Prezidentulu Dan condamnă implicarea ali Rusie tru acti di sabotaj
Prezidentulu Nicușor Dan cutugursi sertu implicarea ali Rusie tru acti di sabotaj pi teritoriul ali Românie.
Tașcu Lala, 27.10.2026, 20:02
Prezidentulu ali Românie, Nicușor Dan, cutugursi actili di sabotaj ali Rusie, după ţi DIICOT și SRI dimăndară că ma mulță cetățeni xen’i suntu mintiţ tru inţendiulu și explozia di meslu ţi tricu, la ună filială a Romarm di Brașov.
„Cutugursescu sertu iţi minteari ali Federaţie Rusă tru acti di sabotaj pi teritoriul ali Românie. Ahtări acţiuni nu suntu ti aprucheari şi reprezintă ună călcari greauă a suveranitatil’ei şi securitatil’ei ti cratlu a nostru. Niţi ună entitati xeană nu ari ndreptul s-cilăstăsească tru aestă turlie pi teritoriul ali Românie ică tru alti stati europeani. Di ani di dzăli, Rusia ufiliseaşti un arsenalu pi lenu turlli di căl’iuri tra s-li slăghească democrațiili europeani. Tentativili di influenţari a proţsesiloru electorali, campaniili di dezinformari, polimlu informațional, atacurli ţibernetiţi şi actili di sabotaj suntu tuti ună parti a polimlui hibrid disvărtitu di Rusia contra ali Europă”, dimăndă șeflu a statlui.
Prezidentulu năpoi adusi aminti că, tru stămăn’ili ditu soni, Federaţia Rusă ahurhi un altu livelu di escaladari şi provocari contra a transportului maritim ţivilu di la Amarea Lae.
„S-hibă limbidu, tuti aestea nu suntu inţidenti izolati, fără ligătură anamisa di eali, căţe fac parte ditu ună campanie premeditată şi coordonată, cu scupolu tra s-aducă ampărţari tru suţiităţli a noastri, tra s-tal’e curayilu a statilor europeani tră securitatea a loru işiş tră apărarea comună. Nu lipseaşti s-nă arădemu tru ligătură cu aestă fuvirseari. Polimlu hibridu easti purtat di an’i di dzăli, sumu lenu turlii, cu idyiulu scupo tra s-li slăghească di năuntru statili europeane şi solidaritatea anamisa di eali. Sila cabaia mari aluştoru acţiuni caftă s-avemu angătanu, multu di multu şi s-avemu ună isapi niacumtinată a riscurloru.”
Șeflu a statlui nica dimăndă că autoritățli români va s’lucreadză deadunu cu partenerl’ii a l’ei tră s-l’i-află ”alithioşl’i responsabili” tră inţendiul di Brașov.
”Va s-lucrămu ma largu deadunu cu aliaţl’ii a noştri ditu NATO şi cu partenerl’ii ditu Uniunea Europeană. Salut hăirea a tutulor profesioniştilor di la SRI, MAI, DIICOT şi DGIA cari cilăstăsiră tra s-l’i-află emu aţel’i cari nchisiră cu foclu pi platforma industrială Carfil, emu pi alithil’i responsabili di dinăpoia a aluştui actu provocatoru. Easti di simasie că instituţiili a statlui român s-li scoată tu videală aesti atacuri şi, cât ari căbili, s-li ambudyiusească. Oamin’il’I lipseaşti s’hibă duchimăsiţ di aesti piricl’iuri şi s-aibă angătanu ti atea ţi urdină tru şingirlu online. Lă haristusescu a tutăloru partenerloru externi tră colaborarea cu structurli româneşti. Apandisea a noastră lipseaşi s-hibă idyealui, coordonată şi tru pistipseari, cu thimel’ilu pi solidaritati şi axizearea tra s-cilăstăsimu deadunu”, nica spusi prezidentulu Dan.
Autor: Lică Manolache
Armănipsearea: Taşcu Lala
