Exichea bugetarâ pi scâdeari
Ministerlu di Finanţi di București da tu șteari evoluţia a exichil’ei bugetarâ dupâ proțl’i optu meși di estan
Tașcu Lala, 30.09.2026, 16:30
Tu Românii, execuţia a bugetlui gheneral anvârtușat, tu proțl’i optu meși di estanu, s-bitisi cu unâ exichi di vârâ 60 di miliardi di lei (anvârliga di 11,3 miliardi di evradz), cu aproapea 27 di miliardi di lei (vârâ 5,1 miliardi di evradz) ma ñicâ andicra di ațea ditu idyiul chiro a anlui 2025, deadi tu șteari Ministerlu a Finanţilor. Tu termeñi nominali exichea bugetarâ scâdzu cu cama di 30%, agiungândalui la unâ ponderi ditu produslu intern brutu di 2,89% di la 4,51% tu 2025. Tu chirolu acâțat tu isapi, pâradzl’i a bugetlui gheneral anvârtușat criscurâ cu cama di 11%, anda hărgili totali a statlui criscurâ cu niheamâ pisti 4%. Ministerlu a Finanţilor dzâți că un aportu di simasie vini ditu pâradzl’i loaț ditu TVA, ți au acutotalui 103,35 miliardi di lei, cu vârâ 25,2%, pisti nivelul ditu chirolu yinaru-agustu 2025.
Pâradzl’i ditu impozitlu pi tiñia di cathi mesu ș-pi pâradzl’i ți âl’i l’ia duñeaua criscurâ cu 8,1%, anda pâradzl’i ditu impozitlu pi profit avurâ ș-el’i un avansu di 9,1%. Tutnâoarâ, criscurâ și contribuţiili di asigurări cu 7,1%. Idyealui s-feați și-cu impozitili şi taxili pi nicuchirati, ți avurâ unâ crișteari di cama di 30%, andicra di idyiul chiro ditu 2025.
Ministrul interimar a finanţilor, Alexandru Nazare, luyurseaști că datili scotu tu migdani că misurli aprucheati di chivernisi au hâiri, dzâcândalui că finanţarea ditu fonduri evropeani şi pritu Planlu Naţional di Redresari şi Rezilienţâ andrupaști ma largu ecunumia şi proiectili di dezvoltari ali Românie. Nazari feați tâmbihi, ama că, tu chirolu ți va s-vinâ, cathi apofasi di hârgiuiari a pârălui public lipseaști s-hibâ yixitâ cu responsabilitati di cara s-fac presiuni mări pi buget, ama ş-a factorlor di nafoarâ ți pot s-agudeasacâ evoluţia ali economie româneascâ. El adusi aminti ş-că ţinta di exichi bugetarâ ti tutu anlu 2026 easti di 7,2% ditu PIB.
Datili mutrindalui exichea bugetarâ s-vedu tu arada tu cari România lipseaști s-treacâ, stâmâna aesta, pritu unu nău testu a ratinglui suveran. Tu 2 di sumedru, Aghenţia di rating finanțiar Standard & Poor’s va sâ scoatâ tu padi raportul di vâsilie. Misiunea ali instituţie easti chiola Bucureşti şi zburaști cu ufițialii româñi. Premierlu interimar liberal Ilie Bolojan dzâți că finanţili publiți suntu pi unâ cali bunâ, di bâgari tu zigâ, iara Alexandru Nazari dzâți că execuţia bugetarâ şi duțearea ma largu a anvârtușaril’ei fiscalâ suntu argumentili di prota thesi ali Românie. Miza easti țânearea a rating-ului tu categoria uidisitâ ti investiţii, di cari suntu ligaț pâradzl’i di finanţari şi pistusinea a investitorilor. Ma s-facâ unâ scâdeari a rating-lui, ahtari lucru poati s-agudeascâ vârtos ecunumia româneascâ. Pritu aestea suntu trâdzearea nâpoi ali unâ parti dit investitoril’i instituționali, scâdearea a investițiilor xeani directi, presiuni artimai pi cursul di alâxeari di pâradz și pâradz ma mulțâ ti amprumuturli a cratlui ș-a companiilor. Aestâ vearâ, aghenţiili di rating finanțiar Fitch şi Moody’s țânurâ rating-lu ali Românie tu categoria uidisitâ ti investiţii.
Autor: Mihai Pelin
Apriduțearea: Mirela Biolan
