Reacţii la dumânica electorală dit România
Român’il’i, criticaţ cabaia tră dezinteres yilipsitu şi ni-minteari ţivică, fură campion’il’i a dzuuăl’ei electorali di dumănică. Giumitati di el’i, un recordu absolut, votară la alidzerli europarlamentari şi 41% – multu pisti ateali 30 di proţenti cât easti praglu di valabilitati — apăndăsiră la acl’imarea a prezidentului ti referendumlu consultativ. Un la cari lipsea să spună desi suntu simfun’I cu niapruchearea ali amnistie şi graţiearil’ei tra faptili di aruşfeti şi desi vor interzicerea a ordonanţilor di urgenţă tru dumenea ali justiţie.
Ştefan Stoica, 28.05.2019, 11:41
Român’il’i, criticaţ cabaia tră dezinteres yilipsitu şi ni-minteari ţivică, fură campion’il’i a dzuuăl’ei electorali di dumănică. Giumitati di el’i, un recordu absolut, votară la alidzerli europarlamentari şi 41% – multu pisti ateali 30 di proţenti cât easti praglu di valabilitati — apăndăsiră la acl’imarea a prezidentului ti referendumlu consultativ. Un la cari lipsea să spună desi suntu simfun’I cu niapruchearea ali amnistie şi graţiearil’ei tra faptili di aruşfeti şi desi vor interzicerea a ordonanţilor di urgenţă tru dumenea ali justiţie.
Agiumsirâ virali imagin’ile cu codzli fără di bitiseari pi cari li adrară cetăţean’il’i român’i dit xinătati cari vrea tra ş-exercită ndreptul constituţional la vot. Nascanţă nu aprăftăsiră, acă aştiptară cabaia la coadă, iara frustrarea vini ună ş-ună, maxus că ună idyea catandisi – ţi nu agiumsi, ama, dimensiunile a eşecului organizatoric di dumănică – s-nregistră la votlu dit diaspora la prezidenţialili dit 2014. Easte itia tra cari prezidentul Klaus Iohannis şi principalele forţe ale opoziţiei, PNL şi Alianţa 2020 USR PLUS, căftară demisia a cabinetlui di stânga PSD – ALDE.
Prezidentul âl’I hirititi pi români tra prezenţa cabaia mari la urne şi lugursi că votlu hăbăriseaşti a politicienilor un mesaj fără echivoc. Ia ţi spusi Klaus Iohannis: “Deaditu un vot limbid, un vot ferm, un vot cari nu poati s-hibă ignorat di niţi un politician tru România. Votat tra ună politică corectă, tra ună justiţie ndreaptă, tra ună justiţie independentă, tra ună bună guvernare, tra români şi tra România”.
Euroscrutinul alăxi clasamentul tru chipita a politicâl’ei. Pi prima poziţie alină PNL, deapoa yini PSD. Pi trei, multu aproapea, easti favorite ali diaspora şi a bucureştenilor, Alianţa 2020 USR PLUS. Aţeali trei forţe politice au anamisa di 20 şi 30%. Nica va s-aibă reprezentanţă tru Parlamentul European Pro România, PMP şi UDMR. PSD nu cheari maşi 20 di procente andicra di alidzerli parlamentare dit 2016 ama şi partenerlu la guvernare, ALDE, ţi ari sum praglu di 5%.
Prezidentul a social-democraţlor, Liviu Dragnea, lă haristusi a românilor cari votară lista PSD şi nica u au pistusinea tru programul di guvernare, ama pricunuscu că nu easti un vot cari s-aducă haraua. Duchimăsitu ca principal beneficiar a alăxerlor tru cascadă adusi tra legislaţia penala, Dragnea declară că nu vărnăoară nu contestă referendumlu pi justiţie. Liviu Dragnea: “Lipseaşti s-adrăm ntrăoară analizi şi multu foarte serios tru partid. Ti referendum, mini ază loaiu buletinili di vot tra referendum şi votaiu. Aşi cum spuşu, ndaua ori arada, că nu escu contra a aiştui referendum şi nu escu contra a temelor di la referendum. Tru societatea românească nu avu ună dispută pi alumta contra ali corupţie ică pi alti teme.”.
Lidirul PNL, Ludovic Orban, lugurseaşti că rezultatele di la europarlamentare şi referendum reprezintă volea a cetăţenilor români: “Ahurhindalui di ază, niţi un lider politic numata ari izini să zburască ti amnistie, graţiere ică ţi arnearea ali justiţie, prit intermediul a ordonanţelor di urgenţă. Lă haristusescu a cetăţenilor români cari viniră la vot şi cari ş-deadiră votlu tra Partidul Naţional Liberal” .
Prezidentul PLUS, Dacian Cioloş, salute votlu di dumănică, pi cari îl lugurseaşti ună spuneari ti xanaamintarea a văsiliil’ei, iara camaradlu a lui, şeful USR, Dan Barna, spusi că rezultatele reprezintă ună victorie babageană tra România. Dan Barna: “Aestâ apandisi easte elementul pi cari putem s-ndridzem ma largu yinitorlu ali văsilie. Aestu referendum spuni că atumţea cându forţili tin’isiti ali societati, prezidentul ali Românie, partidile di opoziţie cari lugursescu, cari pistipsiră că justiţia lipseaşti s-armănă independentă, s-adună stogu, ia, videm un referendum cari tricu ma largu şi cari confirmă că justiţia lipseaşti s-armână indipendentă şi că România lipseaşti s-arămână ună văsilie europeană”.
La prota validare electorală, Pro România agiundzi a 4-a forţă politică, iara prezidentul a partidlui, fostul premier Victor Ponta, lugurseaşti că rezultatele demonstreadză că tru România ari ună vreari tră alăxeari.
Autor: Stefan Stoica
Armânipsearea: Taşcu Lala
