Îndauâ zboarâ mutrinda hapsan’ili ascumti ali CIA
CIA ufilisi turlii “greali/lai”, di multi ori ici buni, tu proţeslu di interogari a suspecţlor di terorismu; nu agiutarâ cum lipsea Prezidenţil’ia şi Congreslu tu ţi mutreaşti informaţiili – easti concluzia a raportului mutrinda turlii, tehniţili di interogari ali Agenţii tu hapsi ascumti dit Europa şi Asia, aspus public stâmâna ţi tricu, di Senatlu american.
Mihai Pelin, 17.12.2014, 12:54
CIA ufilisi turlii “greali/lai”, di multi ori ici buni, tu proţeslu di interogari a suspecţlor di terorismu; nu agiutarâ cum lipsea Prezidenţil’ia şi Congreslu tu ţi mutreaşti informaţiili – easti concluzia a raportului mutrinda turlii, tehniţili di interogari ali Agenţii tu hapsi ascumti dit Europa şi Asia, aspus public stâmâna ţi tricu, di Senatlu american.
Tu versiunea publicâ aluştui raportu nu s-aspun tuti informatiili, icâ nu s-dzâţi ţiva di vâsâliili iu suntu asumti hapsi ali CIA, anyrâpseaşti Washington Post, ama cari adavgâ că nâscânti detalii dit documentu dau cali ti aflarea aluştor ţentri di hapsi.
Aşi, uidisit cu publicaţia ti ma-ndzeanâ, România, anamisa di Polonia, Lituania, Afganistan şi Thailanda, easti pi lista a vâsâliilor iu CIA ari interogatâ prizon’ieri ti fapti di terrorismu tu chirolu 2002 – 2009. Ma multu, unâ parti dit aeşţâ suspecţâ, cari tora suntu Guantanamo, au dzâsâ că taha furâ interogaţ tu Românii, iara unlu chiola pitricu unâ plândzeari la CEDO.
Bucureştiul s-ayunisi s-da giuiapi mutrinda câbăţli adusi, Raportul CIA nu zburaşti ţiva di România, iara autorităţli români nu ai niţi vârâ hugiudii, semnu cari s-aspunâ că vâsâlia ari hapsi ali CIA icâ că aeroporturili româneşţâ furâ ufilisiti ti transportul a nâscântor prizon’ieri suspecţâ di terorismu, dzâsi MAI tu un-ndauâ zboarâ tu presâ.
Tu idyul chiro, nu suntu seamni limpidz ligati di cazuri iu persoani icâ agenţii xeani ofiţiali furâ implicati tu Românii tu acţiun’i di purtari paranom a prizonierilor. Diplomaţia di Bucureşti dzâţi că România, vâsâlii membrâ tu UE şi NATO, nu aproachi ahtări turlii di acţiun’i.
Pi di altâ parti, MAI aduţi aminti că furâ baia acţiun’i ti scupolu mutrinda verificarea a informaţiilor, unâ comisii parlamentarâ di anchetâ hiindaei dişcl’isâ tu anlu 2005.
Apruchiat di Senat tu 2008, raportul spusi că, tu Românii, nu s-aflarâ elementi ayoriea tu ţi mutreaşti hapsi ascumti americane, ţentri di detenţii icâ aeroplani CIA azbuirândalor paranom. Ma multu, ti tuchearea a câbăţlor adusi ali Românii, autorităţli anchisirâ unâ altâ anchetâ di turlii giudiţiarâ, tora intratâ tu practico.
Parteneriatlu Strategic cu SUA easti şi armâni unlu vârtos, iara timeilu a lucurlui deadun cu Washingtonlu ti acţiun’ili contra a terorişţâlor suntu susto, întimil’iati pi idyl’ii scupadz, pi tin’isearea a îndreptlui internaţional, tuti aesti ti unâ apandisi cama trâoarâ la piriculili ţi şed s-iasâ, dzâţi MAE
