România, una stămână până la alidzeri
Florentin Căpitănescu, 05.12.2016, 14:35
Tru România, candidaţl’ii tra alidzerli parlamentari ti va sa s-tana tu 11 di andreu intrara tru atea dit soni stămână di campanie. Uidisitu cu legislaţia, campania electorală s-bitisieasti sâmbătă, 10 di andreu, la oara 7:00. Până atumtea, atel’I cari vor s-agiunga senatori ica deputaţ pot tra s-parastiseasca programili polititi şi ofertele electorale prit afişi, mitinguri şi andamusi cu cetăţean’il’i. Tru atea ti mutreasti audiovizualu, campania electorală s-bitiseasti viniri, 9 di andreu, la oara 7:00. Tut pi atea dit soni sută di meatri suntu şi ndridzerli tra organizarea a scrutinlui.
Gioi, 8 di andreu, easti vadelu limită tra pitritearea cătra Biroulu Electoral a pul’ilor cu documentele di vot prit corespondenţă – una nautati absolută tru istoria a alidzerlor dit România -, a deapoa sâmbătă, tru pre-dzua a votaril’ei, va s-hiba pridate a prezidentalor birourlor di circumscripţie buletinele di vot, ştampilele, listele electorale permanente şi alanti formulari ananghisiti. Tra ateali 466 di mandate – 136 la Senat şi 312 la Camera a Depuaţlor, la cari se adavgă atel’i 18 di deputaţ a minorităţlor naţionale, alti andicra di atea maghiară, a curi reprezentari easti asiguripsita dit oficiu – suntu ngrapsiti tru competiţia electorală aproapea 6.500 di insi.
Suntu ndreapti 43 di circumscripţii electorale: 41 di giudeţi, Bucureşti şi diaspora. Scrutinlu easti organizat după una naua legislaţie electorală, cari baga diznau, după dauă alidzeri uninominale, votlu pi listă. Sistemlu precedentu, un uninominal cu aşi-numasiiti coti di reprezentare, dusi la una mari alathusi, anda Legislativlu di Bucureşti agiumsi s-aibă, tru actualu ticlu parlamentar, aproapea 600 di alepta. Favorit easti PSD, atel cari tru tuta era post-comunistă ali Romanie s-ampulisi cu Stânga, deapoa di PNL, di dreapta, şi di USR, una apariţie di dată recentă şi cari, minduescu observatorl’ii, va s-aiba un zbor greu ti spuneari tru yinitorlu Parlamentu.
Cu şanse alithea tra s-treaca praglu electoral di 5% nica l’ia parti UDMR, formaţiunea reprezentativă a minoritatil’ei maghiare, ALDI (di dreapta), thimil’iusitu di actualu preşedinte a Senatlui, Călin Popescu Tăriceanu, şi PMP (di dreapta), creaţia a fostului şef a statlui, Traian Băsescu. Yinitori locatari a Parlamentului — una entitate fundamentală tru arhitectura instituţională ali Românie — au greaua misiune tra s-alaxeasca imaginea publică ali instituţie, asociată cu niaxizearea, imoralitatea ili cu arusfetea. Di altă parte, configuraţia a naului Legislativ va s-hiba nchisita tra negocierli ligati di adrarea a yinitorlui Executiv, anda nu s-baga problema ca vara partid s-amintă masi el golu multu vruta majoritate parlamentară.
Autor: Florin Capitanescu
Armanipsearea: Tascu Lala
