Proţlli 100 di năi askirladz americani tru România
Proţlli askirladzlli americani ditru năulu contingentu agiumsiră tu România. Elli viniră dit Germania şi va s’ndreagă lucărli ti agiundzearea-a alăntoru askirladz ditu contingentu ţi ari 1000 di militari americani, pi cari Washingtonul apufusi sa-lli transferă tu România. Aestă iniţiativă tru contextul a crizăllei ditu Rusia şi Ucraina, cu scupolu ta s’anvărtuşeadză areapta ditu apirită a NATO. Ministrul apărarillei, Vasile Dîncu, exighisi:
Mihai Pelin, 09.02.2022, 19:00
Proţlli askirladzlli americani ditru năulu contingentu agiumsiră tu România. Elli viniră dit Germania şi va s’ndreagă lucărli ti agiundzearea-a alăntoru askirladz ditu contingentu ţi ari 1000 di militari americani, pi cari Washingtonul apufusi sa-lli transferă tu România. Aestă iniţiativă tru contextul a crizăllei ditu Rusia şi Ucraina, cu scupolu ta s’anvărtuşeadză areapta ditu apirită a NATO. Ministrul apărarillei, Vasile Dîncu, exighisi:
“Au vinită tră pregătiri cama di 100 di askirladzl americani, specialişti cari andregu aestă ncartiruire militară a askeriloru. Au agiumtă tu România, agiumsiră şi tu alte văsilii, akicăsimu că şi tu Polonia. Tu Romania, deadunu cu specialiştilli a noştri tu logistică, elli lucreadză tamamu ti aestu lucru tu aesti dzăli. Dealihea că aesta nsimneadză că nu va s’treacă multu kiro până va s’yină şi alanti askeri, ama va vă dimăndămu cu transparenţa cari nă caracterizeadză ti minutişuri nica şi ti locurli iu va s’hibă arădăpsiţ. Toradioară nu ari maş unu locu, nu ari tutunăoară ună apofasi mutrinda dzuua di tamamu i dzălili anda va s’agiungă.”
Ministrul apărarillei nica spusi că România easti etimă tra s’aşteapă s’kindurească trupili americane. El cundille că, dit videală militară, nu poate s’hibă zborlu ti iminenţa a unlui polimu. Tu aestu kiro, tu România militarlli americani suntu prezenţă tu trei bazi prinţipale: Deveselu, Mihail Kogălniceanu și Câmpia Turzii. Aţea ditu ssoni easti lugursită un importantu nodu strategicu tră operaţiunile a forţilor aeriene americane şi ună importantă bază di andrupari cari asigură aşi-număsita ahândusimi strategică”: di aoa suntu tu planu ta s’agiungă eventuali anvărtuşeri şi ndrupămintu militar tră trupili aliate aflate tu un ipotetic conflictu cu un agresor cari atacă România. Tutunăoară, americanilli hăbărisiră că va s’investească cama di 150 di milioane di dolari ti modernizarea infrastructurăllei la baza aerienă di Câmpia Turzii.
Aoa şi ună stămăna, Statele Unite dimăndară dizvărtearea aţiloru aproapea 3.000 di militari americani tu văsilii di pi flancul estic ali Alianţă Nord-Atlantică. Pi ningă aţelli cari va s’agiungă dzălile yinitoari tu România, alţă aproapea 2.000 di askirladz americani va s’aterizeadză tu Polonia şi Germania. Pentagonlu exighisi că easti zborlu ti misiuni temporare tră anvărtuşearea apărarillei aliaţilor europeñi tu contextul a mintireaşiloru anamisa di Rusia și Ucraina.
Catandisea easti apreasă, după ţi Moscova ascumbusi cama di 100.000 di militari şi tehni di alumtă importantă la sinurli a fostăllei ripubliţ sovietiţi, iara Occidentul s’aspari că poati să s’facă ună aputruseari. Moscova nu aproaki aestu ţi nu easti dealihea și pitricu ma multi căftări, ntră altele blocarea ti intrarea ali Ucraină tu NATO, ama şi ună apridunari a activităţlor tu statele membre ex-comuniste, ntră cari și România. Căftărli nu fură aprukeati di aliaţ, a deapoa gaereţli ti aflarea an unăllei cearei diplomatică s’duc ninti.
Autor: Stefan Stoica
Armânipsearia: Taşcu Lala
