Prag n’icşurat tră referendum tru România
Majoritatea suţial-libearală dit Parlamentul ali Românie şi spusi minduearea tu ligâturâ cu alâxerli fapti la nomlu a referendumlui şi dipusi di la 50 la 30% praglu di prezenţă la iţi consultari populară. Tu idyiul kiro, validarea-a rezultatilor a unui referendum va sâ s-facâ maşi cara va sâ spunâ tră/ favorabil 25% dit numirlu a alegătorlor ngrâpsiţ pi listili electorale permanente. Aesti listi va s-hibâ reperlu şi atumţea cându va si s-facâ isapi ti cvorumu. Alâxerli adusi a nomlui trâ referendum ahândusescu ampârţarea anamisa di puteari şi opoziţie. Aestâ dit soni dimândă, că va li contestâ pruviderli la Curtea Constituţională.
Ştefan Stoica, 30.05.2013, 14:32
Majoritatea suţial-libearală dit Parlamentul ali Românie şi spusi minduearea tu ligâturâ cu alâxerli fapti la nomlu a referendumlui şi dipusi di la 50 la 30% praglu di prezenţă la iţi consultari populară. Tu idyiul kiro, validarea-a rezultatilor a unui referendum va sâ s-facâ maşi cara va sâ spunâ tră/ favorabil 25% dit numirlu a alegătorlor ngrâpsiţ pi listili electorale permanente. Aesti listi va s-hibâ reperlu şi atumţea cându va si s-facâ isapi ti cvorumu. Alâxerli adusi a nomlui trâ referendum ahândusescu ampârţarea anamisa di puteari şi opoziţie. Aestâ dit soni dimândă, că va li contestâ pruviderli la Curtea Constituţională.
Em, suţial-libearalii spun că năili pruvideri furâ spusi tu spiritlu a observaţilor fapti di Curtea Constituţională, cari avea faptă bâgarea nâscânti condiţii uniţi di organizari şi dizvârteari a referendumurlor, cari ţi s-hibâ miza a aiştor. Ampulisearea easti veacl’e, veara ţi dun’eaua lu tricu nai cama mintitlu episod a l’ei. Atumţea, prezidentul Traian Băsescu, suspendat di Parlamentu, ascăpă di demitere ti furn’ia câ la referendum vinirâ ma pţânu di 50% dit numirlu total a alegătorlor ngrâpsiţ pi listile permanente. Aşi, acâ tră demiteri a vea votatâ 7,4 miliun’i di români, dimec unâ majoritati stuhinâtoari, referendumlu fu invalidat câţe la urni vinirâ aproapea 47% dit aţel’i cu ndreptu di vot. Moabeatea, acâ avea tu prota thesi miza cabaia mari ţi u constituia debarcarea al Traian Băsescu, nu s-dânâsi la ea.
Nu puţân’i dukea, atumţea, că un prag analtu di prezenţă bâgat zorlea ti validarea a iţi referendum poati s-ambudyiuseascâ iniţiativi locale alâvdâtoari, tu condiţiile tu cari easti ghini cunuscut faptul că apetitlu tră votlu di iţi turlie scădzu constantu tu an’il’i dit soni. Tora, miza va s-hibâ referendumlu dit toamnă di aprobari ali Constituţie, ţi easti tu mplin proţes di revizuiri. Di aoa yini şi hâbarea ali opoziţie, reprezentată di democrat-libearali, populişti şi UDMR, că va s-ncuntreadzâ ti alâxerli a nomlui trâ referendum.
Argumentul a lor va s-hibâ aţel că apofasili importanti tră naţiune, cum easti amendarea ali Constituţie icâ regionalizarea, va s-hibâ loati pi thimel’ilu a volil’ei spusâ maşi di unâ pătrime dit populaţia cu ndrept di vot. Pi di altă parte, argumentul a majoritatil’ei vârtoasi cari s-leghitimeadzâ prit vot iţi apofasi importantă nu şidzu ncicioari, ti furn’ia câ PDL şi UDMR, atumţea cându eara la puteari şi apufusirâ câ primarl’ii s-hibâ alepţâ dit un gol tur di scrutin, cari ţi s-hibâ numirlu a aţilor prezenţâ la urne. Social-libearalii spun că n’icşurarea a praglui di prezenţă la referendum nu echivaleadză, aşi cum interpretă opoziţia, cu strindzearea a ndreptului di vot.
