Diznău ti raportul a Mecanismului di Control şi Verificari
Miniştril’i di externi dit UE, andâmusiţ Bruxelles, alăvdarâ Comisia Europeană tră metodologhia ufilisită tră monitorizarea a catstisil’ei tru cari easti sistemlu judiciar dit România, ama şi autorităţli di Bucureşti tră gaeretea tra s-ndreaptâ aţea ţi nu easti ti bunâ tru aestâ dumeni şi tra s-tin’iseascâ statlu di dreptu şi independenţa ali justiţie. Aştiptărli ali Uniuni Europeani până la yinitoarea evaluari suntu idyili ş-tutunâoarâ suntu tricuti ş-tru raportul di justiţie publicat di Comisie pi 30 di yinar.
Ştefan Stoica, 12.03.2015, 13:28
Miniştril’i di externi dit UE, andâmusiţ Bruxelles, alăvdarâ Comisia Europeană tră metodologhia ufilisită tră monitorizarea a catstisil’ei tru cari easti sistemlu judiciar dit România, ama şi autorităţli di Bucureşti tră gaeretea tra s-ndreaptâ aţea ţi nu easti ti bunâ tru aestâ dumeni şi tra s-tin’iseascâ statlu di dreptu şi independenţa ali justiţie. Aştiptărli ali Uniuni Europeani până la yinitoarea evaluari suntu idyili ş-tutunâoarâ suntu tricuti ş-tru raportul di justiţie publicat di Comisie pi 30 di yinar.
Prota ş-prota, Consiliul UE aşteaptă numâsearea cât ma ntrâoarâ a procurorlor şefi la Parchetlu Gheneral şi Direcţia Naţională Anticorupţie, dupu ţi fu adrat un proţes transparentu. Tra s-hibâ credibili şi hâirlâtiţ, aţel’i numâsiţ lipseaşti ta sâ spunâ profesionalismu, independenţă şi integritati, cundil’eadzâ miniştril’i european’i di externi. Consiliul UE aproaki jgl’ioatili fapti pi calea câtâ pricunuştearea-a rolui ţi lu-ari Curtea Constituţionalâ tru arhitectura a statlui di dreptu. Di altă parti, ama, Consiliul lugurseaşti câ easti ananghi sâ s-facâ gaereţ suplimentari tră tin’isearea şi bâgarea tu lucru a apofasilor judiciari.
Tu aţea ţi-l’i mutreaşti, a miniştrilor şi a parlamentarlor lâ si caftâ, diznău, să spunâ responsabilitati atumţea când suntu scoşi tu migdani cu problemi di integritati. Tu apriduţeari directă, aestu lucru nsimneeadză că miniştril’i cercetaţ penal icâ parlamentarl’i aflaţ incompatibili cu ipotisea di demnitati publică di cătră Agenţia di Integritati lipseaşti ta ş-da demisia. Tu concluziile a lui pi mardzina a raportului dit arada-a Mecanismului di Cooperari şi Verificari, Consiliul UE agiumsi pi isapea câ s-feaţirâ progresi prit inspecţia judiciară ca hâlati ti fâţeari ma bunâ activitaea dit justiţie.
Idyealui cu Comisia Europeană, miniştril’i di externi alavdă rezultatili adrati di Parchetlu Ghenearal, DNA, Agenţia Naţională di Integritate şi Analta Curti di Casaţie şi Justiţie tu alumta contra a maril’ei corupţii. Arămân, ama, la capitolu provocări prevenirea şi sancţionarea ali aruşfeti tru dumenea-a achiziţiilor publiţi. Consiliul aduţi aminti că existenţa a unui sistem juridic imparţial, independentu şi hâilrlâticu, cu suficienti resursi easti indispensabilă tră politiţli ali Uniuni Europeani şi tră aţea ca tuţ cetăţen’il’i să s-hârseascâ acutotalui di oportunităţli ţi li da calitatea di membru ali UE. Tru bitisitâ, Consiliul cudil’eadzâ că Mecanismul di Cooperare şi Verificari avu un rol apufusitor tu ţi mutreaşti progresele fapti di România tru proţeslu di reformă ali justiţie şi salută naetea ali Comisiei Europeanâ tra s-ducâ ninti lucurlu cu monitorizarea-a catastisiljei dit România.
