Năi hăbiniseri dimăndati
Corina Cristea, 25.06.2021, 14:16
Tru România, tu catastisea a unăllei evoluției favorabilă a epidemiillei di coronavirus tu kirolu ditu soni, ună parti ditu restricțiile băgati ti ngărdeari arăspândearea SARS CoV-2 va s’hibă alăxiti cu reguli ma hăbinisiti. Autorităţli dimăndară că, di la 1 di alunaru, ma mulţă oamiñi va s’poată s’llia parti la eveniente privati, spectacoli, conţerti şi festivaluri. Tru idyiulu kiro, tra hotelurli di pi litoral easti scoasă limitarea numirlui di turişti cazaţ. Năili misuri fură părăstisiti di caplu a Departamentului tra Situaţii di Urgenţă, Raed Arafat.
“S’da izini ti un numiru ma mari di oamiñi la evenimentili privati – şi aoa zburămu maxusu ti numţă, pătigiuñi – maximum 150 di oamiñi nafoară ică maximum 100 di oamiñi năuntru; 300 di persoan, cara eali suntu testati, vacţinate ică au tricută pritu lăngoari. Urdinarea a oamiñilor tru parei di pietoni, limitată la dzaţi inşi, fu scoasă. Lucărlu cu publiclu a opearatorlor economiţ di turlia a restaurantilor şi cafineadzloru năuntrulu a casiloru, catacum şi la tearasi easti permisă până la capaţitatea maximă a loclui şi s’prilundzeaşti până la 2:00 – eara anamisa di 5:00 şi 24:00. Easti scoasă limitarea-a gradlui di ocupare a structuilor cu funcţiuni di cazari turistică ditu zona di litoral — dimecu, tru aestu kiro eara di 85%, va s’hibă până la 100%, dar – angătanu! — va s’hibă purtată prusupida tru spaţiili publiţi ditu zonili respective: lifturi, holuri, coridoare şi aşi ma largu.”
Him utu ună catandisi bună, ama ţăni multu di multu di noi şi di cum vrem s’nidzemu ninti ditu videala cu s’duţi pandemia, spusi yeaturlu Valeriu Gheorghiță, coordonatorlu a campaniillei di vacţinari. El părăstisi ună isapi dupu aproapea 6 meşi di la ahurhita-a proţesului di imunizare tru România, pi 27 di andreu. Avem ananghi tru kirolu ţi yini di stabilitate ditu videala epidimiologică, a deapoa aestă stabilitate putem s’u’amintămu maş pritu vacţinare, nica spusi Valeriu Gheorghiță. El adusi aminti că, până tora, cama di 4,6 miliuñi di oamiñi s’vaccinară, 4,4 miliuñi ditu aesţă cu schema completă, aestă va s’dzăcă căţe avemu ună anvăleari vacţinală di aproapea 25% ditu populaţia eligibilă, la cari s’adavgă şi proţentul di imunitati colectivă amintatu anda s’ari tricută pritu lăngoari. Nai cama marea rată di vacţinare, di 36,5%, s’nreghistreadză la grupa di ilikie di 60-69 di añi. Ditu grupa di ilikie di 12-15 añi, cu nai ma pţănu ună doză s-vacţinară aproapea 16.200 di oamiñi, aţea ţi reprezintă un proţent di 1,9% ditu populaţia eligibilă ditu aestă categorie. Bucureștiul, cu un proţentu di 45% ş-cama, și șapti giudeţi au ună rată di anvăleari vacţinală di 30% ş-cama ditu populaţia rezidentă eligibilă. Valeriu Gheorghiţă spusi că s’aşteaptă la ună creaştiri a infectărloru cu năulu coronavirus tru sezonlu araţi, ama cundille că poati s’hibă evitată ună creaştiri cabaia mari a numirlui di cazuri cara oamiñilli va s’vacţineadză tru ună misură ma mari tru yinitorlli doi meşi di dzăli.
Autoru: Corina Cristea
Armânipsearea: Taşcu Lala
