cabinetlu cumăndusitu di liberalu Florin Cîţu, exighisi căţe.
Dan Barna: “Nu mata s’poati aşi şi niţi numata va s’poată ma largu tu aestă turlie cu USR PLUS, di itia că aestă easti dgheafurauua ţi vremu s’u aduţemu tru politica ditu România. Florin Cîţu dinamită dukimăsitu şi cabaia responsabilu aestă coaliţie cu bună şteari şi cinismu. Florin Cîţu nu mata poati s’hibă premieru şi ditu aestă furñie miniştrilli USR PLUS s’trag ditu cabinetlu Florin Cîţu”.
Tuti nkisiră di la revocarea pi napandica a ministrului useristu ali Justiţie, Stelian Ion, a curi prim-ministrul ălli cutugurseaşti ambudyiusearea a unlui lărguriu proiectu di investiţii cari mutreaşti infrastructura locală. Proiectu ti cari USR PLUS spuni că ndrupa sinferlu pi şcurtu kiro a premierlui ta s’agiută primăriile controlati di PNL şi ta ş’anvărtuşeadză, aşi, statutlu di favoritu tru alumta ti căpia a partidlui cu actualu lideru, Ludovic Orban. Stelian Ion nu easti primlu membru useristu a cabinetlui revocatu di premier. Tru apriiuru, Vlad Voiculescu, di la Sănătate, avea idyea miră, ama tru cazlu aluştui, bunili naeţ, minati di nişterli executivi ş-di comunicari, ayuñiusiră diznodământulu. Iesu ditu guvernu Cristian Ghinea di la Investiţii şi Proiecti Europene, Cătălin Drulă di la Transporturi, Claudiu Năsui di la Economie, Ciprian Teleman di la Cercetari şi Ioana Mihăilă di la Sănătati. Ghini ma, USR nu iasi ditu coaliţie şi declară că easti hăzări ta s’toarnă tru guvernu cara Florin Cîţu va s’tragă năpoi. Cu andrupămintulu politic reconfirmatu di partia işiş, Florin Cîţu nu dă niţi semnu că va s’tragă năpoi. Ma multu, contraatacă speculânda vulnearabilitatea pi care USR PLUS u spusi pritu apofasea, ti nipistipseari, ta s’bagă semnulu pi ună moţiune di cenzură deadunu cu ună formaţiune ultranaţionalistă, AUR, a curi lideri işiră tu migdani, pănă tora, maş pritu alăvdarea a niscăntoru personaji sinistri ditu istoria ali Românie, ditu zona a extremăllei di nandreapta, şi pritu militantismu antiprusupida şi antivaccinu.
Florin Cîţu : “Coaliţia di dreapta easti aţea cari poate s’guverneadză, ama, cadealihea, easti ndilicatu atumţea cându atelli di dreapta ică atelli cari noi pistipseamu că suntu di dreapta s’asociadză cu un partidu extremistu, deapoă ălli vor ninngă elli şi pi socialişti. S’pari că nu eara di dreapta, şi maş mindueamu noi. Noi vrem s’guvernăm tru România şi lipseaşti s’guvernăm tru România. Nu easti zborlu ti ampăcari aoa, easti zborlu di interesili a românilor. Şi aoa spusiră purtaticlu, ditu videala a mea, ca niscănţă cilimeañi hăidipsiţ”. Criza politică cădzu urutu: dalga 4 s’dukeaşti tru spitali, iara aprukearea a sezonlui araţi da asparizmă, tu hăvaia-a creaştirillei lăhtăroasi a păhălui la energhie.
Autoru: Stefan Stoica
Armânipsearea: Taşcu Lala
