Dyeafurăi reghionali tu Evropa
Dyeafurăi reghionali tu Evropa Politica di coeziuni ali UE caftâ scâdearea a dyeafurăilor și criștearea a oportunitățlor ti tuti reghiunili a l’ei, ama dyeafurăili nica s-ved.
Tașcu Lala, 31.10.2026, 22:52
Uniunea Evropeanâ nica ari dyeafurăi di simasie di devlopari anamsia di reghiunili a l’ei, scot tu padi datili Eurostat fapti di pțân chiro – anda niscânti teritorii au investiții, locuri di lucru și activităț economiți cu valoari adâvgatâ mari, alti au cripări cu șomajlu, tiñii di cathi mes ñiț și oportunităț mârdziniti. Uidisit cu datili Eurostat, tu 2024, PIB-lu pi bânâtor, spus tu standardi a putearil’ei di ancupârari fu altâ turlie di la unâ reghiuni la alantâ tu Uniuni, di la aproapea 270% tu reghiuni dit Irlanda la niheamâ pisti 30% dit media evropeanâ tu Mayotte, reghiuni di mardzinâ ți țâni di Galie.
Dyeafurăili reghionali s-ved ș-tu acâțarea a loclui di lucru. Tu 2025, rata a șomajlui tu Uniunea Evropeanâ fu di 6%, ama tu niscânti teritorii tricu tamam ș-di 20 proțenti. Alti reghiuni evropeani avurâ, ama, rati sum 2%. Aesti dyeafurăi suntu dati di structura ali economie localâ, livellu a investițiilor, acțeslu la educație și formari profesionalâ, cata cum și di mobilitatea a lucrâtorilor.
România easti unâ dealihea paradigmâ ti devloparea reghionalâ cu dyeafurăi. Datili scot tu migdani că reghiunea București – Ilfov, ți avu unâ di cama vârtoasili crişteri economiți dit UE dupâ pandemia di COVID-19, easti pi loclu trei tu Uniuni tu ți mutreaști criştearea economicâ tu aeșțâ ținți añi mutriț di Eurostat. Cu un avansu di 33% tu añil’i 2019 şi 2024, capitala ali Românie şi zona anvârliga di ea suntu astricuti di mași dauâ reghiuni dit Irlanda. Ași cum s-fați ș-tu alti reghiuni evropeani cama devlopati, București – Ilfov ari unâ parti importantă a activitățlor economiți, a sediilor a companiilor ș-a locurlor di lucru dit sectoarili cu valoari adâvgatâ analtâ.
Ama tut România easti ș-tu clasamentul a reghiunilor cu cama mărli scâderi economiți dit Uniuni. Reghiunea Not-Muntenia easti pi loclu patru, iara Not-Ascâpitata ali Oltenie easti pi loclu ținți. Cama mărli chireri s-feațirâ tu unâ reghiuni dit Vâryârie, iu PIB-lu dealihea scâdzu cu 20,5%, dapoaia altâ reghiuni dit Gârție şi dit reghiunea Groningen dit Olanda.
La livellu ali Uniuni Evropeanâ, produslu di nuntru brut criscu cu 5,6% tu termeñi dealihea tu idyiul chiro. Dit ațeali 244 di reghiuni mutriti, 197 tricurâ di livellu economic dit 2019, anda 46 avurâ scâderi. Țifrili aspun cât criscu i scâdzu economia dealihea, dupâ ți Eurostat feați nanâparti zñia datâ di scunchiri, ș-ași criştearea a pâhadzlor s-nu hibâ paraloatâ cu unâ crişteari a economil’ei. Aesti evoluții scot tu padi că devloparea economică nu va s-dzâcâ progres isa la livel reghional, infrastructurâ, acțes la investiții, structurâ economicâ și migrația a popului activ agiutândalui la criștearea i scâdearea a dyeafurăilor.
Autor: Corina Cristea
Apriduțearea: Mirela Biolan
