România şi criza dit Gartia
Luni easti dzua nai ma lungă şi ma mintita tra autorităţile di Atena, cari au vade 30 di cirisar tra s-pălteasca a Fondului Monetar Internaţional 1,5 miliardi di euro di babageanlu mparmut convenit. Nvirinat di mutarea surpriză a premierlui Alexis Tsipras, atea tra s- ndreaga un referendum ti condiţiili bagati a vasiliil’ei di creditorl’ii internaţionali, Eurogruplu li curma negocierile şi dimanda că programlu di asistenţă financiară nu va s-hiba prilundit după data di 30 cirisar. Banca Centrală Europeană alăsa, ama, uşa discl’hisă tra una cearei cari s-ascapă Gartia di falimentu şi sa u ţană tru zona euro şi u tanu ma largu finanţarea di urgenţă tra Bantali elene.
Ştefan Stoica, 29.06.2015, 15:38
Luni easti dzua nai ma lungă şi ma mintita tra autorităţile di Atena, cari au vade 30 di cirisar tra s-pălteasca a Fondului Monetar Internaţional 1,5 miliardi di euro di babageanlu mparmut convenit. Nvirinat di mutarea surpriză a premierlui Alexis Tsipras, atea tra s- ndreaga un referendum ti condiţiili bagati a vasiliil’ei di creditorl’ii internaţionali, Eurogruplu li curma negocierile şi dimanda că programlu di asistenţă financiară nu va s-hiba prilundit după data di 30 cirisar. Banca Centrală Europeană alăsa, ama, uşa discl’hisă tra una cearei cari s-ascapă Gartia di falimentu şi sa u ţană tru zona euro şi u tanu ma largu finanţarea di urgenţă tra Bantali elene.
Tu arada a lui, Fondul Monetar Internaţional sa spusi prit boatea a directorlui general Christine Lagardi, etim tra ş-da agiutorlu ma s-hiba tu mari ananghi. Dna Lagardi lugursi, di altă parti, că zona euro easti tru poziţie di furteaţă tra s-tana cheptu la zn’iili a crizal’ei elena şi sa u ţana stabilitatea a regiunil’ei. Tru Gartia, iu oamin’il’I avea loata, nica di sâmbătă, cu irusi bancomatele di asparizma ca va s-cheara lichidităţli, Bantali fura ncl’isi şi va s-armâna ase până pi 6 di alunar, a doua dzuua după referendum.
Tru aesta perioadă, ritradzerli di bancomati va s-hiba limitate tra cafi contu la 60 di euro ndzuua. Nu şi tru cazlu a xen’ilor, declară autorităţli. Bucureşti, şi nu masi, isi tu videala ntribarea desi un cutreabur financiar faptu tru Gartia s-nu hiba duchitu vartos, la nivelu a Bantalor cu capital elen, tru tută zona.
Bantale garteşti dit România nu va s-aiba zn’ie di niti una apofasi ti va s-hiba loată di Atena tru ligătură cu sistemlu a l’ei bancar, deadi asiguripseri purtătorlu di zbor a BNR, Dan Suciu. El cundil’e că Bantale dit România, aca au capital gartescu, lipseasti s-tin’iseasca legislaţia interna şi vigl’earea a Bancal’ei Naţionale.
Ia ti spusi Dan Suciu: “Cându zburam di Banta garteşti zburam di Banta româneşti cari avura, la un moment dat, capitalu di thimil’iuseari gartescu. Eale tin’isescu legislaţia româneasca, una legislaţie cari pruveadi, di altă parte, garantarea a tuturor dipozitelor tru cuantumlu a sumal’ei di 100.000 di euro tra tuti Bantale dit România — s-hiba limbid! – nu easti una caftari specială tra nascanti ica tra altele, şi tru consecinţă nu ari niti una furn’ie di asparizma dit videala a Bancal’ei Naţionala tru atea ti mutreasti rezervele ica depozitili a cetăţenilor români”.
Di altă parte, ti furn’ia ca Gartia easti una di distinaţiile favorite a român’ilor tru sezonlu estival, Ministerlu a Afacerilor Externe di Bucureşti la cafta a turiştilor români aflaţ tru aestă vasilie s-aibă pi el’I paradz tra s-nu s-agiunga la probleme cauzate di niputearea tra ufiliseari cardurli di credit ica di debit. Ministerlu spuni că, cu tuti asiguripserli dati di autoritaţli elene, fura semnalati multi cazuri cându plata cu cardul nu fu aprucheată.
Angrapsearea: Stefan Stoica
Armanipsearea: Tascu Lala
