Tu amprotusa, lucãrli a nãului prezidentu ali Românie
Nãulu prezidentu Nicușor Dan pãrãstisi, tru zborlu ţi ãlu ţãnu dinintea-a Parlamentului, lucãrli di prota thesi ţi prindi s’li aibã România tru yinitu.
Tașcu Lala, 27.05.2025, 21:56
Nicuşor Dan prilo mandatlu di prezidentu ali Românie, după ţi deadi giuratlu tru plenlu a parlamentului. La andamasea di tiñie loarã parti membrilli a Guvernului și ali CCR, aţelli di ma ninti prezidenţã ali Românie, Fumeallea Vãsilikeascã, reprezentanțã a instituțiilor publiţi ţentrali, ama și a cultiloru relighioasi. Tru zborlu ţi ãlu ţãnu, el haristusi a cetãteañiloru ti cilãstãserli ţi li feaţirã tu kirolu ditu soni, cari ţi s’hibã sinferlu ţi lu andrupãrã, şi pãrãstisi lucãrli di prota thesi, cu ñicurarea bugetară ca protu scupo a gaereţloru tru kirolu ţi yini.
Nicuşor Dan: “Statlu român ari ananghi di unã alãxeari di thimelliu, cadealihea, tru mãrdziñili a statlui di dreptu. Vă asiguripsescu că voi s’escu un prezidentu dişcllisu la boaţea-a suţiitatillei şi parteneru cu suţiitatea. Pi şcurtu kiro, România ari unã provlimă, a deficitlui. Statlu român hãrgiueaşti dipu multu andicra di ţi ãlli da di mãnã, şi lucãrlu aestu poati s’acaţã tu muabeti stabilitatea financiară trã cari lucrãmu tu aeşţã añi. Easti ananghi di vãrtuşamea-a ligãturloru a noastri trasatlantiţi, Parteneriatlu strateghicu cu Statili Unite, participarea-a noastră la NATO şi participarea la dialoglu anamisa di UE şi NATO.“
Tru ţi mutreaşti ligãtura cu Ripublica Moldova, majoritar românofonă, Nicuşor Dan zburã ti andruparea-a imnaticlui a llei european, anvãrtuşearea şi lãrdzearea a proiectiloru comuni tru dumenea ali infrastructurã energeticã şi di transportu. El cãftã a tutãloru românilor ditu vãsilie şi ditu diaspora să s’minteascã tru gaeretea di reformari a statlui.
Tru minduita-a lui, lipseaşti s’aibã hãirlãticu tu proţedurli consulari și s’ndreagã unã structură ahãrdzitã ti atelli cari voru s’toarnã tu patrida dadã. Ma multu, el lugurseaşti cã easti ananghi di unã reprezentari proporțională tru Parlamentu trã româñilli ditu diaspora. Prezidentulu avu unã şcurtã andamasi cu Ilie Bolojan, cari asiguripsi interimatlu a ipotisillei di şef a statlui ditu 12 di şcurtu.
Nicuşor Dan dimãndã pi platforma TikTok şi protlu a lui mesaj video di la Pãlatea Cotroceni: “Prota dzuuã la Cotroceni. Ştiu că escu aoa dupu campania şi a voturli a voastri, trã cari nu am zboarã s-vă haristusescu. Ştiu cãţe escu aoa. Vă asiguripsescu că va nidzemu ninti cu parteneriatlu şi va s’dimãndãmu aşi cumu feaţimu pãnã tora.”
După yinearea pi scamnu va s’avemu consultări cu partidili politiţi ta s’adarã nãulu executiv. Prezidentulu spusi că easti tru sinferlu naţionalu ca România s’aibă un executiv andrupãtu di unã majoritate parlamentară, cari s’aibã tu scupo reformili fiscali inevitabili şi anãnghisiti. Nicuşor Dan spusi cã easti ananghi ta s’ñicureadzã evaziunea fiscală, birocraţia şi marea aruşfeti, ta s’asiguripseascã digitalizarea şi investiţiili tru educaţie, sănătati şi agricultură şi di anvãrtuşearea a sistemului di apărari a vãsiliillei.
Prezidentulu nica spusi că sistemlu di pensii lipseaşti s’hibã simplificatu, iarapoi tu ţi mutreaşti justiția easti ananghi cã parchetili s’aibã tu amprotusa marea aruşfeti ditu suţiitati și s’hibã ñicuratu kirolu ti andridzearea-a dosariloru.
Autoru: Mihai Pelin
Armãnipsearia: Taşcu Lala
