România la Agiocurli Olimpiţi – Anlu Nadia Comăneci

Anlu 2026 fu apufusitu ufiţialu ca hiindalui „Anlu Nadia Comăneci” di autoritățli români tra s-nsimneadză 50 di an’i di la prota notă di 10 ditu gimnastică, amintată la Agiocurli Olimpiţi di Montreal tu 1976.

Tașcu Lala, 02.09.2026, 18:57

Anlu 2026 fu apufusitu ufiţialu ca hiindalui „Anlu Nadia Comăneci” di autoritățli români, tra s-nsimneadză 50 di an’i di la prota notă di 10 ditu gimnastică, amintată la Agiocurli Olimpiţi di Montreal tu 1976.
.
Nadia Comăneci easti lugursită nai ma marea sportivă ţi u-avu vărăoară România. Aleaptă, tru 1999, Sportiva Secolui XX la disţiplini atletiţi, Nadia easti, tră multili bărnuri ţi au mirachi ti gimnastică, nai ma yilipsitorlu simbolu a pirifan’il’ei tru sportu.

S-amintă tru 12 di brumaru 1961 tru căsăbălu Onești (ditu apirita ali Românie). La ilichia di 5 an’i, feati protili jgl’ioati tru gimnastică, hiinda aflată tu arada a unlui concursu di selecție organizatu tru grădiniţili ditu căsăbă. După maş un anu di pregătiri, ahurhi activitatea competițională la categoria cilimean’i. Tru 1971, la prota a l’ei partiţipari internațională, la un concursu tru Vărgărie, amintă protlu locu la paraleli și bârnă.

Tru antriţerli internaționali cari viniră deapoa, Nadia agiumsi tru prota aradă pritu muşuteaţa şi pririfan’ia minărloru, precizia execuțiiloru și sigurlăchea a l’ei. Ea agiumsi tru amprotusa tru majoritatea concursurloru rezervati speranțiloru la cari lo parti, cu chipita tru Internaționalili ali Românie ditu 1973, cându amintă protlu loc la individualu compus și la tuti aţeali 4 aparati.

Tru antriţerli importanti a seniorloru, Nadia Comăneci debută tru 1975, la Europeanili di Skien. Intrarea l’ei tru toplu continental fu yilipsitoari și, maxusu, multu mediatizată di itia că, maca amintă 4 medalii di malămă și ună di asimi, românca u năstriţea categoric pi nai ma buna gimnastă a lumil’ei tru aţea oară, sovietica Ludmila Turișceva.

Nadia Comăneci intră, ama, tru istorie un an ma amănatu. La Agiocurli Olimpiţi di Montreal, amintă trei medalii di malămă, hiinda tru amprotusa la individualu compusu, paraleli și bârnă. Ma multu, amintă asimea tru concursulu pi națiuni cu pareia ali Românie și brondzulu la sol. Performanța a l’ei di mari vazi fu ama căndu amintă prota notă di 10 ditu istoria gimnasticăl’ei şi cu aestă furn’ie s’feaţi prota alăxeari tru regulamentulu di notari.

Chiro di nica 5 ani, Nadia agiumsi tru amprotusa neise tru ierarhia mondială a gimnasticăl’ei. Tru 1977 și 1979 amintă diznău titlulu european la individualu compusu, nica şi alti multi medalii di asimi și brondzu, la campionatili continentali disvărtiti Praga și Copenhaga. Tut tru 1979, la Campionatili a lumil’ei di Fort Worth, spuni giumami cu protlu titlu mondialu tră pareia ali Românie, ama, di itia a unăl’ei accidentari, concureadză maş la exercițiili impusi.

Tru 1980, Nadia confirmă valoarea la Olimpiada di Moscova, di iu s-turnă cu dauă medalii di malămă, la bârnă și sol. Un an ma amănatu, ş-bitiseaşti cariera, ună turlie idyealui yilipsitoari, cumu u-avu daima cu a l’ei prezență pi arena competițională, di amintă 5 medalii di malămă la aţea ditu soni a l’ei competiție ufiţală, Universiada di București.

Tru 1989, Nadia agiumsi tru menga a lumil’ei pritu ună apofasi di mari curayiu. Ea fudzi ditu România, neise tricu paranomu sinurlu cătă Ungaria și chinduri tru Statili Unite. Apofasea l’ei fu nai ma marea goadă mediatică ţi u deadi ti reghimlu ceaușistu.

Autor: Florin Orban
Armânipsearea: Taşcu Lala