Trilatearala România-Vărgăria -Turchia
România ma largu va s-cilăstăsească, deadun cu NATO şi partenerl’ii reghionali, tră anvărtusearea vigl’earil’ei maritimă, criştearea axiil’ei di apandisi la fuvirserli cu droni şi vigl’earea libirtatil’ei di navigaţie tru Amarea Lae.
Tașcu Lala, 30.10.2026, 17:03
Tru chirolu anda miniştril’i ali Apărari ditu România, Vărgăria şi Turchia eara tu muabeti, n’ercuri, tră meatrili di vigl’eari ali navigaţie ţivilă tu catandisea mutrinda atacurli un-alantu ruso-ucraineani, tru Amarea Lae avea si s-facă un nău inţidentu. Ună pampori comercială cari avea anchisită ditu portul israelian Haifa şi s-ndripta cătă aţelu românescu Constanţa eara agudită di droni aproapea di coasta ali Vărgărie.
Easti a ţinţea pampori comercială atacată di drone, meslu aestu, tru largul a coastăl’ei vărgară ali Amarea Lae. Iara, di la ahurhita a vearăl’ei, nu ma pţănu di 11 di pampori comerciali fură aguditi ică nicati aproapea di coastili ali Vărgărie şi ali Românie. Inţidentili s’feaţiră cu victime, ama şi cu zñ’ii babageani.
Cara tu ahurita eara zborlu ti inţidenti fapti aoa-aclo, creaștirea dzuuă di dzuuă a numirlui a lor agiumsi s’hibă unu semnu di lăhtari salami, navigația hiindalui băgată tru un cadealihea piricl’iu di dronili ică minili marini arusești ică ucraineani cari agiungu tru zonă. Emu, Amarea Lae easti un nod strateghicu di ligătură anamisa di Europa, Asia Tentrală și Orientul di Mesi. Di aestă itie, controlu și stabilitatea aluştui bazin suntu esențiali tră securitatea energetică, comercială și militară tru continentulu european.
După ună andamasi a CSAT di București, un Consiliu Nord-Atlantic la Bruxelles și muabeţ, Strasbourg, tru Parlamentul European – tuti stămâna ţi tricu, n’ercuri s-ţănu, Sufie ună andamasi a miniștrilor Apăraril’ei ditu România, Vărgăria și Turchia. Tru muabeţli a lor, Radu Oprea, Dimitar Stoyanov şi Yaşar Guler spusiră – uidisitu cu un comunicat ali MapN român – meatrili anănghisiti ti anvărtuşearea emu a cooperaril’ei aliati la Amarea Lae, emu a cooperaril’ei trilaterală, cari s-curmă escaladarea, vigl’earea oamin’iloru şi disvărtearea tru sigurlăchi a activităţloru ţivili ditu Amarea Lae.
Ministurlu Oprea cutugursi susta atacurli mutrinda navigaţia comercială, cundil’indalui că aestea suntu ună creaştiri cabaia mari a piricl’urloru tu ligătură cu polimlu di agresiune ali Federaţie Rusă contra ali Ucraină. El cundil’e ananghea tră tin’isearea libirtatil’ei di navigaţie şi protecţia a pamporiloru ţivili şi a infrastructurăl’ei maritimă.
Demnitarlu român părăstisi implicaţiili directi aluştoru evoluţii ti securitatea ali Românie şi simasia mutrinda agiutorlu NATO tră anvărtuşearea capacităţloru di vigl’eari, timbihi faptă di cu chiro şi com-bătearea dronilor. Tutunăoară, cundil’e ananghea ti anvărtuşeari misurli di protecţie a infrastructurăl’ei critică şi a obiectivilor energhetică ditu zona economică exclusivă ali Românie.
Tru ligătură cu creaştirea a cooperaril’ei tru trilatearală, s-achicăsiră ti făţearea ma cu hăiri cunuştearea a catandisil’ei maritimă, criştearea alăxerloru di informaţii şi anvărtuşearea coordonaril’ei anamisa di forţili navali a aţiloru trei stati. Tutunăoară, fu evidenţiată importanţa continuaril’ei cooperarea tru cadurlu a iniţiativăl’ei trilatearală di com-băteari a minilor marine MCM Black Sea. Di itia că, securitatea ali Amarea Lae easti disimasie tră securitatea ali Românie, a reghiunil’ei şi tră tută Alianţa Nordu-Atlantică – spusi ministurlu ali Apărari, Radu Oprea.
Autor: Roxana Vasile
Armânipsearea:Taşcu Lala
