Triumfu românescu la Wimbledon
Văsiloan’ea a iarbăl’ei”. Aşi u spusi cu numa pi românca Simona Halep, di fara armânească, azvingătoari la Wimbledon, cunuscuta a l’ei compatrioată, multipla campioană olimpică, mondială şi europeană la gimnastică, Nadia Comăneci. Tin’iseari acutotalui păn di mardzină ama ş-ţi ăl’i si cadi după victoria categorică a Simonăl’ei, prota la simplu a unui sportiv român pi iarba londoneză, dinintea a supercampioanăl’ei americană Serena Williams. Aţel di ma ninti mari tenisman american John McEnroe declara tră BBC că easti ciudusitu di turlia pritu cari Halep u azvimsi Williams tru finala di sâmbătă, tru 2 seturi şi ti ma puţăn di ună săhati. Un tenis tră nipistipseari, un meci ti anami, s-avdză şi alăvdarea a unăl’ei altă legendă a tenislui american, Billie Jean King. Arăzbunat escu, aşi spusi că s-ducheaşti aţel di ma ninti mari campion român Ilie Năstase, aţel cari chiru dauă finali la Wimbledon, tru 1972, cu americanlu Stan Smith şi tru 1976, cu suedezlu Bjorn Borg.
Ştefan Stoica, 15.07.2019, 12:13
Văsiloan’ea a iarbăl’ei”. Aşi u spusi cu numa pi românca Simona Halep, di fara armânească, azvingătoari la Wimbledon, cunuscuta a l’ei compatrioată, multipla campioană olimpică, mondială şi europeană la gimnastică, Nadia Comăneci. Tin’iseari acutotalui păn di mardzină ama ş-ţi ăl’i si cadi după victoria categorică a Simonăl’ei, prota la simplu a unui sportiv român pi iarba londoneză, dinintea a supercampioanăl’ei americană Serena Williams. Aţel di ma ninti mari tenisman american John McEnroe declara tră BBC că easti ciudusitu di turlia pritu cari Halep u azvimsi Williams tru finala di sâmbătă, tru 2 seturi şi ti ma puţăn di ună săhati. Un tenis tră nipistipseari, un meci ti anami, s-avdză şi alăvdarea a unăl’ei altă legendă a tenislui american, Billie Jean King. Arăzbunat escu, aşi spusi că s-ducheaşti aţel di ma ninti mari campion român Ilie Năstase, aţel cari chiru dauă finali la Wimbledon, tru 1972, cu americanlu Stan Smith şi tru 1976, cu suedezlu Bjorn Borg.
Inflaţie di superlativi tru presa internaţională după succeslu a Simonăl’ei. La Wimbledon s-feaţi istorie — spusi CNN, tru frăndza a lui electronică, iara BBC cundil’e: “Simona u chisă agiucătoarea americană şi ălu ciudusi publiclu di pi Arena ţentrală di la Wimbledon, ţi nu pistipsea tru victoria a l’ei”. Organizatorl’i a Turneului u hiritisiră pi Simona, tru ună postari pi Twitter, iu ngrăpsiră că yislu a aiştei agiumsi averu/ realitate şi că u azvimsi Serena Williams cu un agioc multu măyipsitor. AFP scutea tru videală purtaticlu/ cilăstăsearea agresivă cu cari Simona intră tru mecilu cu Serena, iara Reuters aţea că românca ş-ahurhi stămâna di u azvimsi americanca di 15 ani Cori Gauff, revelaţia a turneului, şi u bitisi la Balu/ Gimbuşea a Campionilor, după un meci inspirat, tru cari u chisă pi Serena Williams.
Eroina di la Wimbledon exighisi cum ş-adră carriera remarcabilă. Simona Halep: Escu hărioasă di turlia tru cari agiucai şi di turlia cum apăndăsiiu la un evenimentu di ună ahtari simasie şi tu ună dzuuă ahâtu di mari. Alumtaiu, cilăstăsiiu, nica şi trapşu tru chirolu a aiştoru an’i, tut ţi adraiu, adraiu tra s-escu cât cama bună pi teren, atumţea cându intru. Agiumşu la un nivel analtu şi mi duchescu cu multă pistusini tru mini. Vărnăoară nu minduiam că va s-escu numirlu ună şi va s-amintu un Grand Slam, ama yislu aestu s-feaţi şi tra elu lucraiu dzuuă di dzuuă. Aşi cum u-am spusă di multi ori, român’il’i suntu mplin’i di hări ama nu avem pistipsearea tru noi. Lipseaşti s-ahurhim s-himu cama bun’i, s-pistipsimu tru noi şi s-mutrimu lucărli tru ună turlie pozitivă.”
Românca di 27 di an’i amintată Custanţa amintă, Londra, doilu turneu di Mare Şlem, după Rolland Garros, anlu ţi tricu. Halep nica ari tru palmares dauă finale ţi li agiucă pi arină/ zura pariziană şi una la Australian Open. Dit turneele di Mare Şlem, Simona nu aprăftăsi s-agiungă tru finala di la US Open, ama forma sportivă u scoati dininti anamisa di favorite şi pi ţimentul american. Turlia tru cari agiucă pi iarbă, ună suprafaţă cu cari tenismen’il’i români nu suntu nviţaţ, spuni că Simona Halep agiumsi pi nivelu a mărlor campioni dit istoria a sportului albu, atel’i cari alăsară toară pi tutie suprafeţili di agioc.
Autor: Ştefan Stoica
Armânipsearea: Taşcu Lala
