Mutarea capu pi geadei tru nãulu an universitar
Anlu universitaru 2025-2026 s-dişcllisi cu mutarea capu a studenţãloru, niifharistusiţ di apofasili di sirţãlle vulusiti di Guvernu
Tașcu Lala, 01.10.2025, 08:04
Nãulu an universitar ahurhi tru România cu mutarea capu a studențloru andreapti București și tru aproapea tuti cunãkili universitari ditu vsilie, tru deadunu cu andamasili di dişcllideari ţnuti tu idyiulu kiro. Elli cutugursescu apofasili di sirţlle și maxsusu ñicurarea a nuclliului di bursi, ama suntu niifharistusiţ și di condițiile di studiu.
Dimi, Alianţa Naţională a Organizaţiilor Studenţeşti ditu România feaţi cllimari ti tutã comunitatea di studenţã s’mutã caplu, la dişcllidearea anlui anluui universitar, ca unã apandisi ti actili normativi ţi reglementeadză nãscãnti meatri fiscalu-bugetari, meatri cari, spuni alianţa, zñiipseaşti calitatea actului educaţional şi ñicureadzã acceslu la nviţmintu.
Tru un comunicat al iorganizație, sã spuni aesta cutugursi sertu, nică ditu ahurhitã, purtaticlu şi minduita a guvernanţãloru cu vulusearea a apofasiloru di sirţãlle ama nu acãţarã tu muabeti actorlli sinfirisiţ catacum studenţãlli, cadrele didactice şi elevii, ama şi niacãţarea tu isapi/ fãţearea afanu tuti acţiuñili pritu cari studenţãlli dimunstrarã că tăllearea a transportului pi calea di heru şi fondulu di burse suntu lucre minutişu ti ñicurarea a xikillei bugetarã. Aesti meatri suntu unã atacã vinitã ndreptu di la Guvernului ali Românie cãndu easti zborlu ti anãnghiserli di thimelliu pi cari studenţãlli li au tra s’ducãninti imnaticlu educational/ cu praxea, neisi Guvernul agãrşindalui cãndreptulu la nviţãtura easti un ndrept asiguripsitu di Constituţia ali Românie, cundille Alianţa Naţională a Organizaţiilor Studenţeşti.
Uidisitu cu minduita ali organizaţiei, tăllearea a licurãrlor di transport şi ditu fondul di burse aduţi mari zñie ditu videala suţialã, zñiipsindalui, maxus studenţãlli aflaţi tru catandisi socio-economiţi multu crehti. „Economia la educaţie nu easti economie, trã aţea că iţi pãrã tru educaţie easti investiţie. Şi escu aoa cu semnulu di solidaritati andicra di soţlli a melli, andicra di tuti persoanele cari lipseaşti s’aibã izinea isa la educaţie şi s’lã da mãna ţi s’pari cã easti tu dzuua di adzã, luxulu ti s’ducã la scullio, s’ducã la liceu, s’ducã la facultate şi s’nveatãˮ, spusi unu di studenţãlli cari eara cu mutarea capu pi geadei București.
Tu arada a lui ministurlu ali Educaţiei şi Cercetarii, Daniel David, spusi cã anlu 2025 easti „vahi, nai cama zorle şi cu piriclliu anu trã vsilie după Revoluţia ditu 1989ˮ, tru hãvaia a criziloru pulitiţi, icunomiţi şi internaţionale, cundillindalui că sistemlu di nveţu fu ascãpatu di la unã curmari di itia a meatriloru fiscalu-bugetari apufusiti di Guvernu. Tru unã giueapi ti huzmetea a lui ti cari da apandisi şi ti cutugurserli a studenţãloru tu ligãturã cu bursili, Daniel David cundille că ñicurarea a a bursiloru nu va lu zniipeascã iremediabilu sistemlu di praxi. El cundille că sistemlu eara şi pãnã tora tu lucru, cu un bugetu multu ma ñîcu tru anlu şcularu ţi tricu, fără ambudyiuseri, şi u spuni vrearea cã tru yinitu, lipseaşti s’aibã un bugetu cama mari trã burse, ama cama ghini minduitu. După nãstriţearea a crizãllei fiscalu-bugetarã, lipseaşti s’hibã ahãrdziţ pãradz ma mulţã trã studenţã şi nãpoi s’hibã dati un numiru tiñisitu di bursi trã olimpiţ nica spusi ministurlu ali Educație.
Autor: Leyla Cheamil
Armãnipsearea: Taşcu Lala
