România şi ceamauna ditu Orientul di Mesi
România nu fați parti ditu ceamauana iu suntu acâțati Statili Uniti și Israelul contra a Iranlui, dzâți Bucureştiul.
Tașcu Lala, 02.04.2026, 22:04
Ministerlu di Externi di Bucureşti dzâsi, unâ ș-unâ, la fuvirserli spusi, luni, di partea iranianâ, că România nu fați parti ditu ceamauna ditu Orientul di Mesi ş-că lucurlu di prota thesi a autorităţlor româneșțâ easti copuslu diplomatic ta sâ scadâ angrâñea. Iranlu fuvirsi România că poati s-apândâseascâ politic şi juridic di cara âlli deadi izini ali Americâ s-filiseascâ bazi di pi teritoriul a llei ti operaţiuni contra a Iranlui. “Maca România lâ da izini a Statilor Uniti, s-lâ filiseascâ bazili, aestu lucru va s-dzâcâ că ea llia parti la agresiunea di ascheri contra a Iranlui”, dzâsi reprezentatntul a Ministerlui iranian di Nafoarâ. Tu minduita a lui, unu ahatri lucru nu s-uidiseaști cu dreptul internaţional ş-România ari unâ borgi internaţionalâ.
A că, uidisitu cu spusa a niscântor diplomaț cu stati vechi, România nu va s-da giuiapi ti ligâtura cu aliaţlli, ditu cari niscânțâ suntu parteneri stratedziț, cata cumu Statili Uniti, MAI di Bucureşti exichisi că achicâsearea di dauli părțâ di acțes ditu 2006 lâ da a SUA arada legalâ garantatâ ta s-filiseascâ dipriunâ bazi militari ditu Românie. România, dzâți MAE, ari di cama di dzăț di añi capabilităţ di apârari antirachetâ contra a niscântor fuvirseri di nafoara a spaţiului euroatlantic. Sistemlu bâgatu tu notlu ali României ari unu caracter defensivu, hiindalui filisitu maș tu scupo di autoapârari, ași cumu spuni Carta ONU.
Pi di altâ parti, diplomaţia româneascâ câtâyurseaști ataca dipu fârâ canâ thimelliu a Iranlui contra a vâsiliiloru ditu reghiunea a Golfului ş-lâ hâristuseaști tu aestâ aradâ câ lâ afiri țetăţeañilli româñi ți eara tu vâsiliili a lor. “Âlli fâțem tâmbihi a Iranlui s-dânâseascâ aesti atacuri, ți bagâ tu piriclliu bana a oamiñiloru ș-duc la aspârdzearea a securitatillei ş-ali economie globalâ”, dzâsi nica Ministerlu di Nafoarâ. Fuvirserli ditu partea iranianâ yinu dupâ ți Parlamentul românescu fu di câbuli, stâmâna ți tricu, cu apofasea a Consiliului Suprem di Apârari a Vâsilillei tu ți mutreaști pitrițearea ti unu chiro, tu Românie, a niscântoru echipamenti defensivi şi forţi di ascheri americanâ, tu arada a crizâllei ditu Orientul di Mesi. Aestu lucru s-fați a că avurâ protesti alarmisti ali opoziţie populistâ şi ultranaţionalistâ, cari da s-asparâ duñeaua că putem s-him bâgaț tu polimu.
Uidisitu cu apofasea CSAT, va s-hibâ pitricuti avioani di realimentari, echipamenti di monitorizari şi echipamenti di comunicaţii satelitari. Echipamentili şi forţili americani, vârâ 400 – 500 di aschirladz, va s-ducâ la dauâ bazi di ascheri, unâ aproapea di Amarea Lai ş-alantâ tu țentrul ali vâsilie. Bruxelles, minişțârlli di Nafoarâ di UE, pritu cari şi şefa ali diplomaţie româneascâ, Oana Ţoiu, şi-aspusirâ gâilipsearea andicra di acţiunili di crișteari a ceamaunâllei tu Iran, ți va s-aducâ znie tu tutâ reghiunea, ama ș-tu planu global. Lucurlu di prota thesi ali Uniuni armâni sigurlâchea a țetăţeañilor ivropeañi şi vigllearea a țivililor. Pânâ tora, cu andruparea ali UE, s-feațirâ 89 di azbuirări, dit cari 5 azbuirări di scuteari tu sigurlâchi a oamiñilor ditu Românie şi Polonie.
Autor: Ștefan Stoica
Apriduțearea: Mirela Biolan
