Alerti di droni tru nord-estul a văsiliil’ei
Autoritățli apufusiră alerti tră ma multi giudeți după ţi nai ma pţănu dauă droni intrară tru spațlu aerianu românescu. Ună cursă aeriană fu redirecționată după ţi spațlu aerian fu ncl’isu tempoarar Iași.
Tașcu Lala, 31.10.2026, 21:19
Ministerlu ali Apărari Națională (MApN) dimăndă sâmbătă dicseară, că dauă droni intrară niautorizat tru spaţlu aerian românescu ţi yinea di cătă Republica Moldova. Protlu inţidentu s-feati anvărliga di oara 17:00, iara bănătorl’i ditu giudeţili Iași și Neamț loară hăbari pritu mesaj cu sistemlu RO-ALERT.
„Sistemlu di vigl’eari radar a Ministerlui Apăraril’ei Națională detectă ună țintă aeriană, ţi azbuira la 10 km di sinurlu cu Republica Moldova. Dauă aeronave F-16 a Forților Aeriene Române, aflate tru serviciul di alumtă Poliție Aeriană, azbuirară di la Baza 71 Aeriană Câmpia Turzii. Centrul Național Militar di Comandă (nucleu) hăbărisi Inspectoratlu General tră Situații di Urgență tu ligătură cu băgarea tru practico a meatriloru di alertari a populațiil’ei, hiinda dimăndatu un mesaj RO-ALERT la oara 17:04”, spusi MApN.
Cama deapoa, alerta aeriană fu lărdzită neise şi tră populaţia giudeţlui Vaslui.
Aproapea ună săhati ma amănatu di la protlu inţidentu, ună nauă țintă aeriană fu identificată, hiinda apufusiti alerti și tră giudețili Botoșani și Bacău, două aeronave F-16 di la Baza 86 Aeriană di Feteşti şi un elicopteru IAR-330 SOCAT.
Spaţlu aerian a giudeţlui Iaşi fu ncl’isu tempoarar, sâmbătă dicseară, tru contextul alertăl’ei aeriană, iara cursa cari lipsea s’agiungă di Eindhoven fu redirecţionată cătă Aeroportul Internaţional ‘Ştefan cel Mare’ di Suceava.
Directorlu Aeroportului Internaţional Iaşi, Romeo Vatră, spusi că misura fu loată di itia că spaţlu aerian pisupră di căsăbălu Iaşi fu ncl’isu tempoarar tru contextulu a disvărtearil’ei ună misiuni militară, dimăndă Agerpres.
Autor: Lică Manolache
Armânipsearea:Taşcu Lala
