Inflaţie tru scădeari
Consiliul di Administraţie a Băncăllei Naţionale a României apufusi ta stănă rata a toclui di politică monetară la nivelul di 7% pi an.
Mihai Pelin, 05.04.2023, 15:10
Rata anuală a inflaţiei ma largu va si scadă tru Romania tru un ritmu susţănut tru yinitorlli meşi, estimează Banca Naţională. Instituţia apreciază, ama, că ari incertituditui şi riscuri tru contextul a polimlui ditu Ucraina, ama şi a politicălli fiscale ditu România, cari lipseaşti s’ampacă ananghea di ñîcurari a deficitlui bugetar cu meatrili di agiutoru tră populaţie şi economie. Banca Centrală apufusi s-u ţănă tu idyea scarăa rata a toclui di politică monetară la nivelul di 7% pi an, aţea turlie că, tru yinmitorlli meşi, ratele di credite s’nu crească. Di aestu indicator ţănu cantitatea di monedă aflată tru circulaţie, cursul di alăxeari valutară, tocurli ditu piaţă, ama şi alte pârghii filisiti tră agiundzeari obiectivili di politică economică. Easti prima andamasi a cumăndusearillei BNR cari ălu ţăni nialăxitu rata a toclui di politică monetară, tru condiţiile tru cari aesta criscu niacumtinatu ditu brumaru 2021.
Analistul financiar Adrian Coderlaşu spune că apofasea eara anticipată şi că nu va s’aibă un impact semnificativ ti tocurli practicate di către bănţă: “Nu s’;lo neise ună pofasi di politică monetară, lucru cari şi di cătră păzări eara larg aştiptată. Neise, impactul ti evoluţia ratelor di dobândă di pi piaţa monetară easti cabaia ñicuratu. Rata di dobândă di piaţă monetară videm că easti pi un trend di scădeari, ama ROBOR-ul nu va s’dipună sumu 6. Neise scadenţili lundzăima largu pot si scadă unăoară ţi s’confirmă proţeslu dezinflaţionist. IRCC-ul tru aestu trimestru easti la valoarea maximă. Ditu trimestru yinitoru, va s’agiungă la ună lişoară scădeari, di la 5.98, poati la un 5.93-5.94. Nu va s’hibă anul aestu semnificativ sum 6. Vai ma vărtosu vas ă scadă anul yinitoru, cându şi Banca Centrală vai va opereadză prima scădeari di rată di dobândă..”
Uidisitu cu isăkili di tora, rata anuală a inflaţiei va ş’accelereadză vahi discristearea tru yinitorlli meşi, ama persistă un şingiru di incertituditui şi riscuri. Adrian Coderlaşu li spusi prinţipalele dauă: “Armăni polimlu, principalu risc, cari poati s’aducă nică surprize negative tru regiunea aesta ică tru tuată UE. OPEC Plus, dimi OPEC plus Rusia dimandară că ñîcureadză cantitatea di petrol, scupolu hiinda ta s’crească păhălu pi piaţa internaţională. Aesta va s’ducă tru inflaţie tru caz că păhălu armâne analtu ică tru caz că lă iase aestă operaţiune şi nica va s’crească păhălu a naftăllei. Dimi, arămân nică energia ca un factor di vulnearabilitate, ama şi incertitudiñili ligate di polimu.”
Incertituditui şi riscuri aduc şi turbulenţele ditu sistemili bancari ditu Statele Unite şi Elveţia, cari pot s’exercita efecte adverse pritu zñiipsearea a economiilor statilor dizvoltate şi a percepţillei di risc ti Europa Centrală şi di Est, cu impact ti custuserli di finanţare.
Autoru: Mihai Pelin
Armânipsearea: Taşcu Lala
