Platforma internaţională Crimeea
Ştefan Stoica, 24.08.2021, 16:34
Ucraina cilăstăseaşti, aşi cum scutea tu videală comentatorlli, s’ţănă ma largu tu mănă Crimeea, hamunisia arăkită di Rusia tru 2014, tru agenda internaţională. Platforma Crimeea, a curi summit inaugural s’ţănu, luni, Kiev, şi pi cari Moscova ălu spusi ca hiinda ună ş’ună un actu antiarusescu, easti ună iniţiativă ţi ari scupolu s’anvărtuşeadză politica di nipricunuşteari a arăkearillei paranomu a Crimeiilei şi, pănu tru soni, s’licşureadză turnarea a llei tru componenţa ali Ucraină.
Reprezentanţăllii a cama di 40 di state vulusiră ună declaraţie finală tru cari condamnă aţea ţi număsescu aputrusearea temporară şi arăkearea paranomu ali Crimeei, ti cari spun că reprezintă ună provocari directă la adresa a securitatillei internaţională. Documentul faţi timbihi că militarizarea ţi s’dizvărteaşti şi tu aestă oară tru regiune slăgheaşti securitatea şi stabilitatea ali regiuni Amarea Lae, denunţă gaereţli ali Rusiei taa să u legitimeadza aputrusearea provizorie şi ar4chearea paranomu şi condamnă călcările a ndrepturilor a omlui tru hamunisie. Tru declaraţie s’caftă ali Moscovă s’asiguripsească şi s’garanteadză că tuti persoanele cari ţănu di comunităţli etniţi şi religioase, inclusiv etniţlli ucraineni şi tătari, au căbilea să s’hărsească acutotalui di ndrepturli a lor.
România fu reprezentată la lansarea a platformăllei Crimeea di şeflu a guvernului, Florin Cîţu, şi di ministrul di Externe, Bogdan Aurescu. Prim-ministrul român dimăndă asocierea a văsiliillei la Platforma Crimeea şi năpoi adusi aminti agiutorlu constant ti suvearanitatea şi integritatea teritorială ali Ucraină, cum şi angajamentul susto andicra di politica di nipricunuşteari a arăkearillei paranomu a hamunisiillei.
Autorităţli di Bucureşti, cundille Florin Cîţu, suntu cabaia dukimăsiti di actualele provocări şi fuvirseri contra a valorilor, stabilitatillei şi securitatillei tru regiunea ali Amarea Lae. Prim-ministrul adusi aminti, tutunăoară ti agiutorlu ali României tră nădiili europene şi euroatlantiţi ali Ucraină, aducănda aminti că România fu primlu stat membru ali Uniunii cari ratifică acordul di asociere anamisa di UE şi Ucraina. Realizarea aluştoru nădii lipseaşti s’hibă andrupăti pritu un proces di reformă cari s’aducă hăirlătică ti tuţ cetăţeañilli ucraineni, inclusiv atelli di etnie română, easti cu minduita şeflu guvernului di Bucureşti. Tru minduita aluştui, fuvirserli şi provocările externe pot s’hibă ma ghini chivirnisiti cara statili cilăstăsescu ti ndridzearea a problemiloru bilaterale.
Tru marja Summitului, prim-ministrul Cîţu avu ună andamusi cu omologul ucrainean, Dinys Shmyhal, tru cadrul a curi năpoi spusi vrearea ali Românie ta s’da silă a coopeararillei bilatearală, inclusiv prin organizarea tru estan a unei noi sesiuni a Comisiillei mixte interguvernamentale mutrinda coopeararea economică, industrială şi tehnico-ştiinţifică. Aţelli doi premieri declarară că vor s-impulsioneadzăe coopeararea sectorială, cu prioritate tru domeniul transporturilor, infrastructurii şi al punctelor di triţeari a sinurloru comune. Florin Cîţu u spsui volea ali Românie ta s’hibă asiguripsită tiñisearea a ndrepturloru a minoritatillei române, lugursită la 400 di ñilli di membri.
Autoru:Stefan Stoica
Armânipsearea: Taşcu Lala
